Auina mai e alo o Samoa o lo’o ta’alo ma sa ta’a’alo i le NFL ia se upu taua mo fanau a’oga a le teritori

Pago Pago - AMERIKA SAMOA

E silia ma le to’a 200 fanau a’oga o le atunu’u, i totonu o a’oga maualuluga faapea a’oga tulaga muamua, sa mafai ona faalogologo ma fa’afofoga i ni tima’iga ma ni upu taua mai i le alii ta’alo faapolofesa, i le fa’agatama o le lakapi Amerika (football), le susuga ia John Sherman ‘Juju’ Smith-Schuster, i le aso Lulu, Iuni 26, 2024.

Sa faatumulia le malae ta’alo a le malo (Veterans Memorial Stadium), i taitai o le malo, ekalesia, ta’ita’i o ta’aloga e aofia ai ‘coaches’ mai i a’oga ‘ese’ese o le teritori faapea malo fa’aloalogia ma ma’au mai i Amerika, na aofia ai ‘Juju’, Seiuli Jesse Sapolu faapea ma Ma’a Tanuvasa, aua le fa’ataunu’uina o se a’oa’oga tau ta’aloga (football), lea sa fa’atulagaina so’otau’au ai le faalapotopotoga a le PFHF (Polynesian Football Hall of Fame) ma le malo a Amerika Samoa.

O le alii ta’alo ia Juju sa aumaia e le PFHF e avea ma a latou sui faapitoa i lenei a’oa’oga ma sa ia mauaina foi se avanoa e fa’asoa atu ai i alo ma fanau o le atunu’u ni mataupu e mafai ona fesoasoani i lo latou tuputupu a’e.  O se tasi o nei taua mai i lenei alii ta’alo, na aofia ai lana fa’asoa mai i auala na fesoasoani ai lenei fa’agatama ia te ia, ma lona aiga.

I lana fa’asoa mai, sa faamamafaina ai e Juju le taua o le finafinau.  Ma e pei ona sa ia ta’ua, e le o se mea faigofie le avea ma tagata sili atu, i aso uma.  Ae o i latou manumalo, e pei ona sa fa’asoa mai e lenei alii ta’alo, o i latou e toe tula’i i taimi uma e pa’u’u ai i lalo. 

Sa fa’aalia e Juju le avea o lenei fa’agatama ma fa’amanuiaga i lona olaga.  E pei ona sa ia fa’asoa mai i fanau a’oga a le atunu’u, o se avanoa lenei e mafai ona si’itia ai tulaga o aiga ma le olaga, ae e taua le tu’uto, taulaga ma le fa’atuatua i le Atua atoa ai ma le lelei o togi i totonu o a’oga ma vasega.

Sa ia toe faamanatu atu i fanau aoga, le taua o le maua o togi lelei i totonu o aoga, aua e le mafai ona ta’alo ‘football’ seisi pe a le lelei lana ‘GPA’.

Na fa’asoa atu foi Juju i lona tuputupu a’e i totonu o se aiga Samoa ma le ala na mafai ai ona fesoasoani le aganu’u i lona olaga, ona o le alofa sa ia mauaina i totonu o lona aiga talu mai lona laititi.

I ona tomanatunatuga, sa ta’ua ai e Juju i taimi o lo’o tuputupu a’e, sa le tele se tupe a le latou aiga ma e masani ona fesuia’i a latou se’evae ma ona tuafafine.  Ae o le taimi nei, ona o le taulaga ola a si ona tina, e ala i le aveina o ia i ana ta’aloga i aso uma, lea ua mafai ai ona ia mauaina so’o se tulaga e mana’omia e lona aiga.

Sa fa’aleoina e lenei alo o Samoa ia lona agaga fa’afetai i le Atua mo lenei avanoa ua ia maua, e mafai ai ona fesoasoani i lona aiga, ona o la latou lagolago malosi ia te ia ma ana taumafaiga, mai lava i le amataga.

Na fa’aalia foi le agaga fa’afetai o lenei atalii i si ona tama, le susuga ia Lawrence Schuster, ona e ui ina fa’ato’a ulufale mai o ia (Schuster) i lona olaga i le 4 o ona tausaga, ae peitai, sa avea o ia ma se matua (faatasi ma si ona tina o Sammy Toa-Schuster), o se fa’ata’ita’iga lelei ma se uo ia te ia.  

E le gata i lea, sa faaleoina foi e lenei alo o Samoa ia lona agaga fa’afetai i ona tua’a ona o la latou alolofa ma le lagolagoina o ia i lona tuputupu a’e, aemaise ai o le aganu’u.

