Tu’ua’ia e se tamaitai 17 tausaga ia se alii i le titina ina ma le faamalosia o ia

Pago Pago - AMERIKA SAMOA

E lima ni moliaga ua tu’uaia ai nei e le malo ia le susuga ia Josaiah Pepe po o ‘Joker’ e pei ona valaau ai e tagata, ona o se faalavelave na tulai mai i le po o le aso 15 o Aperila, 2024.

O le taeao o le aso na soso’o ai, na valaau mai ai se tina i le Ofisa o Leoleo i Tafuna, ona o se tamaitai talavou na sulufa’i atu i lona aiga i le afioaga o Iliili, e saili se fesoasoani.

Sa faapea loa ona agai atu leoleo i le maota o lenei tina, ma feiloai ai ma le tamaitai talavou ua a’afia i lenei mataupu.

(E le o ta’ua i totonu o faamaumauga a le malo ia le suafa o le tamaitai talavou ua a’afia, seia vagana ai le suafa o le ua molia.)

Sa molimauina e leoleo le manu’a o le tamaitai ua a’afia ma sa tau ‘etu’etu mai lana savali, e agai mai i leoleo, ma sa molimauina foi e leoleo le palapala o ona lima ma ona vae, ma lona lauulu ve’uve’ua o lo o mau mai ai ni laula’au, faapea ma lona lausakete e foliga mai ua mago ai le toto.  Sa molimauina foi e leoleo ia ni maka i lona ua, e pei sa taumafai se tasi e titina.

Sa faamatalaina e lenei tamaitai i leoleo, i le va o le 10 ma le 11:00 i le po o le aso 15 o Aperila, 2024, a’o faatali sana taavale i luma o le fale maliu a le Tini Lam Yuen i Futiga, na savavali atu ai ni alii se toalua, fai mai o lo’o agai i lo latou aiga.

Ae peitai, na toe fo’i mai le tasi o i la’ua ia, le susuga ia ‘Muka’ ma ofoina atu ia te ia, ia se vaega o fualaau faasaina, o le Aisa, lea na ia tete’eina.

Mulimuli ane, sa alu atu le alii o Josiah Pepe po o ‘Joker’ ma fai atu e la te o i le latou fale.  Sa tete’e le tamaitai, ae i le tauanau a lenei alii, na i’u ai ina ioe le tamaitai.

A’o faia se la pele ma talatalanoa i le umukuka, sa fai atu Pepe i le tamaitai, e la te o i fafo e ula se la sikaleti.  E fa’alua ona o la o i fafo.  Mulimuli ane, ina ua lelava le tamaitai, sa ia taoto i luga o le nofoa, ae ua alu atu Pepe i le ta’oto i luga o se moega e latalata ifo i le nofoa.

Sa faamatala e le tamaitai, lona ala fa’alua i lea po.  O le taimi muamua na ala ai, sa ia maua ai Pepe o tilotilo i lana telefoni.  O lona ala faalua, sa ia vaaia ai Pepe o tu i tafatafa o le mea o lo’o ia moe ai.  Ma na fa’ate’ia o ia ina ua ia faalogoina ua tau le mafai ona manava, e pei o lo’o tau titina o ia e seisi.

Na ta’ua e le tamaitai, lona le toe iloa o seisi mea, seia o’o ina toe te’i ifo i le aso na soso’o ai, i le tiga o lona tino, i lalo o ni lala la’au ma ia tamo’e ai e saili se fesoasoani,

Na fesiligia le tamaitai e leoleo, ina ia fesoasoani e fa’asino atu le fale o le ua molia, ae peitai, e taunu’u atu leoleo, e leai seisi o i le fale.  Ma e foliga mai o se fale tu’ufua, ma o lo’o loka le faitoto’a.  Ae ina o le a toe tu’umuli ese atu leoleo, ae oso mai Pepe mai i le auala taavale o le fale ma lokaina mai ai loa o ia e leoleo, ma aveina atu i le Ofisa a Leoleo i Tafuna.

I le fa’aauauina o su’esu’ega a leoleo i le Ofisa Leoleo i Tafuna, sa fa’atalanoaina ai le ua molia ma sa ia ta’ua e faapea, o le fale na tupu ai le faalavelave, o le fale a sana uo teine ma o ia la e tausia ma faamamaina.

