TALA I VAIFANUA

Pago Pago - AMERIKA SAMOA

AVE’ESE DOH ‘VAPES’ MAI FALEOLOA

Ua alu nei le lua masina o fa’atinoina e le Ofisa o le Soifua Maloloina le galuega, o le ave’esea o ‘vapes’ po o sikaleti e fa’aaoga ai vailaau, mai i fata o faleoloa.  

Sa taumafai le Samoa News e fa’afeso’ota’i le Ofisa o le Soifua Maloloina mo se fa’amaoniga o lenei tulaga, po o se fa’aaliga e tusa ai ma le fa’asaina ona toe tagofia o nei ituaiga sikaleti, ae peitai, sa le i mafai ona maua se fesootaiga ma le faletua ia Eileen Solaita, o ia lea o lo’o mataituina lenei mataupu.

E le o iai se tulafono a le teritori, e fa’asaina ai le aumaia ma le faatauina o ia ituaiga oloa, ma ua fesiligia ai le aia a le ASDoH e tusa ai ma le faatinoina o lenei tulaga, e aofia ai ma le tapunia o pisinisi, ona o tulaga tau i soifua maloloina.

E ui ina sa iloiloina e sui faitulafono se tulafono e fa’asaina ai nei ituaiga sikaleti ona o atugaluga i le faatosinaga e a’afia ai fanau talavou, ae peitai, e le’i pasiaina lenei tulafono.

MALIU FA’AFUASE’I LE FAIAOGA (COACH) A LE ‘AU FUSU A SAMOA I TA’ALOGA O LE OLIMIPEKA

O le aso Faraile na se’i mavae atu nei, Iulai 26, 2024, na maliu fa’afuase’i ai le susuga ia Lionel Elika Fatupaito, o le faiaoga (coach) a le ‘au fusu a Samoa, na faimalaga fa’atasi atu ma le ‘au fusu a le malo i Paris mo ta’aloga fa’aOlimipeka.

Sa fa’amaonia e le Peresetene o le Asosi o Ta’aloga ma le Komiti Olimipeka a le malo o Samoa, le susuga ia Luafalealo Paige Talalelei, ia lenei tala fa’anoanoa.

E tusa ai ma lipoti salalau e tusa ai ma lenei tala fa’anoanoa, e foliga main a maliu le susuga ia Fatupaito ona o se gasegase i le fatu.

Na fa’aalia e le afioga i le sui Faipule a Amerika Samoa i Uasigitone, ia Aumua Amata Radewagen i luga o ‘upega tafa’ilagi, lona agaga fa’anoanao i le maliu fa’afuase’ia a le alii faiaoga (coach Fatupaito) ma sa ia momoli atu foi lana faamaisega i tagata o le malo tuto’atasi o Samoa.

TULAGA MAOA’E TAUMAFAIGA A LE VAEGA SI’IMAMAFA A AMERIKA SAMOA I SAMOA

E to’atolu ni sui o le malo o Amerika Samoa sa auai atu i se tauvaga Si’iMamafa (Samoa National Powerlifting Championships) sa fa’ataunu’uina i le aso Toonai, Iulai 20, 2024 i Apia ma na toe taliu atu i fanua ma le manuia i le aso Lua o le vaiaso ua mavae, ma ni pine auro e lua ma le pine apamemea.

O latou ia na aofia ai Lesmarie Purcell-Ioane, Justin Pedro ma John Ioane.

O le faletua ia Lesmarie sa ia mauaina le ulua’i pine auro i le itupa a tamaitai, i le vaega o le 84+ kilokalama.

Sa ia fa’asoa mai i le Samoa News e faapea, o se lagona matagofie lea ua mafai ona o la fa’asoa ai ma si ona to’alua.  Aemaise ai, o lona to’alua na amata ai ona ia auai i lenei fa’agatama, i le fitu tausaga ua tuana’i.

Na manumalo le faletua ia Lesmarie i le vaega o le ‘Squat’ ma u’amea mamafa e 185 kg le mamafa, faapea ai ma le ‘Bench Press” ma u’amea mamafa e 100kg, ma ia ausia le si’i ‘Deadlift’ i u’amea mamafa e 185kg.

O le pine auro lona lua, na ausia e le susuga ia Justin Pedro, lea na fa’amanuiaina i se pine siliva mai i ta’aloga o le Pasefika i le tausaga ua mavae, i le atu Solomona.

Sa tauva ia Justin ma le susuga ia John Ioane, mai i Amerika Samoa foi.  Na maua ai e Justin ia le pine auro, ae ausia e Ioane ia le pine apamemea.  Ae o le susuga ia Oliva Kirisome mai Samoa sa na ia ausia le pine siliva.

O le fa’atolu ai lea ona tauva ia Pedro ma Kirisome mai Samoa, lea na manumalo ai le alii mai Samoa i le pine auro i le la fetauiga muamua i ta’aloga lona 17 o le Pasefika i le atu Solomona, ae maua e Pedro le pine siliva.

O le taimi lona lua, na tauva ai Pedro ma Kirisome, o ta’aloga Si’imamafa lona lima lea sa faia i le Sauia Gym i Tafuna, ia Aperila 6, 2024.  Na manumalo ai Pedro i le pine auro ae maua e Kirisome ia le pine siliva.

Na mafai ona maua e le Samoa News le avanoa e fa’asoa ai ma le susuga ia John Ioane lea sa ia ausia le pine apamemea mo Amerika Samoa.

O Ioane o se lupe fa’alele a le aoga maualuga a Tafuna ma sa amata ona ia auai i lenei fa’agatama, a’o iai i totonu o le a’oga ma o lo’o toleni mo le ‘au football a le a’oga.

Sa saunoa Ioane, o le lona lua ai lea o pine ua na ausia mai i ta’amilosaga fa’avaomalo ma ua sili atu le taua o lenei pine, ona o le manumalo o si ona faletua (Lesmarie) i lana pine auro.

Sa fa’aalia e Ioane, lo latou tapena atu ma lona faletua, mo leisi tauvaga fa’avaomalo ia Oketopa i Nauru.