Molia se tamaloa i le faatupu vevesi i totonu o lona aiga

Pago Pago - AMERIKA SAMOA

E tusa ai ma faamaumauga a leoleo, o le afiafi o le aso 7 o Aperila, 2024, na telefoni mai ai se tina mai i Faleniu, i le Ofisa o Leoleo i Tafuna, mo se fesoasoani ona o se au uso e toalua, o lo’o fufusu i totonu o lona fale.

Ina ua taunuu atu leoleo i le maota o lenei tina, sa va’aia ai le tina o lo’o saofai mai fafo o lona fale, ma tagi.

Sa faapea ona talanoa lenei tina ma se tasi o leoleo ma faamatalaina iai e le tina le mea sa tupu.  Na ta’ua e le tina lo la auai atu ma lona to’alua i se pati a le latou au lotu na faia i le fale’aiga a le Jade i Nu’uuli.  Ma i lea pati, sa taumafaina ai uaina ma pia.

Na ta’ua e le tina, ina ua o latou fo’i atu i le fale ma lona to’alua, sa o la tau upu atu i totonu o le taavale, seia o’o lava i le fale.

Ina ua o la taunu’u i le fale, na oso mai le uso a lona toalua, e taumafai e fa’afilemu le la misa.

O le faamatalaga a le tina, e mafua ona faapea lona to’alua, ona o lona inu pia ma o le mafuaaga lea na la misa ai i totonu o le taavale, ona o lona augani atu i lona toalua, e tu’u ia lona inu pia, ae fa’asaoasaoa ai e lona to’alua le taavale, ae o lo’o iai le la fanau to’alua i totonu o le taavale.

(O le a le lomia suafa o i latou ua a’afia i lenei mataupu, aua le puipuiga o fanau iti.)

Sa faamatalaina foi e le tina, le fa’ateteleina o le la pisa ma lona to’alua, ina ua taumafai lona toalua e fafagu lo la alo tamaitai e 8 tausaga, e ala i le po ina o ona vae.  Ma na fiu e ‘ai’oi atu i lona to’alua, ua lava, ae fa’aauau lava le gaioiga a lona toalua ma pa’u fa’afia ai o ia, a’o taumafai lona aiga e taofiofi lona to’alua.

Ina ua fesiligia e leole ia le tina po o fea o iai lona to’alua, sa ta’ua e le tina, o la ua alu i le ta’avale, ae e le’i te’a lona ona.

Sa fa’atalanoaina foi e leoleo ia se tasi o le aiga – lea o lo’o ta’ua o le molimau – ma sa faamatala e lenei molimau le tele o ava malolosi sa inumia e le ua molia, i le pati a le lotu lea sa faia i le faleaiga a le Jade.  Ma e ui ina sa fautuaina le ua molia, e toeaiina o le ekalesia ina ia tu’u le ta’avale e faafoeina e seisi, ae peitai, sa oso lava le ua molia i le nofoa avetaavale, faatasi ai ma lona to’alua ma le la fanau e to’alua.

Na faamaonia foi e le molimau le tupu o se misa i le va o le tina ma le ua molia, ina ua taunu’u i le fale ma o’o ai lava ina pa’i lima, a’o taumafai se tasi o le aiga e faato’afilemu i la’ua, ae peitai, na i’u ina a’afia ai le aiga atoa, ma i’u ina pa’u atu ai le ua molia ma lavea i se laupapa.

Sa ta’ua foi e le molimau, o le tina e fa’ato’a atoa le vaiaso o lana pepe fou.

A’o talatalanoa leoleo ma le molimau, ae toe fo’i atu le taavale a le ua molia.  Ma na alu atu iai se tasi o leoleo ma faatonuina o ia e sau i fafo o le taavale, ae tago le ua molia i le loka mai faitotoa o le taavale, ma musu e sau i fafo.

Na i’u lva ina tatalaina faitoto’a o le taavale, ae fa’aauau pea ona musu le ua molia, e usitai i faatonuga a leoleo, e sau i fafo ma le taavale.

Ma e pei ona ta’ua i faamaumauga a leoleo, sa o latou lagonaina le manogi pia o le ua molia ma totonu o le taavale.  O lea na fa’amalosia ai loa ona ave’ese mai o ia, e leoleo, mai totonu o le taavale.  Ae fa’aauau pea ona tete’e le ua molia, e ala i lona mau i le foeuli o le taavale.

Na o’o foi ina ua mafai ona ave’ese mai le ua molia mai i totonu o le ta’avale, ae tago i le sulu ona lima i lalo o lona manava ma taoto fa o, ina ia le mafai ai e leoleo ona loka ona lima.  Ae sa mafai e leoleo ona lokaina mai ona lima ma tu’uina o ia i totonu o le taavale leoleo, ma aveina atu loa o ia i le Ofisa a Leoleo i Tafuna, lea na togafitia ai ona manu’a.

A’o togafitia le ua molia e le vaega a le EMS, sa ia talosaga e ave o ia i le falemai (LBJ) ona o le tiga o le itu taumatau o lona ulu.  Sa faapea loa ona fa’afeao atu e leoleo ia le taavale a le EMS sa aveina atu ai le ua molia, i le LBJ, lea na su’esu’eina ma togafitia ai ona manu’a, ma toe tatalaina mai ai o ia i tua i lea lava afiafi.

Sa faapea foi ona su’esu’eina le tina e le vaega a le EMS ma aveina atu ai i lea foi afiafi, i le LBJ mo ni isi su’esu’ega ma togafitia ona o le faafaigata o le taimi sa ia fanauina ai lana pepe i ni nai vaiaso e le’i leva, ae le gata i lea, o le tele o taimi na pa’u ai i le taimi o le faalavelave.

Ae ua molia nei le tama o le aiga i moliaga e lua, e aofia ai;

Faitauga 1:  Tete’e a’o taumafai leoleo e ave faapagota o ia – o se vaega ‘A’ o solitulafono mama, lea e mafai ona nofosala ai se tagata i le falepuipui, i le o’o atu i le tasi (1) tausaga, po o se sala tupe e $1,000; po o faasalaga uma e lua.

Faitauga 2:  Faatupu Vevesi i totonu o lona aiga – o se vaega ‘C’ o solitulafono mama, e mafai ona nofosala ai se tasi i le o’o atu i le sefululima (15) aso, po o se sala tupe e i le va o le $150 ma le $300; po o faasalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.