Fa’afefe i se agaese ina ua tatu’u i lalo niu o le tuaoi

Pago Pago - AMERIKA SAMOA

O le aoauli o le aso 4 o Me, 2024 na fa’afeso’ota’i ai e se alii mai i Aasu ia le Ofisa a Leoleo i Tafuna, e lipotia sona tuaoi, le susuga ia Fa’afetai Talia, i le faaleagaina o le faitoto’a o lona fale, i se agaese.

E tusa ai ma le faamatalaga a le na a’afia, ina ua taunu’u leoleo, a’o latou iai i lona fale, ma lona tuafafine ma le to’alua a lona tuafafine, lea o lo’o asiasi mai i Amerika, sa fa’afuase’i ona alu atu Talia ma su’esu’e o ia, po o ai na tatu’uina i lalo ia niu ia o lo’o maka ai le latou tuaoi.

Sa ta’ua e le na a’afia, sa ia taumafai e faamanino ia Talia, e le o ia sa tatu’uina i lalo ia niu, ae peitai, sa fa’aalia pea le to’atama’i a le ua molia, ma ia faafefeina ai le na a’afia i le agaese sa u’u i lona lima.  O le alu ‘ese o Talia mai i le fale o le na a’afia, na ia valaau ai loa leoleo ona ua le mautonu i le saogalemu a ia ma lona aiga.

Na fa’atalanoaina foi e leoleo ia le tuafafine a le na a’afia ma sa ia ta’ua le alu atu o Talia i le fale ma su’esu’eina lona tuagane, po o ia na tatu’uina i lalo ia niu o le tuaoi.  Sa ta’ua e le tuafafine le taumafai o lona tuagane e fa’ato’ato’a le ua molia, ae peitai, sa fa’aalia lava le to’atama’i o Talia ma ia fa’afefeina lona tuagane, i le agaese sa i lona lima.

Sa faapea loa ona agai atu leoleo i le fale a le ua molia ma lokaina mai o ia.  Ma e tusa ai ma sana faamatalaga sa faia i le ofisa a leoleo, na mafua ona le fiafia ona ua tatu’u i lalo e le tagata ia niu ia ua leva ona ola i lo latou tuaoi. Sa ia faamaonia lona alu atu i le fale o le na a’afia, faaleaga le ‘screen’ o le faitoto’a ma taufa’amata’u i le na a’afia, i se agaese.

Sa molia Talia i moliaga e tolu;

Faitauga 1:  Faatupu vevesi i totonu o aiga – o se vaega ‘C’ o solitulafono mama, e mafai ona loka ai se tasi i le o’o atu i aso e sefululima (15), po o se sala tupe e $300; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona loka ai se tasi i le o’o atu i aso e sefululima (15), po o se sala tupe e $300; po o fa’asalaga uma e lua.

Faitauga 3:  Faaleagaina o mea totino i lona tulaga e tolu – o se vaega ‘B’ o solitulafono mama, e mafai ona nofosala ai se tasi i le o’o atu i le ono (6) masina, po o se sala tupe e $500; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia mai i le falepuipui, e faatali ai lona faamaisnoga.