TALA MAI SAMOA

Apia - SAMOA

FA’APAIAINA FANUA MO OFISA FOU

O le aso Tofi o le vaiaso ua mavae, sa faapaiaina ai le fanua i Mulinu’u e saunia mo le fausiaina o le ofisa fou mo le Fale Fono, lea o lo’o faatupeina e le Malo o Ausetalia, e pei ona sa fa’alauiloa mai i le 2019 ina ua mae’a le faaulufalega o le Fale Fono fou, lea foi se faatupeina e le malo o Ausetalia.

E tusa ai ma se lipoti mai i le Samoa Observer, sa auai fa’auluuluga o ofisa taitasi, faapea sui o le Fono, taitai sinia o le malo faapea sui mai i le kamupani a le Reeves International Pty Ltd., i le faamoemoe i le taeao o le aso Tofi.

O le tau o lenei galuega, o lo’o taumateina i le $30miliona tupe Ausetalia ma e le o se tupe aitalafu mo le malo o Samoa.

O le afioga i le Palemia ia Fiame Naomi Mata’afa sa faaleoina le agaga faafetai i lenei foai tele mai i le malo o Ausetalia aua le atina’eina o sini faatuina a le malo o Samoa.

I le saunoaga a le Komesina mai Ausetalia, le susuga ia William Robinson sa ia ta’ua ai lona manatunatu i le taua o lea lava aso, aemaise ai le aofia potopoto i fanua pa’ia i Tiafau.

O lo’o faamoemoe o le a faamae’aina lenei galuega ia Aperila 2026, ae e le’i faia leisi palota a le atunu’u.

MAUAINA E SNPF $400K MAI LE MU I LE AMATAGA O LE TAUSAGA

Ua taulimaina nei e le SNPF (Samoa National Provident Fund) ia se vaegatupe e $400,000 (tupe Samoa) mai i le ofisa inisiua a le FedPac (Federal Pacific Insurance), talu ai le fa’aleagaina o se vaega o le fale a le SNPF lea o lo’o iai le maketi a Frankie, ina ua mu i le amataga o le tausaga.

O le susuga ia Namulauulu Papalii Sami Leota, na avea ma sui o le ofisa inisiua a le FedPac, e tauaaoina atu le siaki i le aso Faraile o le vaiaso ua mavae, i le susuga ia Vanita Fanolua, lea na avea ma sui o le SNPF.

Na fa’aalia le agaga fa’afetai o Lemalu Selesitina Reti, le pulesili a le SNPF i le FedPac ona o lana tautua ma le fesoasoani malosi, ua i’u manuia ai lenei taumafaiga.

Ua mafai nei e le SNPF ona amata galuega e toe lipea ai la latou fale.  Ae ua mae’a ona maua e le faleoloa a le Frankie ia le latou tupe aua oloa ma nisi tulaga sa faaleagaina i le afi.

O le ulua’i manatu sa iai, e faapea na mafua lenei mu ona o se tagata, ae peitai, i suesuega a le Vaega Tinei Mu, sa mafai ona faamaonia ai, na mafua lenei fa’alavelave ona o uaea eletise.  Na tupu lenei faalavelave ina ua tele ina gaogao ofisa i le po.

FA’AMAVAE LE MISS GLOBAL SAMOA

O le aso Lulu o le vaiaso ua mavae, sa fa’alauiloa mai ai e le tamaitai o Rosevellaryn Odile Brown Fane, lea na faapaleina o le Tausala a le Miss Global Samoa 2024, lona faamavae mai i ona tiute, ona o ona tiute fa’aalegaluega ma nisi o tulaga le ma’alofia.

Sa fa’aalia e Rosevellaryn, e le o se faaiuga faigofie ua ia faia, ae sa ia fa’aalia lona agaga fa’afetai ona o le avanoa sa ia maua, i le masina talu na faapaleina ai o ia ma ia fa’aalia lona lagolagoina o le Tausala fou.

I se faamatalaga mai i le Pulesili o le Vodafone Samoa, o Rana Bose, i su’esu’ega a le Samoa Observer, sa ia fa’amaonia ai le faamavae o Rosevellaryn ma ia faalia le faatinoina e le tamaitai o ona tiute uma a’o avea ai o ia ma Miss Global Samoa.  Sa fa’aalia e Bose le agaga fa’afetai i le lototele ma le tu’uto o Rosevellaryn e tusa ai ma lana faaiuga ua faia, aemaise ai, le taliaina e Vodafone Samoa o lana faaiuga.

E tusa ai ma tulafono o le tauvaga, ua avea nei le tamaitai o Nicolina Ah Kuoi, lea sa tulaga lua i le tauvaga, e avea ma Tausala fou ma ua mae’a ona feso’ota’i atu Vodafone ia Nicolina e tusa ai ma le suiga fou ua tulai mai.  Afai ae taliaina e Nicolina le tofi, o le a faapea ona auai atu o ia i ni a’oa’oga i Filipaina ia Setema 25-30.

O lo’o ua iai se faamoemoega, o le a toe faapaleina se Tausala fou a le Miss Global Samoa 2024 i le faaiuga o lenei masina.