E FAI O LENEI AE O LENA

O LE PATO PA’EPA’E

I aso a la ua leva, sa faaipoipo ai se Perenise ma se Purinisese o se malo tele.  Ina ua mae’a le faaipoipoga, sa sauni loa le Perenise e alu malaga i se nu’u mamao lava ma sa ia faatonuina le Purinisese ina ia ‘aua ne’i tu’ua lona potu, ia ‘aua ne’i feutaga’i ma ni tagata leaga, ‘aua ne’i fa’alogo i ni tala feavea’i ma ‘aua ne’i fa’auo i ni fafine e le masani ai. 

Sa ioe le Purinisese ma ina ua tu’ua o ia e le Perenise, ua alu loa nofo i lona potu, ua le toe sau i fafo.

A’o nofonofo le Purinisese i lona fa’amalama i se tasi o aso ma tilotilo mai i fafo ma tagi, sa pasi ifo i lalo o lona fa’amalama se fafine ma e foliga mai o se fafine agalelei.  Na va’aia e le Purinisese le savali o lenei fafine i se to’oto’o.

Ua o’o tonu mai lava le fafine lea i lalo tonu lava o le fa’amalama a le Purinisese ma tu ai loa ma faapea atu i lona siufofoga malie ma le tauanau, “Purinisese, aisea e te tagi ai?  Sau i fafo e matamata i fugalaau matagofie ma le manogi o lou togala’au.”

Na umi se taimi o tauanau e le fafine lenei ia le Purinisese e sau i fafo, ae peitai, sa te’ena lana augani e le Purinisese.  Ae peitai, na i’u lava ina faapea le Purinisese, ‘Ailoga e iai se mea e leaga ai lo’u alu out e savalivali i totonu o lo’u togala’au.  Ae oute le alu i le mea o iai le vaitafe.”

E le i iloa e le Purinisese, o le fafine lea e tauanaua mai o ia i fafo, o se fa’ataulaitu, ma ua sau e na te faia se mea leaga i le Purinisese ona o lona lotoleaga i le aulelei o le Purinisese.

Ua alu atu nei le Purinisese ma nofonofo i totonu o lona togala’ua ma matamata i le matagofie o fugalaau lanu ‘ese’ese.

Ae ua soso atu nei le fafine ma faapea atu i le Purinisese, “Oka se vevela o lenei aso.  Se’i va’ai atu i le manaia o le tafetafe mai o le vaitafe lale.  Ai se manaia o le malulu o le vaitafe, e tu’u iai o ta vae e ta te fa’amalulu ai i lenei aso vevela.”

Na tete’e, tete’e lava le Purinisese i le tauanau a le fa’ataulaitu, na i’u lava ina ona tu ifo i luga ma savali atu aga’i i le vaitafe.  E le’i tu lelei vae ole Purinisese i totonu o le vaitafe, ae oso atu le fafine po o le faataulaitu ma faapea atu, “Ia e a’au solo nei pei oe o se pato pa’epa’e” ma liu ai loa le Purinisese i se pato pa’epa’e.

Ae ua oso atu le fa’ataulaitu ma aumai la’ei o le Purinisese ua ofu ai ma vali ona foliga e pei o le Purinisese.  Ona alu lea i le nofonofo i totonu o le potu a le Purinisese, e fa’atalitali ai le toe fo’i mai a le Perenise.

[IA MANUIA TOE FUAFUAGA O LE FA’AI’UGA O LENEI VAIASO]