POU TIUTE A LEOLEO

Pago Pago - AMERIKA SAMOA

O le aso 13 o Aperila, 2024, na fa’afeso’ota’i ai e se tina ia le Ofisa a Leoleo a Tafuna, e lipotia ai lona to’alua lea ua ia solia se faatonuga faalefaamasinoga, e fa’asa ai ona alu atu i le fale o iai o ia (tina) ma le fanau.

(Ua le lomia e le Samoa News suafa o i latou ua a’afia i lenei mataupu, aua le puipuiga o le tina ma le fanau).

E tusa ai ma faamaumauga a le malo, na alu atu le ua molia i le fale a lona toalua, ona o le fia vaai i lana fanau, ae sa fai mai iai le tina, ua fa’asa le ua molia, mai lona fale.  Ma ina ua fai mai foi iai le tina, i le ua molia, e le mafai ona ia toe vaai i lana fanau, sa suia ai loa uiga o le ua molia, ma amata ona ‘e’e atu mai fafo o le fale, ma faatonu lana fanau e o e feosofi i totonu o le taavale.

Na avea le leotele o le ua molia, ma tulaga na fefefe ai le fanau.

Ma o iina, na valaau ai loa le tina i leoleo mo se fesoasoani.  Ae ina ua silafia e le ua molia, o la ua valaau leoleo, sa ia sola ese ai loa, i totonu o lana taavale.

A’o agai mai leoleo i le maota o le tina, e tali le valaau mo se fesoasoani, sa vaaia e leoleo se taavale i luga o le alatele i Nu’uuli, o lo’o aga’i atu i matu ma o taofia ai loa le taavale.

Na fa’ailoa atu e leoleo i le ua molia, le taofia o ia ona o lona solia o se faatonuga faalefaamasinoga, lea e faasa ai o ia mai lona alu i le fale o iai le tina ma le fanau.

Sa tali le ua molia, na fia vaai i lana fanau.

Na faapea loa ona lokaina o ia e leoleo ma tu’uina atu i totonu o le taavale mo le aveina atu i le ofisa leoleo i Tafuna, ae fa’afoeina atu e seisi leoleo lana taavale, e lokaina foi i le lotoa a le ofisa a leoleo i Tafuna.

Ina ua taunuu i Tafuna sa fa’aali atu e leoleo i le ua molia ia le faatonuga faalefaamasinoga lea e faatonuina ai o ia e aua ne’i toe alu i le fale a lona toalua ma lana fanau, ae saunoa mai le ua molia, ua uma ona faaleaogaina lea mataupu.

Ae peitai, o lo’o tusia i luga o le ‘restraining order’, sa faia lenei faatonuga i le aso 11 o Ianuari, 2024 mo le tausaga atoa.  Ma na toe faatonuina ai loa le ua molia, e aua ne’i ona toe taumafai e alu i le fale pe fa’afetaui ia lona toalua.

O se taimi mulimuli ane, sa suesueina ai e leoleo ia le taavale a le ua molia ma mauaina ai i totonu o le nofoa ia se ato uliuli, na iai i totonu ia se paipa mata’eta’e, na iai totonu se aisa; faapea seisi tamai ato ma ni pepa iila se lua, o iai totonu ni ‘straws’ lanumeamata ma le pa’epa’e, e sefulu fa (14), lea foi na maua ai i totonu ni aisa; ma ni sikaleti ta’ai se ono (6) o iai ni laulaau lanumeamata.

O nei mea uma sa tu’uina atu i a’ao o le vaega a leoleo e gafa ma fualaau faasaina mo sa latou suesuega.

Ua molia nei lenei tagatanu’u a Amerika Samoa, i moliaga;

Faitauga 1:  Faatupu Vevesi i totonu o Aiga – o se vaega ‘B’ o solitulafono mama, e mafai ona loka ai se tasi i le o’o atu i aso e sefululima (15), po o se sala tupe e $300; po o faasalaga uma e lua.

Faitauga 2:  Le Usitaia Faatonuga Faafaamasinoga – o se vaega ‘B’ o solitulafono mama, e mafai ona fa’afalepuipui ai se tasi i le o’o atu i le ono (6) masina, po o se sala tupe e $500; po o faasalaga uma e lua.

E $500 le vaegatupe faatulagaina e mafai ona tatalaina ai le ua molia, e faatali ai lona faamasinoga.

PULETOFI KELESOMA

O le vaveao o le aso 14 o Aperila 2024, na lokaina ai e leoleo se mafine i Tafuna, i lona tete’e i se faatonuga a leoleo, e tu’u lana inu pia i se fale faatali pasi i luma o le ASPA.  Sa faatonuina foi o ia  e leoleo, ina ia tu’ua le fale faatali pasi

Ae peitai, a’o fa’aauau pea tiute a leoleo i lea vaveao, na toe vaaia ai foi lenei mafine, ua toe fa’aauau foi lana inuga pia i le fale faatali pasi ma palauvale solo.  Sa toe faatonuina foi o ia e leoleo e alu ese ma le fale faatali pasi.

Ae na toe vaaia foi e leoleo, i se taimi mulimuli ane, i le fale faatali pasi i tafatafa o le TSM, ia le mafine lava lea e tasi, o inu pia mai ai foi iina.  E agai atu iai leoleo, ae palauvale mai iai le mafine ma ave faapagotaina loa o ia e leoleo, ma aveina atu i le ofisa a leoleo i Tafuna.

Ua molia nei lenei mafine i moliaga e lua;

Faitauga 1:  Inu pia/ava malosi i nofoaga faasaina – o se vaega ‘B’ o solitulafono mama, e mafai ona fa’afalepuipui ai se tasi i le ono (6) masina, po o se sala tupe e $500; po o faasalaga uma e lua.

Faitauga 2:  Faatupu Vevesi i nofoaga faitele – o se avega ‘B’ o solitulafono mama, e mafai ona faafalepuipui ai se tasi i le ono (6) masina, po o se sala tupe e $500; po o faasalaga uma e lua.

E $300 le vaegatupe faatulagaina e mafai ona tatalaina ai le ua molia mai i le falepuipui.