Atugaluga i tulafono fou mo loia lotoifale

Pago Pago - AMERIKA SAMOA

Ua i luma nei o le Faamasinoga Maualuga se talosaga a le afioga i le Loia Sili, Fainu’ulelei Falefatu Ala’ilima-Utu, tauala atu i le sui Loia Sili ia Roy Hall, mo le fa’asalaina o loia uma, e tu’ua Amerika Samoa ma nonofo i atunu’u i fafo, o se tulafono fou lea a le faamasinoga, e faamalosia ai so’o se loia fou e nonofo i totonu o le teritori.

O lona uiga, afai ae tu’ua e se loia ia Amerika Samoa ma fa’amautu i atunu’u i fafo, o le a faapea ona fa’aleaogaina pe ave’esea a latou laisene fa’aloia.

Ae peitai, ua fa’aalia e nisi o iai le tomai tau i tulafono, e le o sa’o le faitauina e le Loia Sili o lenei tulafono.  Ua taofi i latou, e le o faapea mai le tulafono, e ave’esea laisene a loia.  Ua tele ni loia o lo’o umia laisene i totonu o Amerika Samoa, ua leva ona aumau i atunu’u i fafo ma fesoasoani mai i tagata o Amerika Samoa.

Mo se fa’ata’ita’iga o le susuga ia Charles Alailima lea ua fai sina leva o aumau i le Setete o Uasigitone, ae o lo’o fa’aauau pea ona fesoasoani mai i tagata o Amerika Samoa.

E o’o lava foi i le ofisa a le Loia Sili, o lo’o galulue ai ni loia o lo’o nonofo ma fa’amautu i atunu’u i fafo.

Sa saunoa le alii loia o Sean Morrison, e le taofia lou fesoasoani i tagata o le atunu’u pe afai e te malaga atu i atunu’u i fafo.  O le susuga ia Morrison, o se tasi foi o loia sa mafai ona fesoasoani mai i pisinisi ma faalapotopotoga i totonu o Amerika Samoa, mai lona ofisa i Louisiana, e aunoa ma se totogi.

Sa ia ta’ua e faapea, o nisi o taimi e faigata ona maua e tagata o le atunu’u ni loia e fesoasoani ia i latou, ma o se tulaga e popole ai tele le loto, le taumafai a le Loia Sili e ave’esea lea fesoasoani mo tagata o le atunu’u.

E faia lenei gaioiga a le Loia Sili, ae o lo’o feagai le atunu’u ma fa’afitauli i le tau leai o ni loia o lo’o galulue i fafo atu ma le malo.  E o’o lava foi i loia tuto’atasi, o lo’o galulue mo le malo.  Ma o le toatele o lo’o fa’aaogaina e le malo e fesoasoani i le le lava o a latou loia.

Ua fa’aalia le atugalu o le toatele, ona o le a avea lenei taumafaiga a le Loia Sili ma tulaga o le a ave’esea ai laisene a le 2/3 o loia i totonu o le teritori, ma o’o atu ai lenei mataupu i se tulaga ogaoga.

O lo’o iai foi se talitonuga, o le a avea foi lenei taumafaiga ma ala o le a lu’itauina ai le faavae. 

Ua toatele nisi o le atunu’u ua fesiligia pe aisea o lo’o taumafai ai le Loia Sili e fa’afaigata atili auala e maua ai fesoasoani fa’aloia, ae le taumafai ina ia fa’afaigofieina.