POU TIUTE A LEOLEO

MOLIA SE ALII I LE FA’AO’OLIMA ONA O LONA ITA INA UA LAUINA LONA ‘AI ‘AISA

O lo’o aofia i faamaumauga a leoleo ia se fa’alavelave na tula’i mai i le po o le aso 9 o Aperila, 2024, ina ua telefoni mai se mafine mai i le afioaga o Fagalii, i le Ofisa a Leoleo i Tafuna, e lipotia se alii na fa’ao’olima i lona ‘nephew’ e 15 tausaga le matua.

Na agai atu leoleo i le nofoaga na tupu ai le faalavelave ma ina ua taunu’u atu sa faasino ifo iai e le aiga ia le ua molia, ae ina ua iloa mai e lenei alii ia leoleo, sa faapea ona tamo’e faatopetope agai i le mauga i tua o le latou fale.  Sa tuliloaina o ia e leoleo, ae peitai, e le’i mauaina o ia.

O se taimi mulimuli ane, na faatalanoaina ai e leoleo ia se tasi o molimau ma sa ia ta’ua e faapea, na o latou ta’a’alo volipolo i luma o le latou fale ma lona tuagane latiti (lea na a’afia i lenei mataupu), ma na fai ai se tala tausua a lona tuagane, i le ula aisa a le ua molia.  Ma ina ua alu atu lona tuagane e aumai le polo sa i lalo o le neti volipolo, ae tago ai le ua molia, i le keke le polo i foliga o le alii 15 tausaga.

Sa ta’ua foi e le molimau le fesiligia e lona tuagane ia le ua molia, po o iai se mea o mana’o ai.  Ae savali atu le ua molia ma tatu’i lona tuagane.  Ma na ta’ua e le molimau, lona oso atu ma taumafai e vaovao misa ae tau ai nisi o tu’i a le ua molia, ia te ia.

Ma na tago foi le ua molia, i le u’u mai se poloka sima ma taumafai e tu’i ai le molimau ma lona tuagane, e pei ona faamatalaina e le molimau i leoleo.

Sa ta’ua foi e le molimau le alu o le ua molia, i lona fale, ma aumai se agaese ae na oso mai lona tama ma se’i ese atu le agaese.  

Ae o le taimi lena ua valaau ai le tina o le ua molia, i le ofisa a leoleo, mo se fesoasoani.

Ina ua mae’a ona faatalanoaina le molimau, sa faapea loa ona faatalanoaina e leoleo ia le alii 15 tausaga lea na a’afia i lenei mataupu ma sa ia lagolagoina le molimau a lona tuafafine, e o’o lava i le poloka sima ma le alu o le ua molia ma aumai se agaese.

Sa fautuaina loa e leoleo ia le aiga, e valaau atu lo latou ofisa pe a toe fo’i atu le ua molia, i le fale.

Ae o le po lava lea e tasi, na o’o atu ai le ua molia ma lona tama, i le ofisa a leoleo i Tafuna.

Ma ina ua faatalanoaina o ia e leoleo, sa ia ta’ua lona le fiafia ina ua ula atu le alii 15 tausaga i lona ‘ai ‘aisa, a’o latou ta’a’alo volipolo.  Ma o le mea lea na ia tatu’iina ai le alii talavou lea.

Ua molia nei lenei alii e 23 tausaga le matua;

Faitauga 1&3:  Fa’ao’olima i lona tulaga e tolu – o se vaega ‘A’ o solitulafono mama, lea e nofosala ai le tagata i le falepuipui, i le o’o atu i le tausaga e tasi (1), po o se sala tupe e $1,000; po o solitulafono uma e lua.

Faitauga 2:  Faia o se gaioiga na a’afia ai le saogalemu o se tamaititi/teineititi – o se vaega ‘A’ o solitulafono mama, lea e mafai ona nofosala ai se tasi i le o’o atu i le tausaga e tasi (1); po o se sala tupe e $1,000; po o fa’asalaga uma e lua.

E $2,000 le vaegatupe sa faatulagaina e tatalaina ai i tua, le ua molia, e faatali ai lona faamasinoga.

MOLIA SE ALII TONGA I LE FA’AO’OLIMA I LONA TO’ALUA MA LONA AFAFINE 4 TAUSAGA

O le afiafi o le aso 11 o Aperila, 2024 na valaau ai se tina i le Ofisa Leoleo i Fagatogo mo se fesoasoani, ona o le sauaina o ia e lona to’alua i lo latou fale i Aua.

E tusa ai ma faamaumauga a leoleo, ina ua agai atu leoleo i le nofoaga na tupu ai le faalavelave, sa vaaia se alii o saofai mai i fafo o le fale, o le susuga lea ia Samipaea Pahulu, lea ua molia i lenei fa’alavelave.

I le faatalanoaga a le tina ole aiga, sa ia faamatalaina lona iai ma ona alo tamaitai i totonu o le latou fale, ina ua ulufale atu le tama o le aiga ma se’i le palaka o le latou ili eletise.  Ma na iloa atu e le tina le fa’asuaava o lona toalua, o le mea lea na le fai mai iai sana faamatalaga.

Ae sa faate’ia le tina o le aiga, ina ua tu mai lona to’alua, ma po faatolu lona gutu, ae u’unai i lalo, le la tama teine e 4 tausaga.  O le tagi leotele o le teineititi 4 tausaga, na tamo’e ai loa le fafine i le fale o le latou tuaoi e fa’aaoga le latou telefoni, e valaau ai leoleo mo se fesoasoani.

Sa ta’ua e lenei tina, o so’o se taimi lava e fa’asuaava ai le tama o le aiga, e na te tu’uaia lava o ia (tina) i se mea na te le’i faia, ma fasi o ia (tina).

Na ofoina atu e leoleo le latou auaunaga mo le aveina o le tina ma lona alo i le falemai, ae sa tete’e le tina.

Sa faapea loa ona lokaina mai e leoleo le tama o le aiga ma ua molia nei o ia i le Fa’ao’olima i lona Tulaga e Tolu – o se vaega ‘A’ o solitulafono mama, lea e mafai ona faafalepuipui ai se tasi, i le o’o atu i le tasi (1) tausaga, po o se sala tupe e i le va o le $150 ma le $1,000; po o faasalaga uma e lua.