Amata tauaofiaga a le Maota o le Senate i le iloiloga o mataupu tau i le Soifua Maloloina

Pago Pago - AMERIKA SAMOA

O le taeao o le aso Lua, Iulai 9, 2024 na aofia potopoto ai afioga i Senate mo le tatalaina aloaia o a latou iloiloga, i le fa’asi’usi’uga o le Tauaofiaga lona 38 a le Fono Faitulafono, talu ona tapunia le Fono Faitulafono ia Aperila lea sa fa’ataunuuina ai Tauaofiaga Faapitoa e pei ona taloina e le afioga i le kovana.

Sa fa’amaonia i le tauvala’aga a le Maota Maualuga i lea taeao, le auai uma o Senatoa seia vagana le afioga i le Senatoa ia Fonoti Tafa’ifa Aufata, ma sa fa’aleoina e le Peresetene o le Senate, le afioga Tuaolo Manaia Fruean, le agaga fa’afetai mo le auai uma atu o afioga i Senatoa i lea taeao.

E le gata i lea, na saunoa foi le afioga Tuaolo i lona agaga mitamita ona o le auai uma o afioga Senatoa i le sauniga sa tatalaina aloaia ai le vaega mulimuli o le Tauaofiaga lona 38 a le Fono Faitulafono, lea sa faia i le Fale Laumei i le taeao o le aso Gafua.  Saunoa Tuaolo, sa fa’aalia ai le tasi o le Senate.

Na fa’alauiloa e le Taitaifono a le Komiti o le Soifua Maloloina, le afioga i le Senatoa ia Tuiasina Salamo Laumoli ia tulaga na tula’i mai i le iloiloga a le latou komiti sa faia i le amataga o le masina ua tuanai, a’o malolo le Fono.

E tusa ai ma le ripoti a Tuiasina, sa taloina lea iloiloina ina ia faamautuina le mafuaaga ua taofia ai le polokalama mo talavai a gasegase o le LBJ i atunu’u i fafo, lea o lo’o faatupeina e le Medicaid, faapea ai ma le mafuaaga o le tapunia o le fale fa’amama toto a le Hope Dialysis Center, lea na tapunia i le aso 30 o Iuni, 2024.

Na molimau le Faatonusili a le Medicaid, le faletua ia Sandra King-Young, ua mafua ona fa’amutaina la latou auaunaga, ona ua le lava tupe e fa’aauau ai lea auaunaga.

Sa ia fa’ailoa mai foi i le Komiti o le Soifua Maloloina a le Senate, o le auala vave lava e maua ai se tupe lea e manaomia e toe fa’aauau ai le auaunaga a le Medicaid, e aofia ai ma le fa’aauauina o talavai a tagata o le atunu’u i atunu’u i fafo, o le pasia lea e le Fono o se pili mo se tupe fa’asoasoa faaopoopo.

Ae peitai, sa saunoa le afioga i le Senatoa ia Magalei Logovi’i, e na o le pau le auala e mafai ai ona pasia e le Fono se pili mo tupe fa’aopoopo, pe afai o iai se ‘source’ e saua ai lea vaegatupe.

Sa ta’ua e King-Young, na ia talosagaina se vaegatupe e $8 miliona, i totonu o la latou paketi mo lenei tausaga tupe, ae peitai, sa na o le $4 miliona na pasia e le Faigamalo.

Sa ia faamanino mai foi e faapea, na amataina le polokalama (off-island referral) lea o lo’o faatupeina e le Medicaid, i le ono tausaga ua tuanai, e aunoa ma se vaegatupe ma’oti sa faatulagaina, e faatupeina ai. Ma sa ia toe fa’aleoina mai le manaomia o se vaegatupe e mafai ai ona toe fa’aauauina lenei polokalama.

Ma na toe fa’amanatu mai e Tuiasina i afioga i Senatoa i le taeao o le aso Lulu, le saunoaga a le afioga i le Kovana i le aso Gafua, lea o lo’o iai le $2 miliona o tupe maua faalotoifale, ua mae’a ona fa’aagaaga mo le ‘matching fund’ a le Medicaid.

