O OE O LO’U TAMA?

VAEGA 94

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 94.

****************************************

Na fa’ate’ia le aiga a le tamaloa o Alesana ma le fafine o Eseta, a’o faia le latou mea’ai o le afiafi, o le alalafaga i le te’a mai i tua o Alesana mai i falema’i, ae tu’itu’i atu le faitoto’a, ae tamo’e mai iai le tama o Iakopo.

Sa lagona mai e Alesana ma Eseta ma le la fanau teine o Ruta ma Naomi, ia le tatalaina e Iakopo o le faitoto’a ma fai atu i le tagata o lo’o i le faitoto’a, “Sau loa lea ua matou a’ai.”

Ua tu’u le mea’ai a le ulugalii ma le la fanau teine ae tilotilo mai po o ai lea ua alu atu.

Ma na fa’ateia ia le aiga ina ua va’ai mai, o le teine lea e savavali atu ma Iakopo ma tau sa’e atu se meaalofa.

Ina ua taunu’u atu le to’alua lea i le laulau ‘ai lea o lo’o nonofo mai ai Alesana ma Eseta ma le la fanau teine, ma faapea atu, “Mom, Dad, o la’u uo teine lea, o Salome.”

Ona o lo’o tilotilo sa’o lava ia Iakopo ma le teine o Salome aga’i ia Alesana ma Eseta, sa le’i iloa atu ai le liua o foliga o le teine laititi o Naomi, lea sa mata ataata mai, ae ua liua i foliga le fiafia.

Manatua foi, o le tamaitai lenei o Salome, o le supavaisa lea a Naomi i le falema’i lea o lo’o Tausima’i ai.  Ae o le tala’aga a Salome ma Naomi, na amata mai a’o a’o’oga fa’atasi i le latou nu’u.  Ma o le tamaitai lenei o Salome sa fai ma fili numera tasi a Naomi, ona o le vaitaimi lea a’o talavou si teine o Naomi, sa lapo’a lava.  Ma o le mea fiafia lea a Salome e fai a’o latou a’o’oga, o le taufa’alili ma faifai i le lapo’a o si teine o Naomi.  

O Salome foi le mafua’aga na alu ai Naomi i le auai i vasega lea e a’oa’o ai le fusu (self-defense), ina ua matua o ia, ina ia mafai ona le toe taufa’alili seisi ia te ia.  Ae na avea le auai atu o le teine o Naomi i ia ituaiga a’oga, na mafua ai ona lusi ona pauna.

Ma o le mafua’aga foi lea sa le i manatua ai e Salome ia Naomi i le taimi na o le feiloai ai i le galuega, ona ua matua’i sui foliga a Naomi talu ona lusi ana pauna.

Ua fa’afeiloai atu nei e le alii o Iakopo ia lana uo teine i ona matua, ona liliu mai lea i le fa’afeiloa’i mai i ona tuafafine.  Ma ua oso fiafia mai nei ia Salome ma faapea mai ia Naomi, “Oi, o oe lea e te faigaluega i le falema’i.”  Ua na o le lulu o le ulu a Naomi ma faataupupula i lana ipu mea’ai, ua le ea ifo i luga.

Ua saofa’i ifo nei ia Salome i luga o le laulau’ai ma fa’aauau le taumafataga a le aiga ma talatalanoa.  Ae o le taimi lea, ua mou ese atu le toe fia ‘ai o Naomi ma ua na o le nofo lava ma tilotilo solo, ua le toe ‘ai.

Sa le’i umi lava ae tula’i loa Naomi ma faapea atu i ona matua, o ia o le a alu e fai sana malologa, ona e vave usu i le taeao.  Ua fa’amavae atu nei o ia ma ia savali atu loa i lona potu.

Ae o le taimi lea, ua faapea atu ai le tamaloa o Alesana ia Iakopo, e avatu ia Salome i luma o le potu malolo e fa’aauau ai le latou talanoaga ma inu se latou ipu kofe.

Ua faapena loa ona fai, ma ua savali atu nei le teine o Salome i le potu malolo ma amata ona fa’asolosolo lana va’ai i ata o le aiga a Iakopo lea o lo’o faapipi’i solo i totonu o le potu malolo.

Sa matua’i fa’ate’ia Salome ina ua tau lana va’ai i le ata o Naomi a’o talavou o ia, o lo’o ofu mai le toniga a le a’oga lea sa a’oga ai.  Na iloa mai e le teine o Ruta ia le tu o Salome ma fa’ataupupula i le ata a Naomi ma ona foliga e pei ua va’ai i se aitu.

“E te iloa le tagata lena?” o le fesili mai lea a Ruta ma savali mai i le mea o lo’o tu atu ai Salome.

Ua liliu mai Salome ma tilotilo mai ia Ruta ma ona foliga, ua mumu atoa e pei o le a tagi. 

“O le ata lena a Naomi a’o talavou.  O fea na e a’oga ai a’o e talavou?”  O le fesili lea a Ruta ia Salome.

[E FAIA PEA]