TALA O LE PASEFIKA

Pago Pago - AMERIKA SAMOA

TAPUNIA OFISA VAALELE I VANUATU

Ua amata fa’amalosia tulafono mo le puipuiga o le ofisa autu a le ‘Air Vanuatu’ talu ona salalau ripoti e faapea o le a tapunia lenei ofisa vaalele.

Ua iai foi ripotia i le ave’esea o ta’avale a le ofisa mai i lona nofoaga autu, e aofia ai pikiapu ma pasi.

E tusa ai ma se imeli na maua e le Vanuatu Daily Post, ua ta’ua ai le agai atu i le taofia o galuega a le ofisa vaalele.  O le taimi nei, ua taofia uma femalagaiga lotoifale a le ofisa vaalele, ma ua aga’i atu le kamupani, ina ia tapunia.

MAFUAAGA UA TAOFIA AI VISA MO TAGATA SAMOA E FAIMALAGA ATU I AUSETALIA

Ua ta’ua e le malo o Samoa e faapea, o le mafua’aga ua tau mamao ai mai i le faiga fou o Visa a Ausetalia lea e ta’ua o le ‘Australian Pacific Engagement VISA’ , ona o se atugaluga i le ave’esea atu o tagata e iai tomai faapitoa, mai i totonu o le atunu’u.

O le vaiaso nei, na tatalaina ai le ofisa mo lenei faiga Visa fou, lea e maua ai e tagata o le Pasefika (e aofia ai ma Samoa) le avanoa, e nofo mau ma galulue ai i Ausetalia.

E tusa ai ma se ripoti mai i le Observer, ua ta’ua ai e faapea, e ui ina o lo’o tatalaina atu lenei avanoa i motu o le Pasefika, ae peitai, ua ta’ua e le Minisita o Tupe a Samoa, le susuga ia Lautimuia Uelese Vaai, o lo’o iai ni itu o lo’o tilotilo iai le faigamalo, e aofia ai ma le a’afiaga o le tamaoaiga o le atunu’u.

MOLIA I NI SOLITULAFONO NI LEOLEO PAPUA NIU KINI 

E to’aono ni leoleo mai i Papua Niu Kini, ua faapea ona molia i lo latou osofa’ia o se fale’oloa i le po mulimuli o le tausaga ua tuanai atu, ma ua faapea ona fa’ate’aina i latou mai o latou tiute.

Ua mae’a ona tutula’i nei leoleo i luma o le faamasinoga i Waigani, i Port Moresby, ma ua mae’a ona tatalaina uma i latou mai i le falepuipui, e fa’atali ai le fa’aauauina o a latou faamasinoga.

FUAFUA LE TAPUNIAINA O LE OFISA VAALELE A KOLEA I SAUTE I TOTONU O SAIPAN

Ua iai nei se fuafuaga i Saipan, mo le tapunia o se ofisa vaalele a le malo o Korea i Saute lea e ta’ua o le ‘Asiana Airlines’.

Na ta’ua e le pule o le ofisa vaalele i Saipan, o Intak Hwang, o le a tapunia a latou faitotoa i le aso 30 o Iuni, i le atoa ai o le 30 tausaga o le latou tautua i le atu Mariana i matu.

Na ta’ua e Hwang, sa galue malosi lo latou ofisa e atina’eina tagata asiasi mai i Korea, i totonu o le CNMI, talu ona tatalaina a latou faitoto’a i le 1992.

Ma o le faaiuga foi o lenei masina, o le a tapunia ai le ulua’i faletalimalo a le Hyatt Regency i Saipan.