MOLIA NI ALII I LE SASAINA O SE TAMAITITI 16 TAUSAGA I LE LAU O LE NAIFI

Pago Pago - AMERIKA SAMOA

O le aso 29 o Mati, 2024 sa telefoni ai se mafine i le Ofisa a Leoleo i Tafuna mo se fesoasoani, ona o ni alii se toalua, ua solia lo latou fale e aunoa ma se faatagana, ma fa’ao’olima i lona tuagane e 16 tausaga, i se agaese.

E tusa ai ma faamaumauga a leoleo, o lenei faalavelave sa tula’i mai i le afioaga o Fogagogo ma sa ta’ua e le fafine na valaau atu i le ofisa a leoleo, le sasaina e i la’ua ua molia, ia lona tuagane i le lau o le agaese.

Sa faapea loa ona aga’i atu leoleo i Fogagogo ma feiloai ai ma le tua’a o alii talavou ia sa a’afia i lenei mataupu.

Na fa’amatala e lenei tama, sa faia sana malologa i totonu o lona potu ae tamo’e atu lona ‘nephew’ ma fa’ailoa atu ia te ia, o lo’o tuli o ia e Ekueta Fa’afao, i se ma’a, i totonu o le fale, ae o Solomon Ta’avao, o lo’o tuliina ia le alii 16 tausaga ma se agaese (o le alii 16 tausaga, o le atalii a le tama lea o lo’o fa’atalanoa e leoleo).

Sa ta’ua e le tama lona taumafai e fa’ato’ato’a le mataupu, ae peitai, sa le i fia fa’alogo mai ia Fa’afao ma Ta’avao ia te ia.  O le mea lea sa ia u’uina mai ai loa se pate pesipolo ma taumafai e puipui lana fanau e to’alua mai ia i la’ua ua molia. 

Na faamatala foi e le tama lona popole tele i le saogalemu a lona aiga, ae le gata i lea, o lona le mafai ona taofiofia lona uso ma ona atalii pe afai ae tula’i mai se tulaga sili atu ona tuga, o le mafuaaga lea na ia faatonuina ai lona afafine, e valaau leoleo mo se fesoasoani.

Ina ua mae’a ona talanoa leoleo ma lenei tama, sa fa’asino loa iai e le tama ia le mea o iai i la’ua ia ua molia.  Ma na maua atu i la’ua e leoleo, o lo’o nofonofo mai i luma o le la fale.  Sa faapea loa ona lokaina mai i la’ua e leoleo ma aveina atu loa i le ofisa a leoleo, mo le fa’aauauina o a latou suesuega.

Sa faapea foi ona fa’atalanoaina e leoleo ia alii talavou ia sa a’afia i lenei mataupu.

Ma na faamatala e le alii talavou #1, a’o fai sana moagavao, na fa’ate’ia o ia ina ua tuma tua o lona ulu e Fa’afao ma fesili atu po o ai na faatonuina o ia e moa le vao.  O le mea lea na ia (alii talavou) tamo’e ai i totonu o le latou fale e ta’u i lona tama le mea lea ua tupu.

I le faatalanoaina o le alii talavou #2, sa ia faamatalaina i leoleo, lona iai i totonu o le fale ae te’i ua alu atu ia Ta’avao ma sasa lona vae i le lau o le naifi, ma tuli solo o ia i totonu o le fale.  E leai ni manu’a o le alii talavou.

Ina ua faatalanoaina e leoleo ia Fa’afao sa ia ta’ua e faapea, sa le fiafia o ia ina ua alu atu i le fale, o moa mai e le alii talavou #1 ia le vao, ona o ia e tautua i lona tama, le matai o le aiga.  O le mea lea na alu atu ai ma fesiligia le alii talavou po o ai na faatonuina o ia e moa le vao ma se’i ese le moa vao.

Ae i le faamatalaga a Ta’avao, sa le fiafia o ia ina ua ia vaaia le tuli mai e lona uso o le alii talavou #1, ma ia alu atu ai loa ma le agaese i le fale o lenei alii talavou ma sasa le uso laititi a le alii talavou, i le lau o le naifi.

Ua molia nei ia Fa’afao i moliaga e lua, ae tolua moliaga ua tu’uaia ai Ta’avao.

Faitauga 1:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai se tagata i le falepuipui, i le le silia ma le tausaga e tasi (1), po o se sala tupe e le sili atu ma le $1,000; po o faasalaga uma e lua.

Faitauga 2:  Faomea i lona tulaga e lua – o se vaega ‘C’ i solitulafono mamafa, e mafai ona nofosala ai se tagata i le le sili ma le fitu (7) tausaga, po o se sala tupe e le sili atu ma le $1,000; po o faasalaga uma e lua.

O le moliaga faaopoopo a Ta’avao, e aofia ai le;

Faitauga 3:  Faia o se tulaga e a’afia ai le saogalemu o se tamaititi/teineititi – o se vaega ‘A’ o solitulafono mama, lea e mafai ona nofosala ai i le le sili atu ma le tausaga e tasi (1), po o se sala tupe e le sili atu ma le $1,000; po o fa’asalaga uma e lua.

E $5,000 le vaegatupe faatulagaina e mafai ona tatalaina ai i tua Fa’afao mai i le falepuipui, e faatali ai lona faamasinoga, ae e $10,000 mo Ta’avao.