Talia e le malo se foa’i alofa mo le fa’aleleia atili o auaunaga tau i le soifua maloloina mo le atunu’u

Pago Pago - AMERIKA SAMOA

O le aso Tofi o le vaiaso ua mavae, Iuni 27, 2024, sa aofia potopoto ai i le ‘Goat Island Café’ i Utulei ia nisi o taitai o le malo mo le taliaina o se foa’i alofa mai i le faalapotopotoga ua ta’ua, o le ‘Leona M. and Harry B. Helmsley Charitable Trust’, aua le fa’aleleia atili o auaunaga faalesoifua maloloina, mo tagata o Amerika Samoa.

O le afioga ia Loa Tuimavave Laupola, lea o lo’o fa’auluulu iai le aufaigaluega a le faigamalo, sa avea ma sui o le afioga i le kovana Lemanu P. S. Mauga, faapea le faigamalo a Amerika Samoa, e taliaina lenei foa’i alofa.

O le afioga i le Faipule ia Faimealelei Anthony Allen sa avea ma fofoga o le taeao, e ala i le fa’afeiloaia o malo fa’aaloalogia, le susuga ia Walter Panzirer ma le faletua ia Tina.  O Panzirer, o se tasi o taitai o le ‘Helmsley Charitable Trust’ ma o se alo e faasino ia Leona Helmsley, lea sa faavaeina lenei faalapotopotoga.

I lana saunoaga, sa ta’ua ai e Panzirer, o le sini po o le faamoemoega a le latou faalapotopotoga, ina ia faatutusa uma tulaga o tautua tau i le soifua maloloina ma ia mauaina e tagata o le atunu’u ia masini taua ma le aoga mo le tausiga o le soifua maloloina.

O lenei faalapotopotoga ua atoa le 15 tausaga o la latou tautua ma ua lata i le iva (9) setete o Amerika, ua o’o atu iai le latou auaunaga.  E pei ona sa ta’ua e Panzirer, ua silia ma le $700 miliona, ua mafai ona o latou foa’iina i ia setete, e fesoasoani ia tutusa tulaga o tautua mo le tausiga o le soifua maloloina, i atunu’u le tagolima ma malo tetele.

Sa ta’ua foi e Panzirer le o’o atu o lipoti i fa’afitauli o lo’o feagai ma le malo o Amerika Samoa i la latou falemai faapea le ofisa o le soifua maloloina, ma o le tausaga ua tuanai, na o latou asiasi mai ai e va’ava’ai ma sailiili le mafuaaga o nei faafitauli.  Sa mafai ona o latou feiloai ma taitai o le falema’i autu a Amerika Samoa (LBJ), o taitai a le Ofisa o le Soifua Maloloina faapea ma taitai o le malo

E le gata i lea, sa maua ai foi le avanoa e feiloai ai Panzirer  ma talatalanoa ma le toatele o tagata, e tusa ai ma faafitauli o lo’o feagai ma tagata o le teritori.

Sa ta’ua e Panzirer le fa’ate’ia o ia ma lona fa’anoanoa tele, ona o le fa’agaloina e le Malo Tele o sa latou teritori.  I sona talitonuga, e le o se tulaga sa’o lea mea.  Ma o le mafuaaga lea ua o latou filifili ai e faia lenei foa’i.  

Ma sa ta’ua foi e Panzirer, o so’o se taimi lava e filifili ai e le latou faalapotopotoga ia se setete po o se malo e latou te galulue fa’atasi, e le o se mafutaga pu’upu’u, ae o se so’otaga umi, ma i lena taimi, o le a tele ni auala o le a mafai ona fesoasoani mai ai la latou faalapotopotoga.

Ma sa faapea ona fa’alauiloa mai e Panzirer ia ni vaegatupe se lua ua saunia la latou faalapotopotoga, e foa’i mai mo Amerika Samoa.  Ma o le aofaiga o lenei foa’i, e $3.2 miliona.

O le vaega muamua o lenei foa’i, e mo le LBJ, e faatauina ai se masini (MRI), ina ia mafai ona fesoasoani i le LBJ, mai i le fa’aaluina o tupe e aveina atu ai tagata o le atunu’u i fafo aua lenei tautua.  E le gata i le tele o tupe e fa’aaluina mo le aveina atu o tagata o le atunu’u i fafo, ae o le umi e tu’ua ai e tagata o le atunu’u ia aiga, aua a latou talavai.

Ae i le faatauina o lenei masini, o le a mafai ona fa’atino ai lenei auaunaga i totonu o le atunu’u.

O leisi vaega o lenei foa’i, o le a faapea ona tuuina atu i le Ofisa o le Soifua Maloloina, ina ia mafai ona atina’eina polokalama puipuia mo tagata o le atunu’u.  Ae peitai, o lo’o manaomia pea ona faimalaga atu tagata o le atunu’u mo nisi o togafitiga i atunu’u i fafo.  Ma o lenei foa’i, o le a faatauina ai ni masini (Ultrasound) se sefulu (10) faapea ma ni masini X-Ray se sefulu (10), e tufatufaina i falema’i tua ina ia mafai ona fa’afaigofie i tagata o le atunu’u, e le tau o mai mamao i le LBJ.

Na saunoa foi Panzirer, o lenei foai, ua na o se amataga lea, o le a tele nisi fesoasoani ua saunia la latou faalapotopotoga e tu’uina mai mo Amerika Samoa mo le fa’aleleia atili o lana tautua tau i le soifua maloloina.

I lana saunoaga faafetai, sa fa’amanatu mai ai e le afioga Loa ia le fetalaiga a le Aposetolo o Paulo, e uiga i le Alofa, Faamoemoe ma le Faatuatua, ae o le sili o nei mea uma, o le Alofa.  O le autu lea o le fa’atasiga i lea aso.

Na fesiligia e Loa le mafuaaga ua filifilia ai e lenei faalapotopotoga ia Amerika Samoa.  Ma sa ia saunoa e faapea, ua mafua, ona o le alofa.  Ma ua toe fo’i mai lenei faalapotopotoga e fesoasoani i le fa’aleleia atili lenei auaunaga, e le gata i le LBJ ae faapea foi le DOH.