Saunia le vasega fa’ai’uaso a le Aoga a le Matata ‘Ese’ese mo la latou faigamalaga aga’i i luma

Pago Pago - AMERIKA SAMOA

O le taeao o le aso Tofi o le vaiaso ua mavae, sa faatumulia ai le fale ta’alo fou a le Laumua o le Pusi, le A’oga a le Matata ‘Ese’ese i Nu’uuli (Nu’uuli Vocational Technical High School), i taitai o le malo, taitai o ekalesia, taitai o le aoga ma le aiga faiaoga, aemaise o matua, aiga ma uo, na aofia potopoto e molimauina le taunu’uga manuia a alo ma fanau e to’a 62, ina ua o latou taua’aoina a latou fa’ailoga (diplomas) mai o latou ta’ita’i.

O le afioga i le Lutena Kovana, le tofa i le to’oto’o ia La’apui Talauega E. V. Ale sa avea ma fofoga autu o le aso, e fai ma sui o le afioga i le kovana, sa le i mafai ona auai ona o fuafuaga fa’alemalo.  Ae sa mafai ona auai le Faletua ia Ella Mauga, faatasi ai ma le sui Faipule o Amerika Samoa i le Konekeresi i Amerika, ia Uifaatali Aumua Amata ma le Faatonusili o Aoga a le malo, ia Dr. Samasoni Asaeli.

O le tamaitai puleaoga ia Dr. Valasi Apulu sa fa’afeiloaia matua ma aiga o le vasega fa’au’u, aemaise malo fa’aaloalogia.

Ina ua mae’a le pese amata mai i le vasega fa’au’u, o le tatalo amata sa fofogaina e le susuga i le Epikopo Albert Toloa mai i le Uarota a Nu’uuli Muamua, o le Siteki a Pago Malaeimi, i le Ekalesia a Iesu Keriso o le Au Paia o Aso e Gata Ai.

O le manulauti o le aso taua a le fanau, o le ‘Opogi o la tatou Faigamalaga’, ma e pei ona saunoa le tofa ia La’apui, o se manulauti o lo’o tino mai ai le natura o la latou faigamalaga ma lo latou lumana’i manuia, o lo’o faatali mai mo i latou taitasi.

Saunoa le afioga i le sui Kovana, ua mae’a ona savalia e le fanau fa’au’u ia se auala na tumu i lu’itau, o manumalo, a’oa’oga ma le tuputupu a’e.  Ua o latou fa’aalia lo latou lototele, maumaututu ma le agaga finau, ua fa’ailoa mai ai, le leai o se puniala e le mafai ona o latou to’ilaloina, pe afai e latou te fa’asagatau iai ma le lototele atoa ma le finafinau.

Sa ia fautuaina le fanau fa’au’u, ina ia opogi la latou faigamalaga, aua o se tulaga e patino ia i latou ta’ito’atasi, lea ua o latou tagata mai ai i lea lava aso. Sa ia saunoa foi e faapea, i totonu o Amerika Samoa, e a’oa’oina mai e la tatou aganu’u le taua o ona tagata, faasinomaga ma le finafinau.

E le gata i lea, sa ia ta’ua le fili faatasi o i tatou, e ala i a’oa’oga tu’u mai i o tatou tua’a, le atamai o tatou tama ma tina matutua, faapea le malosi o a tatou tu ma aganu’u.  Ma ia fautuaina ai le vasega fa’au’u, e latou agai i luma ma tauave nei mea uma, e taitai, musuia ma faamanatuina ai i latou i le mea latou te o mai ai ma o latou tagata.

Sa ia toe faamanatu atu ia i latou le tele o tulaga ua o latou a’oa’oina mai i le NVTHS, e sili atu nai lo le atamai a’oa’oina, ae ua faapea foi ona fa’aa’upegaina i latou ina ia mafai ona fausia so latou lumanai manuia, mo i latou, mo a latou aiga faapea tagata o Amerika Samoa.

 Sa ia ta’ua foi le avea o le Koviti ma se tasi o ala na o latou uia i tausaga na se’i mavae atu, ma isi lava tulaga e patino i tagata Samoa, e pei ole leai o ni tusi a’oga mo vasega, po o le le auai atu o faiaoga, po o le leai o ni masini e fai ai a latou su’esu’ega, ia po o le latou le latou tia’i a’oga ona o le le fia a’oga.

