TALA O LE PASEFIKA

PASEFIKA

MOLIA FAIPULE PNG I LE FA’AO’OLIMA, I TOTONU O AUSETALIA

Ua moia nei le Minisita o Suau’u a le motu o Papua Niu Kini, le susuga ia Jimmy Maladina, i le fa’ao’olima, ona o se fa’alavelave sa tupu i totonu o lona aiga, i Ausetalia.

E tusa ai ma fa’amaumauga a leoleo, o lo’o ta’ua ai le fa’ao’olima o se tamaloa e 58 tausaga i se tamaitai e 31 tausaga le matua, i le taeao o le aso To’onai i Ausetalia.

Sa fa’atulagaina e le faamasinoga se vaegatupe e tatalaina ai i tua Maladina, e faatali ai lona faamasinoga i le aso 11 o lenei masina.

I sana fa’aaliga fa’alauaitele, sa fa’ailoa mai ai e Maladina lona nofo manino i lipoti a vaega fa’asalalau ma o lo’o ia usitaia uma aiaiga o le tatalaina o ia i tua, ae le gata i lea, o lona malamalama i le tuga o lenei mataupu aemaise ai le avea o ia ma se taitai o le malo.

O lo’o ta’ua foi i lipoti a leoleo le afaina o le tamaitai i manu’a i ona foliga.

LOKA SE ALII SAINA I SAMOA ONA O LE TAUMAFAI E TOTOGI TAGATA FAIGALUEGA A LE MALO

Ua faatonuina nei e le alii faamasino o fa’amasinoga fa’aitumalo, le susuga ia Matautia Raymond Schuster, le toe fa’afo’i o se alii mai Saina, pe a mae’a lona fa’asalaga i le falepuipui, faatasi ai ma le tu’uina iai o sana sala tupe.

Sa molia lenei alii Saina i lona taumafai e totogi se tagata faigaluega a le malo, ina ia aveina ni taga loli e 202 faapea ma nisi o figota o le sami, e $1.8WST miliona lona tau, i Saina.

Na fa’atinoina e lenei alii Saina lenei solitulafono, ina ua taofia e le Minisita o Tiute ma Tupe Maua (M.C.R)  ia le aveina atu i fafo o lenei uta tele.

Ua ioe nei ia Qinping Yan i ona moliaga, ona o lenei fa’alavelave na tula’i mai ia Aperila 2020.  E tusa ai ma se lipoti a le Samoa Observer, na o’o atu le alii o Yan i le maota o le Faatonusili o le M.C.R ma se tinoitupe e $5000, ina ia mafai ona kilia lana koneteina e aunoa ma le su’esu’eina.

E 12 masina sa fa’asalaina ai Yan i le falepuipui, ae to’esea ai le ono masina ua mae’a ona lokaina ai o ia.  Faatasi ai ma sana sala tupe e $130,000WST, ma a mae’a lona fa’asalaga i le falepuipui, o le a faapea loa ona toe fa’afo’i o ia i lona atunu’u i Saina.

ATOA LE TO’ALIMA O TAGATA TA’A’ALO A PAPUA NIU KINI MO LE OLIMIPEKA

Ua fa’amaonia mai e le malo o Papua Niu Kini ia nisi o ana tagata ta’a’alo se to’alua, ua tapenapena atu nei mo le Olimipeka i Paris, ina ua pasia mai e le komiti a  le lalolagi o ta’aloga i totonu o le vai (World Aquatics) ia se alii ma se tamaitai a’au.

Ma ua atoa ai nei le to’alima o i latou o le a auai atu i le Olimipeka e fai ma sui o Papua Niu Kini.

O le alii o Josh Tarere ma le tamaitai o Georgia-Leigh Vele ua to’alima iai ‘au ta’a’alo a Papua Niu Kini.

E pei ona fa’ailoa atu e le peresetene o vaega ‘a’au a Papua Niu Kini, le tu’uto o Josh ma Georgia i a la toleniga i le ova ma le tausaga.

