Loka ni alii se to’alua i le gaoia o meatotino mai i se ta’avale e aofia ai ma le $10,000

Pago Pago - AMERIKA SAMOA

O le taeao o le aso 26 o Me, sa fa’afeso’ota’i ai e le susuga ia Ding Fudong ia le Ofisa a Leoleo i Tafuna, e lipotia ai le osofa’ia e ni tagata gaoi ia lana ta’avale.  Ae o le taimi foi lea na vala’au atu ai foi seisi tagata fa’atau i le faleoloa o le Happy Mart, e talosagaina se fesoasoani mai i le Ofisa o Leoleo.

E tusa ai ma le ripoti a le tagata fa’atau i le Happy Mart, o lo’o iai se alii o lo’o tauanauina o ia e fa’atau se fagu suau’u o lo’o iai se suau’u.

E tusa ai ma fa’amaumauga a leoleo, na aga’i atu leoleo i le Happy Mart ma sa talosagaina ifo iai e le mafine na valaau i le Ofisa a Leoleo, ina ia fa’atonu le susuga ia Aukuso Fale (lea ua molia i lenei mataupu) ina ia soia le toe fa’alavelave atu ia te ia (tamaitai).

Ina ua fa’asino ifo iai e le tamaitai i leoleo ia Fale, sa silafia lelei e leoleo le alii lea mai i seisi foi mataupu ua mavae atu.

Na tu’ua e leoleo ia le Happy Mart ma agai atu i le nofoaga sa valaau mai ai ia Fudong, pe a ma le lua fale tala atu o Happy Mart.  Ma na fa’aalia e Fudong lona le fiafia tele ona ua fa’aleagaina e se tagata lana ta’avale ma gaoia ni meatotino sa i totonu.

Sa ta’ua e Fudong, sa ia lokaina lana taavale i le po ae e le’i agai atu i lona maota e fai sana malologa.  Ae peitai, ina ua usu mai i lena taeao, sa ia va’aia ai le fa’aleagaina o lana taavale, ae o meatotino ua ave’esea, e aofia ai se fagu suau’u, o se seti polo (golf balls) ma se tinoitupe e $10,000 na i totonu o le pusa ‘golf balls’.

A’o talatalanoa leoleo ma Fudong, sa toe manatua e leoleo ia le mataupu lea sa tupu i le Happy Mart, i le alii o Fale lea sa taumafai e fa’atau atu se fagu suau’u i se tamaitai na fai sana fa’atauga i le Happy Mart.

Ae o le taimi foi lea na va’aia ai e leoleo, le pasi ifo o Fale mai i le mea o latou tu tu ai ma Fudong.

Sa faapea loa ona aga’i atu leoleo ia Fale ma fesiligia o ia po o fea na aumai ai lana fagu suau’u.  Sa tali le ua molia, sa ia mauaina i tafatafa o le ta’avale a Fudong.

A’o faia pea su’esu’ega a leoleo, ae savali atu loa le susuga ia Faamoemoega Lilio ma fa’ailoa atu i leoleo, o lona igoa o Moe.  O le susuga ia Lilio lea molia faatasi ma Fale i lenei mataupu.

Sa faamatala e Lilio i leoleo, na taumafai ia Fale e kamuta ia le faamalama o le ta’avale a Fudong, ae ona ia aveina ai le fagu suau’u mai i le taavale.

Sa faapea loa ona aveina e leoleo ia Fale ma Lilio i le Ofisa a Leoleo i Tafuna mo le fa’aauauina o le latou mataupu.  Ae ina ua fesiligia e leoleo ia Fale, sa toe sui ai lana faamatalaga.  Sa ia ta’ua e faapea, na ia ave’esea le fagu suau’u mai i tua (trunk) o le ta’avale a Fudong i le 1 po o le 2 i le vaveao.

Sa ia fa’amaonia lona aveina o le fagu suauu ae ona te’ena le aveina o seti ‘golf balls’ ma le fa’aleagaina o le taavale.

