E FAI O LENEI AE O LENA

Sa ata le alii o Semi ma ana uo, a’o alu atu le latou solo agai i le fale o si toeaina o Mika.   Ua uma a’oga, ua o’o i taimi o a latou malologa umi ma o le mea muamua lava na fai e nei alii, o le fa’asasa’o atu i se vaitafe malulu lava e ‘au’au ai ona o le vevela tele o le aso.

O iina lea na maua ai e le alii o Semi ia le pakete o tafetafea solo i totonu o le vaitafe ma ia tago atu i le u’u mai.

Ua uma ona ta ta le pakete ma usu ai a latou pese, toe fai ai a latou ta’aloga.  Ae ua o latou mafaufau nei po o le a leisi mea o le a fai i le pakete.

Na ata leotele ia Semi ma ia faapea atu i ana uo, lea ua ou iloa le mea e fai i le pakete.

Ua talie ana uo, ae matamata atu i le fepisia’i solo o Semi i le faatumuina o le pakete, ona ia faapea mai lea, “O mai tatou o e ave le pakete e tu’u i luma o le fale o le toeaina o Mika.”

Ua pei e ‘ene e seisi ia le alii o Semi ma ana uo, a’o latou savalivali ma talatalanoa i foliga o le toeaina o Mika pe a tatalaina le pakete.

O Mika, o se tama matua pe a ma le 89 tausaga le matua.  O se toeaina loto alofa tele ma e le taitai ita i seisi.  Ae o si toeaina, e nofo toatasi na o ia i le faasi’usi’uga o le nu’u lea e nonofo ai Semi ma ana uo.

Ua taunu’u nei le savaliga a nei alii i le fale o Mika, ona alu lea o leisi alii ua tau atilo pe iloa atu le toeaina.  Ina ua na iloa e leai seisi o le fale, sa ia talotalo mai loa ia Semi.

Ua tamo’e atu nei Semi ma le pakete ma tu’u i luma o le faitoto’a o le fale a le toeaina o Mika ona faatopetope lea ona toe tamomo’e ese.

E tamomo’e lava le auali’i lenei ma talie i le latou mea ua fai.

O le aoauli lea, na toe fo’i atu ai ia si toeaina o Mika na alu i le taulaga e fai mai sana faatauga.  Ma na fa’ate’ia o ia ina ua na va’aia le pakete i luma o lona faitoto’a ma ia tau mafaufau po o ai e aumai ai lea pakete.

Ua savali atu le toeaina o Mika ma si’i mai le pakete ma ave i totonu o lona fale ma fa’asasa’o atu loa i le umukuka ma tatala ai loa le pakete.

Oka, oka, sa matua’i te’i lava si toeaina ina ua vaai atu, e faatumulia le pakete i palapala, o laula’au, o fasi la’au, o apu pala ma le tele o nisi otaota.

Ua savali atu nei le toeaina o Mika, e aunoa ma se ita, ua sasa’a uma i fafo le lapisi i totonu o lana lapisi tele i tua o lona fale.

Ona ia savali atu lea i le paipa sa tu i autafa o lona fale ma amata ona ia fufuluina mama le pakete ma ia faapea ifo ia te ia lava, “Ua ou iloa lelei lava le mea e fai i le pakete lenei.”

Ua mae’a lea ona savali atu loa ia si toeaina o Mika, ua fa’apu le pito i lalo o le pakete ma tu’u ai ni palapala i totonu, ona ia savali atu loa lea i lona fale togala’au ua si’i mai se teufugala’au ua amata ona maua’a ma ia totoina loa i totonu o le pakete.  Ona ia fa’asusu lea i le la’au ma ia si’i atu loa i luma o lona fale i se vaega i le tulimanu o lana pa la’au ma tu’u ai loa le pakete lenei.

O le aso na soso’o ai, na toe o mai ai le au ula leaga lenei o Semi ma ana uo e va’ai po o le a le mea na fai e le toeaina o Mika i le pakete.

Ae na fa’ate’ia le vaega lea, ina ua va’ai mamao mai lava, ma latou iloa mai le pakete o tu atu i totonu o le togala’au a le toeaina a Mika, ae ua toto ai i totonu se la’au ma ona fua matagofie lava.

Ua tutu le aualii ma fetilofa’i solo leisi i leisi ma toe tilotilo mai i le pakete.  Ae fetaui lava ma le savali mai o le toeaina o Mika.  Na mate’ia ai lava iina e le toeaina, o le aualii lea sa faia le mea leaga lea na tau mai ai i le aso ananafi.

“Ese le matagofie o la’au a ea?” o le fesili mai lea a le toeaina o Mika ma ata mai i le aualii lea.  “Fa’afetai lava mo le pakete.  Faafefea na tou iloa na ou manaomia se pakete?”  Ma ata leotele ia le toeaina o Mika.

Ua na o le punonou o le aualii ua leai seisi e tautala ona faapea atu lea o Semi i si toeaina o Mika, “E faamalie atu lava Mika i le matou mea na fai.” 

Ona faapea mai lea o Mika, “Aua e te popole iai.  Sa ou talavou foi.  Ae ia avea lenei mea ma lesona taua ia outou.  E taua tele mea tou te tu’uina i totonu o a tou pakete.  O a mea o le a outou tu’uina i totonu o pakete?”

[IA MANUIA FUAFUAGA UMA O LENEI VAIASO]