Ina ua fesiligia le ua molia e tusa ai ma le faalavelave na tupu, sa ia faamatalaina e faapea, a’o la aga’i atu ma sana uo i Iliili, e tami atu i Futiga, na o la va’aia se tamaitai o nofonofo na’o ia i luma o le fale maliu a Tini Lam Yuen.  Na o la fesiligia le tamaitai po o ‘okay’ o ia, ma fa’aauau ai le la savaliga i le latou fale i Iliili,

Ina ua mae’a le la taumafataga o le afiafi ma lana uo, sa o la savavali e momoli lana uo i le latou fale.  O lona toe fo’i mai, na ia toe tau mai ai i le tamaitai lea o lo’o saofai lava i luma o le fale a Tini Lam Yuen, ma ia fai atu loa iai, e sau la te o i lona fale e malolo ai.

Sa faamatala e Pepe, e pe a ma le 30 minute o la talatalanoa ma lenei tamaitai i totonu o le umukuka o le fale ma o le la toe fo’i mai i totonu o le fale, mai i le ulaina o la sikaleti i fafo, na ia fai atu ai i le tamaitai e la te o i le potu malolo e nofonofo ai.  Sa saofai le tamaitai i le nofoa o le potu malolo ma tautulemoe ai.

Na faamatala foi e Pepe, a’o tautulemoe le tamaitai, sa ia savali atu ma nofo i ona tafatafa ma fesili iai pe mafai ona o le momoe, ae musu le tamaitai.  Pe faalua na toe fesiligia e Pepe le tamaitai e la te momoe, ae tali mai lava le tamaitai, e leai.

Ae ina ua gase le moe a le tamaitai, sa faapea loa ona taumafai le ua molia, e titina le tamaitai i ona lima.  Ina ua matapogia le tamaitai, na vaaia e Pepe le tafe mai o le toto i gutu o le tamaitai, ma ia tago atu ai toso mai le lausakete a le tamaitai, ma solo ai ona gutu.  Ona tago lea o le ua molia i le po gutu o le tamaitai i ona lima.

Ina ua mautinoa e le ua molia ua le toe ala mai le tamaitai, sa ia amata loa ona faamalosia o ia.  Ma e faalima ona fa’amalosia e le ua molia ia le tamaitai.

Sa faamatala foi e le ua molia, ina ua mae’a ona ia toe fa’aofuina laei o le tamaitai, sa ia tosoina loa o ia i fafo i tua o le fale ma u’una’i le tamaitai i totonu o se pupuvao ma tiai ai o ia iina,

Ina ua fesiligia e leoleo ia Pepe i le mafuaaga ua ia faia ai lea tulaga, sa tali le alii, ona o lona ita i le tamaitai, ua fiu e oe ae musu e la te faiaiga.

Na mua’i togafitia e le vaega a le EMS ia le tamaitai ua a’afia, mulimuli ane, na faapea loa ona aveina atu i le falemai mo nisi su’esu’ega e fomai a le LBJ.  Ina ua mae’a lea, sa faapea ona toe fo’i le tamaitai i lona aiga.

O moliaga ua fa’asaga nei ia Pepe, e aofia ai;

Faitauga 1:  Fa’ao’olima i le tulaga muamua – o se vaega ‘B’ o solitulafono mamafa, e mafai ona nofosala ai se tasi i le falepuipui, i le va o le lima (5) ma le sefululima (15) tausaga.

Faitauga 2:  Taofiofi o se tagata faasolitulafono – o se vaega ‘C’ o solitulafono mamafa, e mafai ona nofosala ai se tasi i le falepuipui, i le le silia ma le fitu (7) tausaga, po o se sala tupe e le silia ma le $5,000; po o faasalaga uma e lua.

Faitauga 3:  Faamalosia o se tamaitai e la te faiaiga – o se vaega ‘B’ o solitulafono mamafa, e mafai ona nofosala ai se tasi i le va o le lima (5) ma le sefululima (15) tausaga.

Faitauga 4:  Faiaiga faamalosi – o se vaega ‘B’ o solitulafono mamafa, e mafai ona nofosala ai se tasi i le va o le lima (5) ma le sefululima (15) tausaga.

Faitauga 5:  Faia o ni tulaga e a’afia ai le saogalemu o se tamaititi/teineititi – o se vaega ‘A’ o solitulafono mama, e mafai ai ona faasala se tasi i le falepuipui, i le le sili atu ma le tasi (1) tausaga, po o se sala tupe e le silia ma le $1,000 po o fa’asalaga uma e lua.

O lo’o ta’ua i faamaumauga a le malo, le leai o se vaegatupe na faatulagaina e mafai ona tatalaina ai le ua molia, mai i le falepuipui.