Molia se alii 27 tausaga i lona fa’ao’olima i se alii na fa’auo ma lona tuafafine

Pago Pago - AMERIKA SAMOA

Ua ta’ua i fa’amaumauga a le malo le o’o atu o se alii ma sana uo teine i le Ofisa a Leoleo i Tafuna i le po o le aso 18 o Me, 2024, e fa’aulu sa la tagi e faasaga i ni alii se to’atolu na o latou fa’ao’olima i le alii, a’o la iai i le falekalapu a le Flame.

E tusa ai ma su’esu’ega a leoleo, na fa’amaonia ai le faatupu vevesi o le susuga ia Viliamu Ulusele i le falekalapu, e ala i lona tu’iina o le na a’afia.

O le lipoti a le na a’afia ma lana uo teine, lea na o’o atu i le ofisa a leoleo, e faapea, na alu i fafo le na a’afia e ula sana sikaleti, ae osofa’ia ai o ia e ni alii se to’atolu.

Sa ta’ua e le uo teine, e na te le iloa pe na faapefea ona amata le misa, ae e liliu atu, ua ta’atia lana uo tama (le na a’afia) i lalo ae ua tamomo’e ese le aualii e to’atolu.

O le faamatalaga a le na a’afia i leoleo, sa ia ta’ua ai le faate’ia o ia ona o le mea ua tupu.  Sa ia ta’ua e faapea, na alu i fafo mai i le falekalapu, e ula sana sikaleti, ae li’o ai o ia e ni alii se to’atolu.  Sa u’u le kola o lona ofu e le alii sa tu i ona luma, ae tu’i mai ia tua o lona ulu e leisi alii ma matapogia ai.

Sa ta’ua foi e le na a’afia, e na o le pau le tulaga sa ia manatua, o foliga o se tasi o alii nei e to’atolu, o le susuga ia Viliamu Ulusele mai i Laulii.

Na fa’afeso’ota’iina foi e leoleo ia le vaega a le EMS mo le togafitia o manu’a o le na a’afia

Sa iai seisi molimau na mafai ona fa’atalanoaina e leoleo, o se tamaitai na savali atu i fafo o le falekalapu i le taimi tonu lea na fasi ai e alii nei e to’atolu ia le na a’afia.

Sa faamatala e lenei molimau lona tamo’e atu e taumafai e fesoasoani i le na a’afia.  Sa faamautuina foi e le molimau lona lua, o le tagata sa tu’iina le na a’afia, o Ulusele. Sa ta’ua e le molimau, o le tuafafine a Ulusele sa masani ona fa’auo ma le na a’afia.

Na agai atu leoleo i le falekalapu i lea lava afiafi mo le tau sailiga o Ulusele ae peitai, e le’i mauaina o ia.

Ae o le taeao na soso’o ai, na mauaina ai loa Ulusele ma aveina atu i le ofisa a leoleo mo le faia o ona suesuega.

E tusa ai ma le molimau a Ulusele, a’o ula sana sikaleti i fafo o le fale kalapu, na savali atu le na a’afia ma fesiligia o ia po o le a le umi na toe fo’i mai ai i Amerika Samoa.  Ma sa faia se la talanoaga, ae na amata ona si’isi’i le leo o le na a’afia, e foliga mai e fia fusu.  Sa ta’ua e Ulusele lona iloa o lo’o fia fusu le na a’afia, o le mea lea na ia tu’iina ai o ia ma matapogia ai.

Sa ta’ua foi e Ulusele, sa savali ese o ia, ae na ia toe tepa mai i tua, o lo’o fa’aauau ona fasi e se alii e igoa ia ‘Duki’ ma ona tausoga, ia le na a’afia.  Ma o le mea lea na ia toe savali atu ai ma faatonuina i latou, ua lava ma latou o ese ai loa.

E tusa ai ma le faamatalaga a Ulusele, na mafua lenei faalavelave ona o se tulaga na tupu i le va o le na a’afia ma lona tuafafine.  O lo’o ua taofi Ulusele, sa sauaina e le na a’afia ia lona tuafafine laititi ae e le’i malaga atu i atunu’u i fafo.

Ua molia nei Ulusele i moliaga e lua;

Faitauga 1:  Faatupu Vevesi i nofoaga faitele – o se vaega ‘B’ o solitulafono mama, e mafai ona nofosala ai i le ono masina po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai i le o’o atu i le tausaga, po o se sala tupe e $1,000; po o faasalaga uma e lua.

E $2,000 le vaegatupe sa faatulagaina e mafai ona tatalaina ai le ua molia, e faatali ai lona faamasinoga.