TALA I VAIFANUA

Pago Pago - AMERIKA SAMOA

ULUA’I SAUNIGA LOTU A AMERIKA SAMOA MO LE FAAMANATUINA O LE TUTO’ATASI A SAMOA

O le afiafi o le aso Sa, Iuni 2, 2024, sa faatumulia ai se falesa a le Ekalesia a Iesu Keriso o le Au Paia o aso e Gata Ai, i Malaeimi, i ta’ita’I fa’aleagaga mai i tapuaiga ‘ese’ese i totonu o Amerika Samoa, na aofia ai ta’ita’i o le Ekalesia Faapotopotoga Kerisiano a Amerika Samoa (EFKAS), o le ekalesia Metotisi, AOG ma ekalesia Aso Fitu, mo se sauniga lotu e faamamaluina ai le faamatuina o le 62 tausaga o le Tuto’atasi a le malo tuaoi o Samoa.

O se ulua’i taimi lenei ua faia ai se sauniga lotu faapenei i totonu o Amerika Samoa.

Fa’atasi ai ma lauga fa’aleagaga mai i ta’ita’i o le Ekalesia a Iesu Keriso o le Au Paia o Aso e Gata Ai, sa faapea foi ona fa’afofoga le mamalu na aofia i lea afiafi, i se aufaipese faapitoa, e silia ma le to’a lua afe, mai i le aufaigaluega a le StarKist ae le gata i lea, o le ‘aufaipese a le Siteki a Pago Mapusaga.

O le susuga i le Fitugafulu ia Elder Faapito Auapaau sa pule faamalumalu i le sauniga lotu ma i lana lauga faapitoa o lea afiafi, sa ia faamamafaina ai le taua o tulafono sili e lua, o lo’o ta’ua i totonu o le Tusi Paia.  O le tulafono sili, o le alofa i le Atua ma le lona lua, o le alofa i tuaoi.

O le Konesula o le Malo o Samoa i totonu o le teritori, le tofa ia Fata Brian Kaio sa ta’ita’ia le sauniga lotu ma sa ia saunoa e uiga i galuega ma meaalofa ua o tatou maua ona o a tatou tua’a ae le gata i lea, o le manatuaina pea o o tatou augatua’a e ala i talosaga.

I le saunoaga faapitoa a le afioga i le Senatoa Magalei Logovi’i, sa ia fa’asoaina mai ai lona tuputupu a’e i le mativa ma lona taunu’uga po o faamanuiaga ua ia ‘ae’ae ai i nei vaitaimi.  Sa ia ta’ua lona mana’o ina ia mitamita lona aiga ia te ia, aemaise o si ona tina. 

Sa auai ai foi i lea afiafi ia le afioga i le Faipule o Amerika Samoa i totonu o le Konekeresi, ia Uifa’atali Aumua Amata, ma nisi o taitai o ofisa ma matagaluega a le malo, ma le sui Kovana o le Falelima i Manu’a, le afioga Misaalefua J. Hudson.

FAATAGAINA ONA FAATAU OLOA FAU FALE MAI I ISI ATUNU’U

Mo sina taimi pu’upu’u, o le a mafai ai ona fa’atauina mai ai oloa mo le fauina o fale i totonu o Amerika Samoa, mai isi atunu’u i fafo atu o le Malo Tele, i le va o Aperila 29, 2024 ma Mati 1, 2025.

O lenei fa’atagana e le gata ina aofia ai Amerika Samoa ae faapea foi Guam, le atu Mariana, le atu Malesala faapea ma Micronesia.

O se tala fa’amama avega lenei mo kamupani fau fale o lo’o gafa ma galuega o lo’o totogia e le malo feterale, ona e tusa ai ma tulafono a le Malo Tele (Buy America), e na o totonu lava o Amerika e mafai ona fa’atauina mai ai, pe gaosia mai ai, oloa mo galuega o lo’o faatupeina e le malo feterale.

Ae e pei ona sa saunoa le susuga ia Christopher Coes, le sui failautusi a le Matagaluega o Femalagaiga (DOT), e le o se tulaga faigofie ia le faamalosia o motu o le Pasefika e mulimulita’i i le tulafono o le ‘Buy America’, ona o le taugata o le la’uina atu o oloa fau fale i luga o va’a, ona o le mamao o motu o le Pasefika mai i Amerika, ma e avea foi lea tulaga ma mafua’aga e fa’atuai ai le faamae’aina o galuega.

O lo’o iai se atugaluga i le laumua i Uasigitone ona o le tuai o galuega kamuta a le militeri o lo’o faatinoina i Guam, aua le tapenapena atu mo le ave’esea o ni Maligi e 5,000 mai i Okinawa ma aveina atu i Guam.

Saunoa foi Brendan Owens, le sui Failautusi o Ofisa Militeri a le Malo Tele, i luma o senatoa i sa latou iloiloga o le paketi i le masina ua tuanai, o faigata o lo’o feagai ma i latou, o le mamao o le va o Guam ma Amerika.  Ma sa ta’ua e le tamaitai failautusi, e fai lava sina faigata ona la’uina atu o sima ma u’amea i Guam.

FA’ATONUINA SE SU’ESU’EGA I LE TINO MALIU O GABBARD

I lalo o le fautuaga mai i le vaega su’esu’e o lo’o gafa ma le su’esu’eina o le maliu fa’afuase’i o Dr. Caroline Sinavaiana Gabbard, i le lua vaiaso talu ai, ua fa’amaonia mai ai e le Komesina o Leoleo a Samoa, le susuga ia Auapa’au Logoitino Filipo, tauala mai i se lipoti a le Samoa Observer, le fa’ataunu’uina o lenei su’esu’ega.

O le aso 11 o Iuni, o le aso Lua o le vaiaso fou, lea ua faamoemoe e tula’i ai i luma o le faamasinoga ia Papalii Sia Figiel, lea o lo’o molia i lenei fa’alavelave.

O lo’o ua fa’atalia nei e leleo ia le taunu’u mai o se fomai faapitoa (forensic pathologist) mai i Fiti, e faatinoina lenei su’esu’ega, ona e le i iai lava se foma’i faapitoa mo nei ituaiga su’esu’ega, i Samoa.  Ma o lo’o faapea ona fa’atalitali ai pea le aiga o Gabbard, se’ia mae’a nei su’esu’ega.

O lenei fa’alavelave mata’utia sa tula’i mai i le lua vaiaso ua tuanai, i le aso Toonai (aso Faraile iinei i Amerika Samoa), lea ua molia ai nei Papali’i i le fasioti tagata.

Sa ta’ua e le alii komesina i se taimi muamua, o lo’o masalomia le fa’aaogaina o se samala ma se tama’i naifi e fasiotia ai Gabbard.  Ae e le o mautinoa le tonu le mafuaaga o lenei faalavelave.

I nisi o ripoti, sa ta’ua ai le malaga o Papali’i i Lotofaga e tafao ai i sana uo, ina ua mae’a ona tupu le faalavelave.  Ae na fa’ato’a ia faamatalaina i lana uo le mea sa tupu, i le taeao o le aso Sa, ma o la aga’i atu ai loa i le ofisa a leoleo.