Sa ia faamanatu atu foi i alo ma fanau o le atunu’u, ina ia aua ne’i o latou fa’agaloina le Atua ma le Fa’aola.

O le tua’a o Juju, le susuga ia Lawrence Schuster, e malaga mai i Laulii ma Apia, ae o si ona tina sa soifua a’e o ia i Kalefonia, ae o lona aiga e malaga mai i Taputimu.

I se fa’atalatalanoaga ma le tina ia Sammy Toa-Schuster, sa ia fa’aalia lona agaga fa’afetai i le Atua ona o Lona alofa ma lana taitaiga ua mafai ai ona i’u manuia si ona alo.

Na saunoa le tina ia Sammy, o se faamanuiaga le molimauina o le tino mai o se miti, talu mai lava le 4 tausaga o si ona alo, sa masani ona fetamoea’i ma se polo ‘football’, e fa’afoliga mai o lo’o ta’alo i le NFL.

Sa ta’ua foi e lenei tina lona a’oa’oina o ona alo, e aofia ai ma Juju, e pei ona sa aoaoina o ia e ona tua’a, i le fa’aaloalo i tagata matutua, o le tautua i isi.  Sa ia fa’aleoina foi lona agaga fa’afetai ona o lea ua iai si ona alo i se tulaga, e mafai ona fesoasoani malosi i fanau talavou, e pei ona o latou faimalaga mai ai mo lea faamoemoe sa faatunuuina i le vaiaso ua mavae.

I sina fa’amatalaga e uiga i lo latou, sa ta’ua e Sammy lo la fa’atasi ma le tama o le aiga, le susuga ia Lawrence Schuster, i le na’o fa o tausaga o Juju ma e na’o le pau lea o le tama na ola a’e ai lona alo.  Ma i le valu o ona tausaga, sa mana’o Juju e tauaveina le fa’ai’u o Schuster, ae o le taimi lea, sa le’i mafai ona faia ona e la’ititi o ia.

Ma i le 18 o ona tausaga, sa fa’ataunu’uina ai loa mana’oga o Juju, e ala i lo latou agai atu i le faamasinoga ma faia loa tulaga faaletulafono, e fa’aopoopo ai le fa’ai’u ia Schuster.

Na soifua mai le alii o ‘Juju” i le aso 22 o Novema 1996 i le a’ai o Long Beach, i le setete o Kalefonia i Amerika.  

O ia o le lona lua o se fanau e to’afitu.  Ma na amata mai lava ona ta’alo o ia i lenei fa’agatama o le ‘football’, i le valu o ona tausaga.  Ma na mafua ona fa’aigoa o ia ia ‘Juju’ ona o se igoa tauvala’au a se tasi o ona Aunty.

I le aso sa fa’ataunu’uina ai lenei polokalama i le vaiaso ua mavae, sa faapea ona foa’iina ai foi e le susuga ia Seiuli Jesse Sapolu, o se alo foi o le teritori ua lauiloa i lenei fa’agatama o le ‘football’ ma o ia o se tasi, sa faavaeina le PFHF (Polyneisan Football Hall of  Fame), i le Ofisa o Aoga, ia ni ‘laptops’ se sefulu.

Na fa’asoa mai Seiuli i le Samoa News, na amata lava ona ia malaga mai i Amerika Samoa mo le faataunu’uina o nei a’oa’oga tau ta’aloga, a’o avea Lutali ma kovana.  Ma sa ia ta’ua le taua o le aumaia o alo ma fanau a le atunu’u o lo’o i totonu o le NFL, ina ia o latou taga’i ma va’ava’ai foi i le taua o nei polokalama ae le gata i lea, o le toe foa’i atu i le atunu’u, e ala i lo latou o’o mai ma fa’asoa, fautua ma u’una’ia alo ma fanau o le lumanai.

Sa ia faamatalaina foi le tele o le eseesega ua iai nei vaitaimi pe a faatusatusa atu i vaitaimi ua tuanai.  Ma e taua tele fautuaga ma lapataiga mai o latou uso matutua o lo’o ta’a’alo i totonu o le NFL po o Kolisi, i mea e ao ona latou nofo sauniuni ai, ma tulaga e ao ona latou alo’ese mai ai, ina ia mafai ona faamanuiaina i latou i lo latou tausinioga mo le NFL.

I le mae’a ai o la latou polokalama i le aso Lulu, sa faapea ona o latou faimalaga atu i Ausetalia, tauala atu i le motu tuaoi o Apia.