“Aua le Fefe, Tau ina ia Faatuatua” o le manulauti a le vasega fa’au’u 2024 mai i le Laumua o le Toa

Pago Pago - AMERIKA SAMOA

Sa faatumulia le malae ta’alo a Kanana Fou i le taeao o le aso Gafua, Iuni 10, 2024, i le mamalu o taitai o le Malo, ta’ita’i o ekalesia faapea matua, uo ma aiga, e molimauina le taunu’uga fiafia a alo ma fanau e to’a 261, a le Vasega Fa’au’u 2024 a le aoga maualuga a Tafuna.

O le talosaga amata, sa fofogaina e le susuga i le fa’afeagaiga ia Rev. Reupena Alo mai i le EFKAS Pava’ia’i.  O le fa’afeiloaiga sa fa’aleoina e le puleaoga a le Laumua o le Toa, ia Tutuila Nauer Togilau ma sa ia fa’alauiloaina mai ai foi le lauga faapitoa o le aso, le faletua o le afioga i le kovana, ia Ella Pelefoti-Mauga, o se tasi sa fa’au’uina mai foi i totonu o lenei a’oga.

Sa saunoa le faletua a le afioga i le kovana e tusa ai ma le manulauti ua filifilia e le fanau aoga, “Aua le fefe, tau ina ia Faatuatua”, o se autu mamana, o le a mafai ona ta’ita’ia lelei ai i latou, a’o latou sauni atu mo le faigamalaga o totoe o latou soifuaga.  “Aua le matata’u”, e pei ona saunoa le faletua ia Ella Pelefoti-Mauga, o ni upu faigofie, ae o ni upu e loloto lona uiga, e faamanatu mai ai o le fefe, o se lagona faalenatura, ae ia ua ne’i avea ma ta’iala o gaioiga ma limiti ai lo latou taumafaiga.

Na ia toe faamanatu i le fanau a’oga le tele o fa’afitauli ma fita sa feagai ma i latou a’o latou feagai ma a’oga, o su’ega faigata, o le to’esea o nisi e pele ia i latou, aemaise ai o le manatu e ono fa’ato’ilalo ai i latou lava.  Ae sa ia faapea atu foi, “Ae o lea ua outou taunu’u mai iinei.  Sa outou tutumau.  Ua outou fa’ailoa mai, e mafai ona outou fa’asagatonu atu ma fa’ato’ilaloina le fefe, ma e avea lea ma o se auala e tuputupu ai ma fa’amalosia ai.

Sa fesiligia e le faletua ia le fanau fa’au’u, pe fa’afia ona ta’ua lea fuaiupu i totonu o le Tusi Paia, Aua le matata’u.  Sa ia tomanatu pe aisea  ua filifilia ai e le vasega faau’u lenei autu.  Ma sa ia toe faamanatu mai le saunoaga a le taitai fa’aleagaga, le susuga ia Rev. Alo, i le tala i le tamaloa e suafa ia Iairo ma lona afafine sa ma’i ma u alata ina maliu.

A’o agai atu Iesu i le faapotopotoga o tagata, sa pa’i mai se fafine e gasegase i le ma’i o le puna toto, ma ina ua pa’i mai o ia i le ofu o Iesu, na faafuase’i ona mou atu lona gasegase.  Ae ua fesili Iesu, po o ai na pa’i atu ia te ia.  “Na pa’I mai lava se tasi ia te a’u; aua ua ou iloa ua alu atu le mana mai ia te a’u.”

A’o fesiligia e Iesu le motu o tagata, sa alu atu se tasi mai i le fale o Iairo ma faailoa atu ia Iairo, ua maliu lona afafine ma aua le toe “faalavelaveina i le a’oa’o”.  Ae ina ua faafofoga Iesu i lea faamatalaga, sa ia fetalai atu ia Iairo, “Aua e te fefe, tau ina e fa’atuatua, e ola ai o ia.”

Na toe fa’amanatu atu e le faletua i le fanau fa’au’u, o upu ia a Iesu sa faia ae e le’i ulufale atu i totonu o le fale o Iairo ma va’ai i lona afafine.  Ma o le feau taua i totonu o lenei mau, lea ua avea ma a latou manulauti, o se fa’amanatu lea ia i latou, ina ia aua le Fefe, tau ina ia Faatuatua.

