TALA I VAIFANUA

Pago Pago - AMERIKA SAMOA

FA’AGATAINA I LE FAAIUGA O LE MASINA O IUNI IA LE FAAULUFALEINA O LAGONA MA MANATU E FA’ATATAU I LE POLOKALAMA O LE ‘ENTRY PERMIT WAIVER’

O lo’o ua aoina nei e le Ofisa o le Loia Sili ma le Ofisa o Femalagaiga ia lagona ma manatu fa’aalia a le mamalu o le atunu’u, mo se fuafuaga e toe suia ai le tulafono (ASAC) 41.1102 (C), e fa’atatau i le polokalama lea o lo’o mafai ona faimalaga mai ai tagata mai Samoa, i totonu o Amerika Samoa, i le o’o atu i aso e sefulu (10), e aunoa ma se pemita.

Na mafua lenei tulafono, ona o le so’otaga i le va o Samoa e lua, i tulaga fa’aleaiga, aganu’u, gagana ma tala’aga o tagata Samoa.

Ae le gata i lea, ina ia mafai ai ona ulufale atu tagata US Nationals i Samoa, e aunoa ma le toe mana’omia o ni pemita.

E $10 le totogi o pemita mo sitiseni mai Samoa.

O tagata Samoa e fia malaga mai i Amerika Samoa ae e leai se tusi folau, e mafai ona malaga mai i se pepa faamaoniga (document of identity).  Ma o le a to’a 400 tagata faimalaga mai Samoa, o le a fa’atagaina i le masina, i lalo o lenei polokalama.

Mo so’o se tasi e fia manino i lenei fuafuaga fa’ata’atia mo le suiga o le tulafono, e mafai ona malaga atu i le Ofisa a le Loia Sili ma fesiligia Makerita Falefata, i le fogafale lona tolu o le ofisa a le malo (EOB), i Utulei, po o luga o le uepeseti a le malo o Amerika Samoa po o le uepeseti a le Ofisa o le Loia Sili po o le Oifsa o Femalagaiga.

 O le aso 25 o Iuni, 2024 o le a fa’agataina ai le toe taliaina o ni manatu tusitusia.

TALOSAGAINA E LE LOIA A PAPALII IA SE FAAMASINOGA TONU

Ua talosagaina e le loia a le tamaitai tusitala Samoa, ia Papalii Sia Figiel, ia le faamasinoga mo se fa’atonuga le tumau e taofia ai le toe lomia pe fa’asalalauina o lenei fa’alavelave, lea ua mafua ai ona molia Papalii.

O moliaga o Papalii e aofia ai le fasioti tagata, fasioti tagata le fuafuaina ma le umia o se aupega.

O lenei faalavelave sa tulai mai i le aso 24 o Me ma ua faapea ona salalau atu i atunu’u i fafo ona faamatalaga.  Ma na faaleoina e le tamaitai loia ia Unasa Iuni Sapolu, sona popolega ona o le tele o faamatalaga ua feavea’i e tusa ai ma lenei mataupu, e ono avea ma tulaga e taofia ai se faamasinoga sa’o mo Papalii.

O le amataga o le vaiaso na uluai tulai ai Papalii i luma o le faamasinoga ma sa fa’ailoa atu e Unasa i le faamasinoga, le tulaga o ona gasegase faalemafaufau, ma e le o mailoa tonu pe o maloloina Papalii e faaulu sana tali e tusa ai ma ona moliaga, atoa ai ma le auai i lona faamasinoga.

Ae peitai, sa te’ena e le afioga i le alii faamasino ia Fepulea’i Ameperosa Roma ia le talosaga faaleoina a Unasa ma ia toe faamanatu atu i le tamaitai loia, e na o talosaga tusitusia e tali iai le faamasinoga.

Na talosagaina e le itu a le malo ia le tu’uina mai o se vaiaso e tasi, ina ia mafai ona faamaeaina suesuega a leoleo ma faamautuina ai moliaga.  Ma o lea na faatonuina ai e le alii faamasino ia Unasa, ina ia fa’aaoga lea vaiaso e faaulufaleina atu ai faamaumauga ma talosaga, e manaomia.

O lo’o lokaina pea ia Papalii ma e na te le i tali mai e tusa ai ma ona moliaga.

TAITAI O LE KOMITI TA’ALOGA O LE PASEFIKA

O le vaiaso ua tuanai sa malaga mai ai i Amerika Samoa ia taitai o le Laulauafono o lo’o mataituina Taaloga o le Pasefika, mo le toe iloiloina o fale ma nofoaga e fa’ataunu’uina ai ta’aloga, i totonu o le teritori, aua le tauofoga o lo’o auai ai nei Amerika Samoa, ina ia talimalo i Taaloga o le Pasefika i le tausaga e 2029.

Sa fa’ataunuuina i le ofia a le ASNOC ia fonotaga fa’aletaitai  lea na auai atu ai ma le afioga i le sui Kovana, o sui o le Fono Faitulafono faapea ma taitai o kalapu ma faalapotopotoga o ta’aloga i totonu o Amerika Samoa.

Fa’atasi ai ma Amerika Samoa, o lo’o ua taumafai atu foi le motu o le atu Kuki ina ia o latou talimalo foi i Taaloga o le Pasefika i le 2029.

O le a mafai ona fa’alauiloa mai le motu o le a filifilia, i le fonotaga a le asosi o ta’aloga lea ua fuafua e fa’ataunu’uina i Palau, i le masina o Oketopa.

LOKA SE TAMALOA MAI I LE MALAE VAALELE I FALEOLOA

O le aso Toonai (aso Faraile i Amerika Samoa), na ave faapagotaina ai se alii e 44 tausaga mai i Vailele, e le vaega o le Ofisa o Tiute i malae vaalele i Faleolo, ina ua maua ai se vaega o fualaau faasaina, o mariuana, ina ua taunu’u atu lana faigamalaga, mai Amerika Samoa.

Sa mauaina ia nei vaega o fualaau faasaina i lenei alii e 44 tausaga, ina ua faatino suesuega masani a le ofisa o tiute, i le to’ai taunu’u a le faigamalaga ale Talofa Airways i le 3 i le aoauli o le aso Toonai (i Samoa).

E tusa ai ma se fa’aaliga mai i le Komesina o Leoleo a Samoa, le susuga ia Auapa’au Logoitino Filipo, na vave logoina e le aufaigaluega a le ofisa o tiute ia le ofisa a leoleo, ma na faapea loa ona agai atu ai sui malu o le malo ma lokaina mai lenei alii, mo le fa’aauauina o a latou suesuega.

Sa le gata i mariuana, ae sa faapea foi ona mauaina i lenei alii ia se vaegatupe e $8,000 (tupe Amerika).  Sa ta’ua e Auapaau, o le faamatalaga a lenei alii i le mafuaaga na malaga mai ai i Amerika Samoa, ona o le fa’atauina o ana koko Samoa.

Ua molia nei lenei alii ona o fualaau faasaina sa maua ia te ia.  Ae sa atili ai ona masalomia o ia, ona o le tele o le tupe sa ia te ia.

Ua mae’a ona tatalaina i tua lenei alii mai i le falepuipui, e faatalitali ai lona faamasinoga, faatasi ai ma ni aiaiga ua mae’a ona tu’uina ia te ia, e pei o lona malaga atu i le Ofisa a Leoleo i aso Faraile  uma e saini lona suafa.  Atoa ai ma le tu’uina atu o ana pepa malaga i a’ao o le malo.

O le aso 24 o Iuni, lea ua fa’atulagaina ai lona faamasinoga.