O Josh o le a tauva i tu’uga ‘a’au o le 100maila ‘freestyle’ i le aso 30 o Iulai, ae o Georgia o le a tauva i le tauvaga ‘a’au 50 maila ‘freestyle’ i le aso 8 o Aukuso.

 O isi o i latou ia o le a faimalaga atu i le Olimipeka, e aofia ai Morea Baru lea o le a tauva i le vaega si’isi’i u’amea mamafa, faapea ma Gibson Mera ma Kevin Kassman lea o le a tausinio mo se pine auro i le fa’agatama o le ‘taekwondo’.

Ae o lo’o fa’atalitali nei Papua mo le fa’amaonia mai o se tasi o a latou tagata ta’alo lea e faamoemoe e tauva i tu’uga tamo’e, o Leonie Beu.

MANUMALO LE TAMAITAI O RACHEAL GUTTENBEIL I LE TAUVAGA TAUSALA A TONGA

O le po o le aso Faraile na se’i mavae atu nei, Iulai 5, 2024 (i Tonga), na faapaleina ai le tamaitai e 26 tausaga, o Racheal Angelica ‘o Manakakapu Guttenbeil, e avea ma le Tausala 2024 a Tonga, po o le Miss Heilala.

O Guttenbeil na soifua mai i le motu o Vava’u ma ona aiga i Ha’apai ma Siamani.

E lua ni vaega tauva sa manumalo e le Tausala fou, o le la’ei fa’asavili ma le  vaega o siva faa Tonga.  Na tulaga lua o ia i le vaega o taleni faapea ma le vaega o fesili ma tali, lea e fa’ataunu’uina i le fa’aiuga o le tauvaga.

Na ia mauaina foi le fa’ailoga o le ‘Miss Popularity’.

O Guttenbeil na fa’au’u mai i le Iunivesite o le Pasefika i Fiti, ia Aperila i le ‘Bachelor of Law’ ma le ‘Bachelor of Commerce’.  O lo’o ia umia foi se fa’ailoga fa’aLoia ma o lo’o fa’atalitali mo le fa’aulufaleina o ia i le li’o o Loia ma Faamasino, i le faaiuga o lenei tausaga.

I le faapaleina o ia e avea ma Miss Heilala, sa maua ai e ia fa’ailoga tupe e $10,000 (tupe Tonga), faapea ma le tele o isi fa’ailoga.

Ua nofo saunia nei Guttenbeil mo le tauvaga Tausala o le Pasefika, e avea ma sui o le malo o Tonga.

LUA MASINA TALU LE SOLO TELE I PAPUA NIU KINI

Ua lua nei masina talu le solo tele i le a’ai o Yambali i Papua Niu Kini, ae o lo’o tau saili pea ni nofoaga e faamautu ai nisi o tagata o le atunu’u, sa fa’aleagaina ma tanumia o latou fale.

Ua o’o atu le fuainumera o i latou na maliliu i lenei fa’alavelave, i le faitau selau ae faitau afe i latou, o lo’o fa’aauau pea ona nonofo ma aiga i a’ai tuaoi po o totonu o fale’ie mai i vaega lavea’i.

Sa fa’aalia e le fa’atonusili o le vaega a le CARE International, le susuga ia Justine McMahon, le fa’afaigata ona saili o ni fanua e mafai ona fa’amautu iai i latou ua leai ni fale po o ni nofoaga e nonofo ai.

Sa ta’ua e McMahon le fa’aauau pea ona tele fa’afitauli o lo’o tula’i mai i taumafaiga e saili ni nofoaga mo aiga ona o fete’ena’iga i tulaga tau fanua.  Sa ia ta’ua le fa’aeteete gata o mataupu tau i fanua, ae o lo’o taumafai nei le malo e fa’amama ni fanua e tu lata i le nofoaga na solo ai le mauga, ina ia mafai ona fau ai ni fale mo tagata o le atunu’u e fa’amautu ai.