Tala i Vaifanua

Pago Pago - AMERIKA SAMOA

AUAI AMERIKA SAMOA I LE FONOTELE A TA’ITA’I O LE PASEFIKA I MICRONESIA

O le auai o Amerika Samoa i le Fonotele lona 26 a Ta’ita’i o le Pasefika lea sa faataunuuina i Micronesia, i le vaiaso nei, e fa’ailoga ai se la’asaga taua i le fa’alauteleina o le auai faavaomalo faapea le lotogatasi o malo o le Pasefika, e fa’aalia ai le taua tele o le galulue fa’atasi mo le sailia o fofo i fa’afitauli ma atina’eina o le alualu i luma.

I se gaioiga tulaga ese fa’aleta’ita’i o malo, sa faapea ona tusia ai e le Failautusi o le Iunaite Setete, ia Anthony Blinken, se tusi e fa’atagaina ai le auai o Amerika Samoa ma Guam i totonu o le faalapotopotoga o ta’itai o le Pasefika (Pacific Islands Forum-PIF), lea foi sa faaleoina e Kovana Guerreo i luma o le Fono.

O le kovana o Guam, ia Lourdes Leon Guerrero sa ta’ita’ia le PIF lona 26 o lenei tausaga ma sa ina ua mae’a ona maua mai le fa’atagana i le malo tele, sa faapea loa ona valaauliaina Amerika Samoa e auai, ae peitai, ua na ona o se avanoa maimoa, ae le auai i felafolafoa’iga o manatu po o le faia o ni faaiuga i totonu o le fono.

O lenei fonotele sa fa’ataunu’u i le faletalimalo a le Hyatt Regency i Tumon, i Guam, ma sa amataina i le aso 3 o lenei masina, ae na tapunia i le aso ananafi.

O le afioga i le Lutena Kovana, le tofa ia La’apui Talauega E. V. Ale o lo’o ta’ita’ia le aumalaga mai i Amerika Samoa.

I le ulua’i aso o le fonotele, sa faamamafaina ai e le tofa La’apui le taua o lenei avanoa, aua o se auala e mafai ona faamautu ai mafutaga fa’avaomalo i totonu o le Pasefika aua se lumana’i manuia ma le mautu.  Sa saunoa foi le afioga i le Lutena Kovana, o le galulue faatasi, e mafai ai ona fofoina lu’itau ma fausia ai se lumanai manuia mo motu uma o le Pasefika.

I se fa’aaliga fa’alauaitele mai i le Ofisa o le Kovana, ua ta’ua ai le avea o le auai atu o Amerika i le PIF ma auala e faalauteleina ai feso’ota’iga i le va o motu o le Pasefika, ma atina’eina ai fesuiaiga o auala e taua i mataupu e pei o le atina’eina o le tamaoaiga, suiga i tulaga o le tau ma puipuiga faavaomalo.

O le valaaulia mai ia Kovana Leon Guerrero faapea ma le auai a le afioga i le Lutena Kovana o Amerika Samoa, ua fa’amautuina ai se tuuto autasi i le fa’afaileleina o fegalegalea’iga malolosi ma le agaga o le tutufaatasi, i le va o motu po o malo o le Pasefika.

I le tatalaina o le PIF i le aso Gafua na se’i mavae atu, sa soalaupuleina ai e taitai mai i motu o Micronesia ia fa’afitauli o feagai ma i latou, ma na pito augafa lafolafoga i tulaga i le suiga i le tau.  Sa aofia i talanoaga ia se fuafuaga mo le suia i ‘renewable energy’ le 70% o motu, ae e le’i o’o atu i le 2030 faapea ai ma le u’una’iga o fa’atosinaga mo tagata asiasi mai (tourism) e ala i ni faiga pa’aga fou.  

O nisi o mataupu taua sa faapea ona soalaupuleina, na aofia ai fa’ama’i, a’oa’oga ma tulaga o le soifua maloloina.

LE FIAFIA TAGATA FA’ATAU I NISI O SUIGA I LE McDONALD’S

Na vevesi luga o upega tafa’ilagi i manatu fa’aalia e tusa ai ma se fa’aaliga mai i le fale’aiga ale McDonald’s i le le toe iai o a latou masini vai inu lea e pule ai lava le tagata fa’atau i lana vaiinu.  Faapea ma le le toe iai o ni fa’alua pe sili atu foi o vaiinu, e pei ona masani ai.

Sa fa’amaonia mai e se sui a le McDonald’s i le vaega fa’asalalau a le ‘Business Insider’ i le tausaga ua tuana’i, le tu’uina atu o le aia tatau i pule o fale’aiga ta’itasi, pe fa’aauau pea lea tautua, po o le a taofia.

E ui ina fa’alauiloa mai e le McDonald’s se latou taumafataga taugofie, e na o le $5 ae peitai, e le o faamalieina ai loto ma finagalo o ana tagata fa’atau, i le ave’esea o masini vaiinu faapea ma le toe iai o ni fa’alua pe sili atu foi.

E pei ona sa ta’ua e se tasi i luga o upega tafa’ilagi, o le faaiuga lea ua faia e le McDonald’s, ua fa’aalia ai lava le o’o mai o le i’uga o aso.  Ua o’o lava i nisi e fiafia tele i le McDonald’s, ua o’o atu a latou talosaga i le malo mo se fesoasoani ina ia taofia lea tulaga o le a o’o iai a latou vai taumafa.