Sa saunoa le faletua o le afioga i le kovana, sa taumafai Iesu e fa’ailoa atu i le motu o tagata ina ia o latou talitonu i se mea e latou te le’i va’aia, ia talitonu, e le’i maliu le afafine ma e pei o le vasega fa’au’u, ia i o latou fa’atuatua ma talitonu ia i latou lava, e mafai ona o latou o atu ma faatoilalo se lalolagi e le mailoa.

Sa ia fa’amalosi’au atu foi i le vasega fa’au’u e faapea, i nei vaitaimi o le pogisa, ia outou tua i le atamai ma fautuaga o lenei manulauti, “Aua le matata’u, tau ina ia talitonu.”  Ma ia u’una’ia i latou ina ia o latou tauaveina lenei talitonuga i le vaega fou o o latou olaga o le a fa’asaga atu nei iai, po o le fa’aauauina o aoaoga, po o le ulufale atu i ni galuega fou, po o le faimalaga atu e sailiili.

I le faaiuga o le lauga a le faletua, sa ia faitauina mai ai upu o lo’o i totonu o le Isaia 41: 10 “Aua e te fefe, aua out e ia te oe; aua le fetapatepa’i, aua o a’u o lou Atua; ou te fa’amalosia oe; e moni, out e fesoasoani ia te oe; e moni, ou te taofia oe i lo’u lima taumatau e i ai le amiotonu.”

I le saunoaga pu’upu’u a le afioga i le kovana, ia Lemanu P. S. Mauga, sa ia faamamafaina ai le taua o le fa’aavanoaina o taimi mo fanau ma le atina’eina o se fesootaiga mafana ma i latou, e ala i le auai i totonu o a latou a’oa’oga, faapea o latou olaga.

Saunoa le afioga Lemanu, o nisi o matua, e pisi i galuega ma isi tiute, ma e misi ai ona fa’aaluina taimi taua ma fanau.  Ma sa ia ta’ua e faapea, o lea taeao, o se molimau i le alofa o le Atua, o Lana puipuiga ma taitaiga ma o le vi’iga uma e toe fa’afo’i atu ia te ia.  

Sa faapea ona ia lu’itauina matua ma aiga, ina ia fa’aavanoa sina taimi, po o se itula e tasi, pe lua, mo le fanau.

Mo le fanau fa’au’u, sa ia toe faamanatu atu ia i latou ia le taulaga a o latou matua sa faia ina ia amata lelei o latou olaga ma ia talosagaina le fanau fa’au’u e tutula’i ma usuina le pese fa’afetai mo latou matua.

I le mae’a ai o le saunoaga a le afioga i le kovana, sa faapea loa ona fa’alauiloa ia i latou ua ausia le tulaga muamua (Valedictorians) ma tulaga lua (Salutatorians) i totonu o le a’oga.

O i latou e to’atolu ua ausia le tulaga muamua i totonu o le vasega faau’u, o Fenomarama Mercy Blessing Aperaamo, Charles Saunoailegutu Tauiliili ma Alexandria Lorena-Faiivae.

O le alii ia Ezekiel Tyndale Toafa na ausia le tulaga lua.

O isi fa’ailoga a le PTA na aofia ai:

Tamaitai Ta’alo o le Tausaga — Florina Maeataanoa

Alii Ta’alo o le Tausaga — Regan Duffy

Tamaitai ‘Scholar-Athlete’ o le Tausaga — Princess Spitzenberg

Alii ‘Scholar-Athlete’ o le Tausaga — Lorng Faiivae

Fa’ailoga Faaleta’ita’I  — Arnel Malua Atiae

Fa’ailoga o le ‘Citizenship’— Chaelynn Gonzales

Pito sili ona maualuga maka i le SAT — Charles Tauiliili

Pito sili ona maualuga maka i le ACT — Kamakahukilani Tuitoelau

Ma na tofutofusia fanau fa’au’u ma fa’ailoga faapitoa mai i le Sui Faipule o le Konekeresi, le afioga Uifa’atali Aumua Amata.