E atoa ai iina le $6 miliona mo le ‘matching fund’.

Na toe faamanino e le afioga Tuiasina i le taeao o le aso Lua, o lo’o fa’aauau pea le polokalama o le ‘off-island referral’ a le LBJ, ae e mo na’o i latou o lo’o iai a latou ‘Medicare’.  Ma e na o pasese a le tagata gasegase ma le tagata o lo’o la malaga fa’atasi (escort), e totogi e le LBJ.  Ae o isi tulaga uma mo le talavai, e aofia ai nofoaga e faamautu ai, e totogi uma e le gasegase o le a faimalaga.

Na fa’aalia foi e Tuiasina, o se lipoti lata mai mai i le Hope Dialysis Center, lea sa fa’ailoa atu e le Faatonusili a le LBJ ia te ia, i le aso Gafua, ua fa’amaonia ai le tapunia o le Hope Dialysis Center, ona ua le toe gafatia ona fa’aauauina lana auaunaga, talu ai le le toe iai o se tupe o toe maua atu i le Medicaid.

Na fa’aalia e Tuiasina, e 41 gasegase sa faia a latou talavai i le Hope Dialysis Center, ae o lea ua toe malaga atu i latou i le LBJ mo le faia ai o a latou talavai.  Fa’atasi ai ma gasegase e 198 lea o lo’o faia a latou talavai i le potu fa’amama toto a le LBJ, ua atoa ai nei le to’a 239 o gasegase ua faia a latou talavai i le LBJ.

O le aofaiga o talavai (treatments) e manaomia, e faatolu (3x) i le vaiaso e tasi, mo gasegase faaopoopo e 41, o lona uiga, e $5,490 i le tausaga e tasi, o lona uiga, e $1.3 miliona tupe maua a le LBJ.

Na fesiligia e Tuaolo ia le Taitaifono pe na fesiligia ia le pulega a le Hope Dialysis Center, i le mafuaaga ua fa’amutaina ai le latou tautua, ae na tali Tuiasina, e le i manino mai se tali mai i le pulega a le Hope Dialysis Center.  Ae na fa’ailoa atu e King-Young ia i latou, e le o se matafaioi a lo latou ofisa, le totogia o pili a gasegase lea o lo’o i le Hope Dialysis Senator.

Sa saunoa le afioga i le Senatoa ia Togiola Tulafono, e tusa ai ma ni faamatalaga salalau i le aso Gafua, i ni feutagaiga o lo’o faia i le va o le LBJ ma le Hope Dialysis Center, mo le sailiga o se auala e mafai ai ona fa’aauauina le tautua mo gasegase i le LBJ.  Ma sa ia talosagaina le komiti ina ia o latou su’esu’eina ia lipoti.

Na fa’aalia e Togiola e faapea, o ia o se tasi sa galue malosi i le faavaeina o le Hope Dialysis Center, ma le le fiafia o le LBJ i le tatalaina o lea falemai tua.   Sa ta’ua e Togiola le le manana’o o le LBJ e tu’u mai a latou tagata mama’i e fai a latou talavai i le Hope Dialysis Center po o le tatalaina mai o vaegatupe o le Medicaid i le Hope Dialysis Center, ma sa taumafai malosi lava le LBJ ina ia tapunia le Hope Dialysis.  Ae o lea ua tomumu i le toe faaopoopo atu o tagata gasegase.

Sa saunoa Togiola, ina ua filifilia o ia e avea ma sui o le latou itumalo i totonu o le Senate, sa ia tu’uesea loa ona tiute i totonu o le Hope Dialysis Center.

Ma na ia toe fa’amamafaina lona mana’o i le komiti ina ia suesueina pe moni ia faamatalaga ma pe iai se auala e mafai ai ona fesoasoani le LBJ e toe fa’aauau ia le auaunaga a le Hope Dialysis Center, aua le mamalu o le atunu’u o lo’o manaomia lea auaunaga.