TALA O LE PASEFIKA

Pago Pago - AMERIKA SAMOA

ULUA’I ‘CENSUS’ A PAPUA NIU KINI

O le vaiaso fou ua faamoemoe, e amatalia ai le ulua’i ‘Census’ a le malo o Papua Niu Kini, i le ova ma le sefulu tausaga.  Ma e pei ona sa fa’ailoa atu e le alii Minisita o Richard Masere, i le vaega fa’asalalau a le Post-Courier, o lo’o gasolo lelei lava tapenapenaga mo lenei faamoemoe.

Sa amata mai lava tapenapenaga mai i le 2019 ae peitai, ona o le Koviti19, sa faapea ona fa’atuai ai ona amatalaina lenei faamoemoe

E 22,000 komipiuta feavea’i (tablets) ua mae’a ona tufatufaina ia i latou o le a faataunuuina le ‘census’, ae e silia ma le to’a 15 afe i latou o lo’o faatinoina le ‘census’, o faiaoga.

O lo’o lagolagoina malosi e le Komesina o Ausetalia lenei galuega tele, e ala i sapalai o ata satellite o nofoaga tu’ufua, e fesoasoani ia i latou o le fa’ataunu’uina lenei galuega faigata.

PALOTA A LE ATU SOLOMONA

Ua talia ma le loto atoa e le Palemia a le atu Solomona, o Jeremaia Manele, ia so’o se tasi e mafai ona lu’iina o ia faaletulafono.

Ua mae’a ona faamaonia e le Faamasinoga Maualuga le iai nei o se talosaga mo se fa’amanino mai i le faamasinoga, o le fa’agasologa o le palota mo le tofi Palemia, mai lava i le aso e filifilia ai se sui tauva, seia o’o mai lava i le aso palota.

O lenei talosaga, ua talitonu vaega fa’asalalau, sa fa’aulufaleina e le taitai o le Itu Agai, ia Mathew Wale.

I le amataga o le vaiaso, sa saunoa ai Manele i luma o le Palemene, e faapea, o se avanoa lenei e mafai ai e le faamasinoga ona faia sana faaliliuga e tusa ai ma tulaga o le tulafono ma faamanino mai le mafua’aga o lenei fa’agasologa.

Ma sa saunoa Manele, o lo’o ua i luma nei o le faamasinoga se fa’atu’i’ese e faasaga i le faatulafonoina o le Palemia ma e na te talia so’o se avanoa e mafai ai ona faamanino mai e le faamasinoga lenei mataupu.

O le aso 2 o Me sa filifilia ai Manele e avea ma Palemia a le atu Solomona.

FA’ASEA E FAASAGA I LE TAUSIGA O TINA MAI TONGA

Ua aofia i totonu o se ripoti a i latou e gafa ma le su’esu’eina o mafua’aga o le maliliu o tagata, ia se fa’asea, i le tausiga o se tina mai Tonga, e iai manaoga faapitoa, sa nofo i Aukilani, Niu Sila, ina ua maua atu o ia, ua maliu.

E lua aso sa le’i amanaiaina ai e se tasi lenei tina e 30 tausaga, o Ruth Finau.  Ma na maua atu lona tino maliu i le nofoaga sa faamautu ai i Aukilani i Saute, i le aso na soso’o ai, ae sa faapea le aufaigaluega, o lo’o tofa o ia.

Sa ta’ua e Tania Tetitaha lea o lo’o gafa ma le faia o su’esu’ega i tino maliu, e le’i lelei le tausiga o lenei tina, e pei ona sa ripotia e le Kaniva Tonga.  Ma sa ta’ua e Tetitaha, sa maliu fa’afuase’i ia Finau ia Iulai 2021, ae e le i inuina ana fualaau.