TALA O LE PASEFIKA

PASEFIKA

SAVALI MA TALOTALOGA A  LE EFKAS E FA’ASAGA TAU I FUALAAU FAASAINA

O le aso Faraile o le vaiaso nei, Iulai 19, 2024, ua fuafuaina ai se savali tele ma se talotaloga a le Ekalesia Faapotopotoga Kerisiano a Amerika Samoa (EFKAS) e fa’aalia ai lo latou fa’asaga tau i Fualaau Faasaina.

O lo’o fa’agasolo nei i lo latou laumua i Kanana Fou ia le Fono Tele lona 35 a le EFKAS ma o le latou manulauti, “Ua na o Keriso e faamalieina.”

O le aso Sa, Iulai 14, sa tatalaina aloaia ai le Fonotele lona 35 a le EFKAS, lea o lo’o auai mai ai taitai o ekalesia  mai itu e fia o le lalolagi.

Ua saunia e i latou o le a auai i lenei savaliga ma talotaloga ia ni ‘banners’, o toniga faapea ni taavale teuteuina, aua lo latou faamoemoe i le aso Faraile.

O le a vavaeina ia i latou o le a auai i lenei faamoemoe, i ni vaega se lua.  O le vaega muamua o le a feiloai i le 5 i le taeao i le Malaeoletalu i Fagatogo ae o le vaega lona lua, o le a feiloai i le 5 i le taeao, i le Paka i Faga’alu.

Ona aga’i atu lea o le savaliga e tigi i le Suigaula o le Atuvasa i Utulei, lea o le a faia ai le talotaloga i le ta o le 7 i lea taeao.  O le 8, ua fa’atulagaina ai se saunoaga mai i le afioga i le kovana Lemanu P.S. Mauga.  Ma tapunia ai i se saunoaga mai i le Taitaifono o le Komiti a Toeaina, le susuga i le Faifeau Toeaina ia Falelua Lafitaga.

O le aso 26 o Iulai ua faamoemoe e tapunia aloaia ai le Fonotele a le EFKAS.

FAAMAONIA LE MALIU O LE TOATASI I SE FA’ALAVELAVE VAALELE I VANUATU

O se fa’alavelave na tula’i mai i Vanuatu, lea na pa’u ai se vaalele i se fa’atoaga e tu lata i Port Vila, i le amataga o le vaiaso, ua fa’amaonia mai e le Ofisa Turisi a Vanuatu i le RNZ, le maliu ai o se tagata.

E tusa ai ma le faamatalaga a le so’oupu a le Ofisa o le Turisi na iai i luga o le Air Taxi Vanuatu i le aso na tupu ai le faalavelave, e to’alima i latou na i luga o le vaalele.

I se ripoti mai i le Matagaluega o Femalagaiga i luga o le Ea (CAA), o le taeao o le aso Lua na maliu ai le alii na taofia i le falemai ona o lea faalavelave.  E leai se faamatalaga mai i le CAA ona o lo’o fa’aauau pea su’esu’ega i lenei faalavelave.

O le lona lua ai lea o fa’alavelave a le Air Taxi i lenei tausaga.  O le fa’alavelave muamua lea na tula’i i le motu o Vanualava a’o faimalaga ai le Minisita o Tupe, ia John Salonga.

E tusa ai ma se molimau, na taumafai le vaalele e tulau’ele’ele i le malae ta’alo a Montmarte, ae na toe sui le mea na agai iai  ona sa tumu le malae ta’alo i fanau aoga, ma na faapea ona sese’e ai le vaalele i se faato’aga.

Na ta’ua e le Faatonusili o le Ofisa o Turisi, ia Paul Pio, sa na o tagata o le atunu’u na i luga ole vaalele.

TOE FA’AFO’I MAI I SAMOA LE PITO I LUMA O LE ‘TAUMUALUA’ A SAMOA

I le mavae atu o 134 tausaga talu ona gaoia e fitafita Siamani ia le taumua o se va’a tau, po o le Taumualua a Samoa, i le 1888, i le taimi o le taua tele a Samoa.

I se fa’atasiga fiafia a le Iunivesite a Samoa ma le fale mata’aga a le Ubersee-Museum i Siamani, sa faapea ona taua’aoina mai ai e sui o Siamani ia le taumua o le va’a i taitai o le Iunivesite a Samoa.

MALILIEGA A VANUATU MA SAINA

O lo’o ua iai se faamoemoe i le faaiuga o lenei tausaga, e sainia ai se maliliega i le va o le motu o Vanuatu ma le malo o Saina, lea o le a fa’atagaina ai vaalele a Saina ona tulau’ele’ele i Vanuatu.

E tusa ai ma le ripoti a le Vanuatu Daily Post, sa fa’aleoina fuafuaga o lenei maliliega, i se fonotaga i le va o le Palemia a Vanuatu ia Charlot Salwai ma le Pulenu’u a Shanghai, o Gong Zheng.

O le masina o Setema lea e faamoemoe e fa’ataunu’uina ai lenei fuafuaga.

TOE FAAOPOOPO GASEGASE O LE ‘DENGUE’ I SAMOA

I se ripoti mai i taitai o le Ofisa o le Soifua Maloloina a Samoa, ua ta’ua ai le toe faaopoopoina o nisi gasegase e 12 i faamaumauga lata mai nei, o gasegase o le Dengue.

Ma o le aofaiga atoa o gasegase o le ‘dengue’ ua faamaumauina, talu mai Novema o le tausaga ua mavae, e 468.

O le tele o gasegase e mai i Apia ma nu’u ma afioaga e latalata i Apia, ma le to’atele o i latou ua a’afia e i le va o le 20-29 tausaga.  Ae e leai se maliu ua ripotia mai.