Nofo va’ava’aia mo le 20 tausaga ia se faiaoga i Samoa, ona o se faalavelave tau ta’avale na maliu ai se tama matua

Apia - SAMOA

O le fa’ai’uga o le masina ua tuanai atu, na lauina ai e le afioga i le Faamasino Sili ia Satiu Simativa Perese, ia le fa’asalaga fa’anofova’ava’aia, a se alii faiaoga mai i le Kolisi o Matata Eseese i Punaoa, o Siomia Junior Savaiinaea, lea na maliu ai se tama matua e 78 tausaga.

O Iuni 21, 2021 na tula’i mai ai le fa’alavelave na molia ai Savaiinaea, ina ua ia so’aina ia Siaosi Levaa i lana ta’avale i le afioaga o Vaimea.

O le susuga i le loia ia Leiataualesa Komisi Koria sa tula’i mo Savaiinaea ae o le susuga i le loia ia Leinafo Taimalelagi Strickland, sa tula’i mo le malo.

E tusa ai ma se ripoti a le Samoa Observer, i le  faamatalaga o lenei mataupu, a’o aga’i atu le ta’avale a Savaiinaea i luga o le auala i Vaimea, o lo’o aga’i atu i le Kolisi a Sagato Iosefo, sa ia so’aina ai le tama matua ia Levaa.

Na fa’afofoga le faamasinoga i molimau, i le taia o le ua maliu i le ‘bumper’ pito i luma o le ta’avale a Savaiinaea.  Ma na tuga ona manu’a, faapea ai ma lona maliu a’o faatopetope atu i le falemai.

Sa faafofoga le afioga i le Faamasino Sili i nisi o molimau mai i le uso o le ua maliu, e tusa ai ma se ifoga sa fa’atino e le aiga a Savaiinaea faapea ma le totogia e Savaiinaea o se tinoitupe e $21,100 mo le maliu o le tama matua.

Sa fa’aalia e Satiu, o le a’ano o le molimau a Momoemausu, o le fa’ailoa mai lea i le faamasinoga, ua uma ona fa’amagalo e le aiga a le ua maliu, ia Savaiinaea, ma e le o finagalo lo latou aiga, ina ia faafalepuipuiina o ia.

Ma na taliaina e le faamasinoga ia le molimau a le itu tete’e, e faapea, na mafua lenei fa’alavelave on aua sasi le va’ai, i sina taimi puupuu.

Ae peitai, sa saunoa le afioga i le faamasino, sa taumafai le na molia e finau mai, e na te le i so’aina le ua maliu, ae na oso le ua maliu i luma o lana taavale a’o alu lana taavale i luga o le auala tele.  O lea molimau, e pei ona ta’ua e Satiu, e le fa’amaonia.

Sa ia ta’ua foi le taua o molimau a Samaria Agalelei ia sa fesoasoani i le tama matua e aveina atu i le falemai, e fa’amautu ai le mea sa taatia ai le ua maliu i luga o le auala.  Faapea ma se molimau a se teineititi na iai i le taimi na tupu ai le faalavelave.

Ma mai ia molimau, na fa’ailoa mai ai e le afioga i le faamasino sili, e aunoa ma sona masalosalo, na oso ese le ta’avale a le na molia, mai i le aualatele, ma taia ai le tama matua, a’o savali i autafa o le auala i luga o le vao.

Sa fa’aalia foi e le afioga i le faamasino sili lona te’ena o molimau e faapea sa oso pe na tamo’e, le ua maliu, i luma o le taavale.  E le gata i lea, ua fai sina tuai o ni molimau po o faatinoga o le salamo, i tua mai o le ifoga.

I le iloiloga o se fa’asalaga mo Savaiinaea, sa amata mai le faitauga a le faamasinoga i masina e 24, to’esea ai lea ma taimi ua mae’a ona tuli i le falepuipui ma lona amio lelei fa’aalia, atoa ai ma le 8 masina na to’esea ona o le ifoga, ona totoe ai lea o masina e 10 mo lona faasalaga.

Ae peitai, sa saunoa Satiu, ona o talosaga ma aioiga mai i le aiga o le tama matua ua maliu, o lea o le a tu’uina atu ai se fa’asalaga fa’anofo va’ava’aia mo le ua molia.  

Sa ta’ua e le afioga i le faamasino sili, o se tasi o vaega taua i le iloiloga o se fa’asalaga ua tatau ma onomea, o le sailia lea o se fa’asalaga ua alagatatau mo le mafatiaga o i latou na a’afia faapea le atunu’u

Ae i le saunoaga a le uso o le tama matua ua maliu, sa fa’amalieina ai le finagalo a le faamasino sili i tu fa’aleaganu’u, ua fetaui le fa’asalaga ua tu’uina atu i le na molia ma lana sese ua fai.

Na saunoa foi le afioga i le faamasino sili, o le mafuaaga o le maliu o le tama matua, ona o l le le fa’aeteete o le aveta’avale a le ua molia, lea na oso ese ai lana taavale mai i le auala.  Ae ona o se sasi i sina taimi puupuu ma atonu e le’i iloa atu e le ua molia ia le tama matua i autafa o le auala, e pei ona sa ia ta’ua muamua.

E le i mafua lenei faalavelave ona o le saoasaoa o le taavale, e pei ona saunoa ai Satiu, po o le tagofia o ava malolosi po o nisi tulaga e pei o fualaau fa’asaina po o ‘ava Samoa.  

E 2 tausaga lea ua nofo va’ava’aia ai nei Savaiinaea faapea ma galuega po o sana auaunaga e faatino mo itula e 200.