TALA O LE PASEFIKA

PASEFIKA

FESOASOANI MALO IAPANI I MOTU O LE PASEFIKA

E tusa ai ma se fa’aaliga mai i vaega fa’asalalau a Iapani, ua ta’ua ai le nofo saunia o le alii palemia ia Kishida Fumio e fa’aleoina i le fonotele a taitai o le Pasefika lea ua fuafuaina e faia i Tokyo i le masina fou, ia se fuafuaga ua fa’ata’atia nei, e le malo o Iapani, e ala lea i le galulue faatasi ma motu o le Pasefika, i fa’amaumauga i tala o le tau.

O le a faapea ona galulue faatasi ia le malo a Iapani ma motu o le Pasefika, e ala i le fa’ao’oina mai e le malo o Iapani ia faamaumauga mo le nofo tapenapena o tagata o le Pasefika i taimi o fa’alavelave faafuase’i, e pei o afa ma galulolo.

Ma o le a amataina lenei polokalama fou, e ala i le fa’ao’oina atu o nei ituaiga faamaumauga ma lipoti i le malo o Fiti.

PASIA FALETUPE A ASIA $41 MILIONA MO NISI O MOTU O LE PASEFIKA

Ua ripotia mai le pasiaina e le Faletupe o Atina’e a Asia ia se vaegatupe e $41 miliona, e faatupeina ai se fesoasoani mo nisi o motu o le Pasefika, e aofia ai le atu Kuki, atu Malesala, Micronesia, Tuvalu ma Vanuatu, ona o tulaga pagatia o lo’o feagai ma nei motu, ona o fa’alavelave fa’afuasei faalenatura.

O lenei tupe e auala mai i se vaega lona lima o le polokalama o le ‘Pacific Disaster Resilience’.

Na ta’ua e le Faatonusili Aoao a le faletupe, ia Leah Gutierrez, i taimi o fa’alavelave fa’afuase’i, e fesoasoani lenei polokalama i malo e a’afia.

U’UNA’IA TAITAIFONO KOMITI FAAFOE O AOGA A VANUATU LE FAALELEIA O FALE AOGA

I se manatu fa’aalia a le taitaifono o le komiti faafoe o Aoga a le malo o Vanuatu, le susuga ia Kalmet Kasso, e pei ona lomia e le Vanuatu Daily Post, sa ia fa’aalia ai lona atugalu ona o fanau aoga o lo’o fa’aauauina a latou a’oa’oga i totonu o falea’oga sa fa’aleagaina i le afa o Harold i le 2020.

Ma ua fa’apea ona ia talosagaina le malo ina ia toe fa’aleleia faleaoga a le aoga a Lycee de Luganville, i se taimi lata mai, ona ua fa tausaga talu ona faaleagaina nei faleaoga.

Ae ua fa’alauiloa mai e le Minisita o Aoga, ua lata mae’a fuafuaga mo le filifiliga o se kamupani e fa’atinoina le galuega e pei ona finagalo ai Kasso.

O le tau atoa o lenei galuega, e silia ma le $200 miliona tupe Vanuatu.

POLOKALAMA TAU FA’ATOAGA I PALAU

Ua amata fa’agaioia nei se polokalama fou i le malo o Palau, aua se taumafaiga ina ia fa’aleleia atili tulaga o fa’ato’aga ma galuega a faifa’ato’aga.

O lenei polokalama fou, o le a mafai ona agava’a ai faifa’atoaga i se vaegatupe e 1/3 o le tau o fagafao mai i a latou fa’ato’aga.

O le a aofia ai foi ma mea’ai mo manu o le fa’ato’aga faapea ma nisi o tulaga mana’omia e faifa’ato’aga, e pei o fatu la’au.

Ua fa’alauiloa mai e le Minisita o Fa’ato’aga ia Steven Victor, le mae’a ona lesitala o ni faifaatoaga e to’a 39 mo lenei polokalama, lea o lo’o faatupeina i lafoga mai i tapa’a ma ava malolosi.

LOKA E FUAVA’A A FIJI IA VA’A FAGOTA SOLIA TULAFONO GATAIFALE

Na lipotia mai e le vaega fa’asalalau a le fijivillage.com, le pu’eina e le fuava’a (Navy) a Fiti le tele o va’a fagota o lo’o masalomia i le solia o tulafono tau fagotaga, e ala i lo latou fa’aaogaina o mea faapapa (dynamites).

O lo’o galulue faatasi fuavaa a le malo o Fiti ma ona ofisa ‘ese’ese e aofia ai le ofisa a leoleo, i lenei faamoemoe.