TALA I VAIFANUA

Pago Pago - AMERIKA SAMOA

MANATUAINA SE TASI NA AVEA MA FAATONUSILI O UAFU MA MALAEVAALELE

Ua fa’aigoaina nei e le PacIOOS (Pacific Islands Ocean Observing System) ma ana pa’aga ia se pine (buoy) o lo’o i gatai o Poloa, o le ‘King-Poloa Buoy”, e manatuaina ai le susuga ia Christopher J. King, lea ua fa’ilagi le folauga.

O le susuga ia King sa avea ma Faatonusili o Uafu ma Malaevaalele, a’o soifua o ia.

Ma ua avea le fa’aigoaina o lenei pine ia te ia, ma auala e manatuaina ai ma aloaia ai lana tautua i tagata o le atunu’u.

O le susuga ia King o se tagatanu’u o Amerika Samoa ma o lona aiga e mai i le afioaga o Poloa, ma ona o lona tofa mamao ma le faautautaga loloto sa mafai ai ona filifilia le nofoaga ua taoto ai nei lenei pine, ma faasaoina mai ai i le tele o faafitauli.

E manatuaina pea o ia i le tele o ana galuega lelei sa faia mo le atunu’u, e aofia ai lona tu malosi i le puipuiga o le gataifale, faamautuina o faamaumauga e uiga i le gataifale, aemaise o le a’oa’oina o tagata e uiga i le gataifale.

TALOTALOGA A LE FAIGAMALO FAATAUAINA ASO FAASAGATAU I FUALAAU FAASAINA

O le taeao o le aso Lulu na se’i mavae atu nei, sa faataunuuina ai se talotaloga a tagata faigaluega mai i ofisa ma matagaluega ‘ese’ese a le malo o Amerika Samoa, e aloaia ai le aso ua ta’ua o le ‘World Drug Day Wave’.

O lenei gaioiga e toe faamautuina ai le tu’uto a le faigamalo ina ia fa’asagatau i le tagofia ma le fa’atauina atu o fualaau faasaina, aua le fausia o se atunu’u saogalemu ma le maloloina.  O le taimi nei, o lo’o faapea ona lutia le atunu’u i peau fita o le lolofi mai o fualaau faasaina o le Aisa i totonu o le atunu’u ma ua tele ina a’afia ai aiga ma tagata o le atunu’u.

Aemaise ai le leai o se polokalama e mafai ona sulufa’i iai le atunu’u (local rehab).

I le saunoaga a le afioga i le kovana, Lemanu P.S. Mauga, i le talotaloga i lea taeao, sa ia ta’ua ai le “tulaga ese o lenei taeao, lele ua faailo tulaga o le aso ma lona faamoemoe, le taua o le taumafai e aveese ia fualaau faasaina mai alo ma fanau o le atunu’u, ma i tatou.”

Na saunoa Lemanu, o le pogai o lenei faamoemoe, “e ta’u o fanau talavou, ae a’afia ai foi ma tagata matutua.”

“Ia tautuana ma tatou, fa’aauau le feau i tua atu o le talotaloga, i matagaluega, ofisa, aiga ma ekalesia.  E le o  e galuega na o le faigamalo.  O galuega a aiga, nu’u ma afioaga faapea ekalesia.”

ASIASI MAI SUI O LE PIF I AMERIKA SAMOA

O lo’o iai nei i Amerika Samoa ia sui o le Faalapotopotoga o Motu o le Pasefika (Pacific Islands Forum-PIF), aua le faia o sa latou iloiloga lotoifale, e mataituina ai auala o lo’o ‘au tasi ai le faigamalo, polokalama ma tautua a Amerika Samoa ma le misiona a le PIF.

O le aso Lua sa faapea ona auai atu ai le faigamalaga i se sauniga lotu sa faataunu’uina i le potu fono a le Ofisa o le Kovana ma sa faapea foi ona fa’afeiloaia aloaia i latou e ala i se Ava o Feiloaiga.