E tusa ai ma fa’amaumauga a leoleo, sa fa’aalia i se ata vitio mai i le faleoloa a le Coco Mart, ia le alu atu o Fale ma le fagu suau’u faapea ma ‘golf balls’ ma ia tauanauina le fa’atauoloa e na te fa’atauina.  Ina ua musu le fa’atauoloa, sa faapea loa ona toe alu ese ia Fale mai i le Coco Mart ma mea totino uma nei.

Ina ua fesiligia e leoleo ia Lilio pe faapefea ona ona ia iloa o lo’o taumafai Fale e kamuta le faamalama o le taavale, sa tali Lilio, ona sa iai o ia i le taimi lea.

Sa fa’amautuina ai foi e leoleo, le galulue faatasi o Fale ma Lilio, ina ua fa’amaonia e Lilio lona fesoasoani ia Fale ina ia mafai ona oso i totonu o le taavale.

Sa faamatalaina e Lilio, o le vaveao o le aso 26 o Me, 2024 na o la va’aia ai ma Fale le matala o le faamalama pito i tua i le taavale a Fudong.  Ma sa tago loa Lilio i le u’una’i ia matala tele, ae oso Fale i totonu o le taavale.  Ina ua toe oso mai i fafo ia Fale ma le taavale, sa ia u’uina mai ni pusa ‘golf balls’ se lua.  Ma na o la taumafai e toe tapuni le faamalama ina ia aua ne’i iloa e seisi.

O le oso mai i fafo o Fale mai i totonu o le ta’avale, na ia iloa atu ai le fagu suau’u i le pito i tua o le taavale, ma ia tago loa ave.

Na fesiligia e leoleo ia Lilio pe aisea na toe oso mai ai i fafo ia Fale i le fa’amalama ae ua le tatala loa le faitoto’a o le ta’avale, sa tali Lilio, ina ia aua ai ne’i ola le fa’ailo (alarm) a le ta’avale, ona e loka mai i totonu.

Sa aofia i faamaumauga a leoleo, le leai o se tioata o le fa’amalama sa faaleagaina.

E le i fa’ailoa atu e leoleo ia Fale ma Lilio, o lo’o iai se tinoitupe i totonu o pusa ‘golf balls’ na o la gaoia.

E lua moliaga o Fale ma Lilio, e aofia ai;

Faitauga 1:  Gaoi – o se vaega ‘A’ o solitulafono mama, e mafai ona nofosala ai i le falepuipui, i le o’o atu i le tasi (1) tausaga, po o se sala tupe e $1000; po o faasalaga uma e lua.

Faitauga 2:  Faaleagaina o mea totino i lona tulaga e lua – o se vaega ‘A’ o solitulafono mama, e mafai ona nofosala ai i le falepuipui i le o’o atu i le tausaga e tasi (1) po o se sala tupe e $1,000; po o faasalaga uma e lua.

E $3,000 le vaegatupe faatulagaina mo i la’ua, e mafai ai ona faatali ai a la fa’amasinoga.

Sa su’eina e leoleo ia mea totino na gaoia mai i le ta’avale a Fudong ma na o latou molimauina i se ata vitio mai i le Happy Mart ia le o molia, na agai atu i se auala galue ma nei mea totino.

O le aoauli o le aso 26 o Me, 2024 na valaau mai ai se tamaloa i le Ofisa a Leoleo i Tafuna ma fa’ailoa mai iai le mauaina e lona atalii o meatotino sa gaoia i luga o le auala pefu i tua o le latou fale.

O nei meatotino sa aofia ai le $10,300, o seti ‘golf balls’ e lua ma le fagu suau’u.  O le tau aofai taumateina o meatotino sa gaoia, faapea mea na faaleagaina i le taavale ma le leipa e toe faaleleia ai, e $11,885.00.

Ua mae’a ona toe fa’afo’i atu meatotino na gaoia, i le susuga ia Fudong.