Molia se alii i lona fa’ao’olima i seisi alii i le latou ta’aloga piliaki

Pago Pago - AMERIKA SAMOA

O le aoauli o le aso 13 o Aperila, 2024, na o’o atu ai se tamaloa i le Ofisa a Leoleo i Tafuna e faila sana tagi e fa’asaga i ni alii se to’atolu mai i le afioaga o Leone, ona o lo latou fasi to’atele o lona ‘nephew’.

Sa faamatala e le tamaloa (uncle) i leoleo, sa telefoni atu seisi o ona tausoga e uiga i lona ‘nephew’ le la ua ave i le falemai.  Ina ua taunu’u le ‘uncle’ i le falemai, sa faamatala ifo iai e le fomai na togafitia lona ‘nephew, o le faamatalaga a le tagata na lipotia le fa’alavelave, e foliga main a pa’u lona ‘nephew’ ma tau lona ulu i le fasitepu, lea na manu’a ai lona ulu.

Ae peitai, sa ta’ua e le ‘uncle’ i leoleo, e na te silafia, e le i pa’u lona ‘nephew’ ona e manu’a lona ulu, papatua ma ona foliga.

Ma i se taimi mulimuli ane, sa faamatalaina ai e le ‘nephew’ i lona ‘uncle’ e faapea, sa o latou piliaku ma ni alii, ae ina ua sau i fafo e ula sana sikaleti, na tu’i o ia e se tagata ma matapogia ai.  Sa ta’ua foi e le ‘nephew’, o i latou na iai faatasi i lea taimi, na aofia ai Wales, Sio ma Poasa.

Sa faapea loa ona aga’i atu leoleo i le nofoaga na tupu ai le faalavelave mo le sailia o nei alii ma sa faapea ona mauaina i latou e leoleo ma aveina uma i le Ofisa a Leoleo i Tafuna mo le fa’aauauina o a latou su’esu’ega.

Ina ua fa’atalanoaina e leoleo le molimua muamua, sa ia faamatalaina lo latou iai i fafo o le fale piliaki ma le ua a’afia i lenei fa’alavelave, ma sa ia faia se tala sa le fiafia ai le susuga ia Wales Faaiviivi.  Ma o le mafuaaga lea na tu’i ai e Faaiviivi le ua a’afia ma pa’u atu ma tau lona ulu i luga o le sitepu sima.  Ona toe tago lea o Faaiviivi ma u’u mai se nofoa ma ta ai le papatua o le alii na manu’a i lenei faalavelave.   Sa ta’ua foi e le molimau muamua, na fa’alua ona tu’i e Faaiviivi le alii na manu’a ma toe pa’u atu ai ma toe tau leisi itu o lona ulu i lalo.

Sa faamatala e le molimau muamua, ina ua pa’u le alii ua a’afia i lenei faalavelave, sa ia tamo’e loa e saili se fesoasoani.

Na ta’ua foi e le molimau lona lua, o Faaiviivi sa na ia tu’iina le ua a’afia, ma pa’u atu ma tau lona ulu i le sitepu sima ma sa ia faamaonia foi le fa’aaogaina e Faaiviivi o se nofoa e ta ai le ua a’afia, a’o matapogia o ia.

Ua molia ai nei le susuga ia Wales Faaiviivi, i moliaga e lua, e aofia ai;

Faitauga 1:  Fa’ao’olima i lona faitauga e lua – o se vaega ‘D’ o solitulafono mamafa, e mafai ona nofosala ai se tasi i le falepuipui, i le le sili atu ma le lima (5) tausaga po o se sala tupe e le sili atu ma le $5,000; po o faasalaga uma e lua.

Faitauga 2:  Faatupu Faalavelave i nofoaga faitele – o se vaega ‘B’ o solitulafono mama, e ono faasala ai se tasi i le le silia ma le ono (6) masina po o se sala tupe e le silia ma le $5,000; po o fa’asalaga uma e lua.

E $5,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.