O se vaega uma ia, na saunoa ai le afioga i le sui kovana, o la latou savaliga.  O mea nei, e fau ai o latou tagata.  E gata le malosi o le malo ma ona tagata faigaluega, ae e ia i latou lava, le sailiga o lo latou lumanai ma le sailiga o a latou galuega.

Sa ia fautuaina foi le fanau fa’au’u ina ia avea a latou miti ma a latou tapasa, ae o lo latou finafinau ma afi.  

Ina ua mae’a ona tu’uina atu le fa’amalo a le afioga i le sui kovana i le vasega fa’ai’u aso, sa faapea loa ona fa’alauiloa ma aloaia le ‘Valedictorian’ ma le ‘Salutatorian’ o le aso, e le sui puleaoga ia Agamalu Fuimaono-Tauese.

O le ‘Valedictorian’ po o le alii na ausia le tulaga muamua a le vasega fa’ai’uaso, o Mingyuan Wang.  Sa fanau o ia i Saina, ae na tuputupu a’e i le afioaga o Nu’uuli.  O ia o se alo e faasino ia Ping Wang ma Hongmei Xu o Saina ma Nu’uuli.

O lo’o ia faamoemoe e fa’aauau ana a’oa’oga i le Iunivesite a Hawaii i Manoa pe a mae’a lana fa’au’uga, ina ua maua se sikolasipi mai i le UH-Manoa, mo le $16,380 i le tausaga.

O le tamaitai ua na ausia le ‘Salutatorian’, o le tamaitai o Ida Tauline Tatupu mai i le afioaga o Pavaiai, Pago Pago, Olosega, Manu’a, Lano ma Vaito’omuli, Savaii.  O ia o se alo e faasino i le susuga Jerry ma Taulaga Tatupu.

O ona matua fa’aleagaga o Rev. Usoalii ma Solinuu Faatoatoa, mai i le ekalesia Metotisi “Iesu le Sulu Moni” i Pavaiai.

Sa aloaia e Ida ona matua, matua a matua, matua faaleagaga aemaise lona ‘uncle’ o Tauinaola Jeremiah Tatupu faapea ona tua’a ua fa’ilagi soifua, ma lona aiga atoa, i le manuia o ana taumafaiga fa’aleaoaoga.

Ua taliaina o ia e le Iunivesite o Utah i Saute faapea ma St. Martins.

O Fa’ailoga Faapitoa:

Tamaitai ‘Tradesman of the Year’ — Ida Tauline Tatupu

Alii ‘Tradesman of the Year’ — Toetu Sam Sapakuka

SAT pito maualuga togi - Mingyuan Wang

Togi lona lua pito maualuga i le SAT – Isidore Gustav Allen

Second Highest SAT Score — Isidore Gustav Allen

Alii ‘Scholar Athlete’ o le Tausaga – Fanolua Junior Toilolo

Tamaitai ‘Scholar Athlete’ o le Tausaga – Heavenlee Taualai Amesa

Alii Ta’alo o le Tausaga – Sio Rabaigau Antonio Galuvao

Tamaitai Ta’alo o le Tausaga – Lemafo’e A’emauga Muliipu

Alii na maua le fa’ailoga faaleta’ita’i – Junior Leuluga

Tamaitai na maua le fa’ailoga fa’aleta’ita’i – Ruth Sulumauga Fiaava’e

Fa’ailoga ‘Citizenship’ – Toetu Sam Sapakuka

Fa’ailoga ‘Rotary’ – Mingyuan Wang

FA’AILOGA SIKOLASIPI MAI I LE AIGA O SCHIENER:

Alii - Wayne Hamilton

Tamaitai – Atalina Uprizan Peleitala Masoe

Na ausia e le tamaitai o Heavenlee Taualai Ames ia le fa’ailoga o le ‘Award for Excellence’.

O le alii fa’au’u o Nehemiah Kava, ua mauaina le fa’ailoga mo le ulufale atu i vaega’au a le Malo, le US Marines.

Sa faapea foi ona tofutofusia ia le vasega fa’au’u ma fa’ailoga mai i le sui Faipule o Amerika Samoa i le Koneeresi, le afioga Uifaatali Aumua Amata.