Ae o se tala fiafia i le McDonald’s a si o tatou atunu’u o lo’o i Tafuna, o lea ua lipotia mai le mou atu o aso o le pe so’o o le eletise ma le tulaga faaletonu o a latou masini.

E ui lava ina e le’i iai lava ni masini vaiinu e pule saunoa ai o tatou tagata, po o le ta’i fa’alua pe sili atu foi.

FAAMAGOTOINA LE MV LADY NAOMI

O le aso Lulu na se’i mavae atu nei (aso Lua i Amerika Samoa), na fa’amagoto ai i gatai atu o Apia, i le loloto e 3,000 mita, ia le va’a o le MV Lady Naomi, i le atoa ai o le 26 tausaga o lana tautua, e le gata, mo le mamalu femalagaa’i i le va o Samoa e lua, ae faapea foi isi motu, e pei ona sa fa’amaonia mai e le susuga i le alii Kapeteni ia Leiataua Samuel Phineas, le Pule Sili a le Ofisa Va’a a Samoa.

E pei ona sa ta’ua e le Samoa Observer, na saunoa le susuga Leiataua i le afu o le tautua a le MV Lady Naomi ma e leai se taimi sa tula’i mai ai se fa’aletonu i lana tautua.  O le malaga mulimuli a le MV Lady Naomi mo Amerika Samoa, lea na malaga mai ia Ianuari 2023 ma lana pasese e 1,350, e aunoa ma se faafitauli.

O le tausaga e 2021, sa amataina ai le fausiaina o le va’a fou o le MV Lady Samoa IV, e sui tulaga i le MV Lady Naomi lea ua taoto nei i le moana i tai atu o Apia.  Ae o Novema 2022 sa amataina ai ana faigamalaga.

Sa to’atele ni o le mamalu o le atunu’u, i Samoa e lua faapea ma atunu’u i fafo, sa fa’aalia o latou manatu ‘ese’ese, i luga o upega tafa’ilagi, e tusa ai ma le tautua a le MV Lady Naomi.

E pei o se tasi o tomanatunatuga sa fa’aalia i luga o upega tafa’ilagi e se tina, i le 1993 se la ulua’i malaga ma si ona tina matua mai i Samoa, i le ulua’i folauga a le MV Lady Naomi mo Amerika Samoa.  Sa ta’ua e lenei tina le maligi o ona loimata a’o ia toe manatuaina le la faigamalaga ma si ona tina a’o soifua, i le po atoa.

E to’atele nisi o le mamalu lautele, sa faitioina le faai’uga faia mo le fa’agotoina o le va’a, ina ua mae’a ona fa’amaonia mai e le Minisita o Galuega ma Femalagaiga (MWTI), le komiti a le Palemene, le Ofisa Inisiua a le Dover Marine faapea ma inisinia mai i le Lloyds Classification, le le toe saogalemu o le MV Lady Naomi mo ni femalagaiga.

Sa to’atele ni manatu fa’aalia i luga o le upega tafa’ilagi, na tatau ona fa’asaoina le va’a, e toe fai faalelei, ae avea ma mata’aga i totonu o le atunu’u.  Aua e to’atele i latou o lo’o finagalo e asiasi atu i lenei meaalofa taua a le atunu’u, ma toe tomanatunatu i a’afiaga o latou olaga, i lana tautua.  Ae le gata foi i lea, e mafai ona avea ma se mata’aga lelei o tala faasolopito o le atunu’u, aua tagata asiasi mai i le atunu’u.

Ae peitai, i fautuaga mai i ofisa ‘ese’ese ma vaega su’esu’ega, na aofia i le faia o le faai’uga mo le MV Lady Naomi, sa fa’amaonia ai le le saogalemu o le va’a mo seisi lava tulaga, se’ia vagana ai le fa’amagotoina.

Ma ae e le’i fa’ataunu’uina lea fuafuaga, sa faapea ona ave’esea e le SSC po o le Ofisa o Va’a ia ni masini ma vaega o le va’a sa mafai ona aoga, ma foai’ina atu lea i le ‘Marine School’ e fesoasoani i a latou a’oa’oga, ae o nisi vaega ma masini o le va’a sa a’oga pea, ua fa’aga’aga nei mo le lipeaina o isi va’a o lo’o fa’aauau pea ona fa’aaogaina e le SSC.

O se tasi o atugaluga tele na fa’aleoina e le to’atele i luga o upega tafa’ilagi, e tusa ai ma le fa’aiuga mo le fa’agotoina o le MV Lady Naomi, i le moana i gatai atu o Apia, o le tulaga lea i le a’afiaga o i’a ma figota o le sami.

Ae peitai, sa ta’ua i le ripoti a le Observer, o le fa’amagotoina o le MV Lady Naomi, sa uia uma ala o le tulafono e pei ona fa’atulagaina e le Minisita o Puna’oa Faalenatura ma le Siosiomata (MNRE) faapea ma tulafono a le MWTI.

O vaega o le va’a ua mautino e ono a’afia ai le gataifale aemaise i’a ma figota o le sami, sa faapea ona ave’esea muamua ae e le’i fa’agotoina le va’a.