Lokaina se tamaloa i le la tuliga ma le faafefeina o lona toalua

Pago Pago - AMERIKA SAMOA

O le aso 20 o Aperila, 2024 na telefoni atu ai se tina loto mafatia i le Ofisa Leoleo i Fagatogo, e lipotia lona to’alua lea na tuli solo ma fa’afefe o ia.

(Ua le lomia e le Samoa News ia suafa o i latou ua a’afia i lenei mataupu ona o le puipuiga o le teineititi talavou o lo’o a’afia.)

E tusa ai ma faamaumauga a leoleo, ina ua valaau atu le tina loto mafatia i le ofisa a leoleo ma talosagaina le o’o mai o leoleo i lona aiga i Fagatogo, ma a’o taumafai le tina e faamatala tulaga o lo’o faia e lona to’alua, sa fa’afuase’i ona motusia le laina o le telefoni. 

E le’i umi ae toe valaau atu seisi tamaitai i le ofisa a leoleo, ma lipotia atu i leoleo le sulufa’i atu o sona ‘niece’ ma lona alo tamaitai e 11 tausaga, i lo latou fale.

Sa faapea loa ona agai atu ni taavale leoleo i le fale o le tina faapea ma le fale o le ‘Aunty’ lea na valaau lona lua mai.

Ina ua taunu’u leoleo i le fale a le ‘Aunty’ po o le tina lea sa valaau lona lua mai, sa faamatalaina e lenei tina le tamo’e atu o lona ‘niece’ (le tina loto mafatia), o lo’o tagi atu, ma fai atu o lo’o tuliloaina mai o ia e lona to’alua, ma o lo’o ia fa’afefeina o ia.  Ma sa faapea ona ta’ita’i e le tina (Aunty) ia leoleo i le tina loto mafatia.

O lo’o ta’ua foi i faamaumauga a leoleo, le faatalanoaina e leoleo o le tina loto mafatia, e tusa ai ma le faalavelave sa tupu.

Ma sa faamatalaina e le tina loto mafatia le tula’i mai o se fe’ese’esea’i i le va o ia ma lona to’alua, a’o iai i le Sadies by the Sea, i Utulei.  Na ta’ua e lenei tina, a’o ia tapenaina le potu sa fa’aaogaina e i latou ma lana fanau, ma lona toalua, ae o le taimi lea o lo’o inu pia lona toalua i tafatafa o le sami, i le mea o lo’o ta’e’ele ai lana fanau.  Ma na fa’ate’ia o ia ina ua faalogoina le leo o lona to’alua, o lo’o palauvale ma foliga mai o lo’o faatupu vevesi.

Sa ‘ote mai le tina mai totonu o le potu ma faatonuina lona to’alua, e tu’utu’u i lalo lona leo, ae tau’ai atu o ia e le tamaloa, i se ma’a ma se apa pia.

Na mae’a lea, ona savali atu loa lea o le tamaloa i le potu, ae o lo’o palauvale lava.  Ina ua o’o atu le tamaloa i totonu o le potu, sa ia tapunia leotele le faitoto’a ma tu’i foi le faitoto’a.  Ona ia tago lea ua u’una’i ‘ese le tina o le aiga, ae ave se vaegatupe e $480 mai i le ‘ato a le tina, ma toe savali mai i fafo.

Sa faamatala e le tina, ina ua o latou toe fo’i atu i le latou fale i Fagatogo, ma lana fanau, sa maua atu lona to’alua, o lo’o i le fale.  Ma sa taumafai le tina e su’e le ato a lona to’alua mo le tupe lea sa ia aveina, ae peitai, e leai se tupe na maua ai.  Ma o le mafuaaga lea o le le fiafia o le ua molia, ma ia fa’afefeina ai le tina o le aiga, ina ia ave atu le telefoni a le la alo tamaitai, lea sa teuina e le tina o le aiga.

Sa o’o lava ina faapea atu le ua molia i le tina o le aiga, a le tu’uina atu le telefoni, o le ia (le ua molia) fasiotia le tina.

O le mafua’aga lea na sulufa’i atu ai loa lenei tina i le fale o lona ‘Aunty’.  Ae sa le’i iloa e le tina, o lo’o mulimuli atu lana tama teine i ona tua.  Ma sa ta’ua e le tina, o le taimi atoa lava na fai atu ai le la tuliga ma lona to’alua i le fale a lona ‘Aunty’, sa valaau mai lona to’alua ia te ia, e maua loa o ia, fasioti loa.

I le mae’a o le fa’atalanoaina o le tina, sa maua ai e leoleo se valaau mai i isi leoleo, o le la ua mae’a ona ave faapagotaina le ua molia, ma o lea ua o latou aga’i atu nei i le Ofisa a Leoleo i Fagatogo.  Ina ua sauni leoleo ia e faatasi ma le tina, e malaga ese atu, sa talosagaina i latou e le tina, ina ia ‘ave’ese le ua molia mai i lo latou fale i Fagatogo, ona o lona popole i lo latou saogalemu ma si ana fanau.

Sa ta’ua foi e lenei tina, e le o se taimi muamua lenei ua tupu ai se faalavelave faapenei i lo latou aiga.

Ae e le’i amataina ona fa’atalanoaina e leoleo ia le ua molia, sa ia fa’ailoa mai i leoleo le tiga o lona itu tauagavale, lea na tau i lalo, ina ua pa’u mai i luga o se taualuga o se fale, i lana galuega.

Sa faapea loa ona valaauina e leoleo ia le vaega a le EMS mo se fesoasoani ma sa fa’amaonia le tulaga lelei o le soifua maloloina o le ua molia, e le EMS ma ia sainia ai se pepa e faamaonia ai lona te’ena o ni isi togafitiga.

Ua molia nei lenei alii i moliaga, e aofia ai;

Faitauga 1:  Faatupu Vevesi i totonu o lona aiga – o se vaega ‘C’ o solitulafono mama, e mafai ona nofosala ai se tasi i le falepuipui, i le o’o atu i le sefululima (15) aso, po o se sala tupe i le va o le $150 ma le $300; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona loka ai se tasi i le falepuipui, i le o’o atu i le tasi (1) tausaga, po o se sala tupe e $1,000; po o faasalaga uma e lua.

Faitauga 3:  Fa’ao’olima i lona tulaga e tolu – o se vaega ‘C’ o solitulafono mama, e mafai ona nofosala ai se tasi i le o’o atu i aso e sefululima (15), po o se sala tupe e i le va o le $150 ma le $300; po o fa’asalaga uma e lua.

Faitauga 4:  Faia o se tulaga e a’afia ai le saogalemu o fanau iti – o se vaega o solitulafono ‘A’ o solitulafono mama, e mafai ona nofosala ai se tasi i le o’o atu i le tausaga e tasi (1), po o se sala tupe e $1,000, po o fa’asalaga uma e lua.

E $1,000 le vaegatupe faatulagaina e mafai ona tatalaina ai le ua molia, e faatali ai lona faamasinoga.