POU TIUTE A LEOLEO

Pago Pago - AMERIKA SAMOA

TALOSAGA LE USO E AVE E LOKA INA NE’I SALA LO LATOU AIGA

Ua molia nei le susuga ia Vaioletama Filisounuu i le Faatupu Vevesi i totonu o aiga, o se vaega ‘C’ o solitulafono mama, lea e mafai ona fa’asala ai i le falepuipui, i le o’o atu i aso e sefululima (15), po o se sala tupe e i le va o le $150 ma le $300; po o fa’asalaga uma e lua.

E $300 le tupe faatulagaina e mafai ona tatalaina ai o ia i tua, e fa’atali ai lona faamasinoga.

E tusa ai ma faamaumauga a leoleo, o le 4:46 i le afiafi o le aso 3 o Aperila, 2024 na valaau atu ai se mafine i le 911, e lipotia se tamaloa ua fa’asuaava, ma faapisa i totonu o le latou aiga, i Pavaiai.

Ina ua taunuu leoleo i le maota o lenei mafine, sa ia faamatalaina i leoleo ia le alu o le aso atoa o inu pia ia Filisounuu, faapisa ma palauvale solo i o latou tuaoi.

E le gata i lea, sa faamatala foi e lenei mafine, le faamisamisa ma le palauvale o Filisounuu i lona uso, i le po atoa.

Sa fa’atalanoaina e leoleo ia le uso a le ua molia, ma sa ia faamatalaina le tula’i mai o se vevesi i lo la va ma lona uso (Filisounuu) ona o lona inu pia so’o.

Sa faamatala foi e le uso a le ua molia, na i’u lava ina faa’amata’uina o ia e lona uso (Filisounuu).  Na ta’ua foi e le uso a le ua molia, ia lona le fiafia i le palauvale o le ua molia, ae o lo’o fa’alogo lona tuafafine.  Sa ta’ua e le uso a le ua molia, lona mana’o ina ia lokaina Filisounuu ona e i’u ina sala le latou aiga, i totonu o le nu’u ona o le amioga a Filisounuu.

Sa aveina loa e leoleo ia Filisounuu.

MOLIA SE ALII MAI FITI I LE FA’AO’OLIMA I LONA TINA

O le aso 30 o Mati, 2024, na telefoni ai se tina i le Ofisa a Leoleo mo se fesoasoani ona o sona alo alii, ua fa’ao’olima ia te ia.

E tusa ai ma fa’amaumauga a le malo, le taunu’u o leoleo i le maota o le tina ma sa faasino iai e leoleo ia lona alo lea ua molia i le fa’ao’olima, ma sa faapea ona lokaina mai le ua molia, e leoleo, ma aveina atu o ia i le Ofisa a Leoleo i Tafuna.

Sa faamatalaina e le tina na valaau e leoleo, le palauvale atu a lona alo ia te ia, ma faatonu o ia e alu ese ma lona fale.  E le gata i lea, sa ta’ua e le tina le u’una’I fa’alua o ia e le ua molia ma ia pa’u ai i lalo, ae taumafai le ua molia, e tu’i o ia.

Sa ta’ua foi e le tina ia le fa’asuaava o le ua molia.

Ua molia nei le susuga ia Gabriel Naitaka, i moliaga e lua, e aofia ai;

Faitauga 1:  Faatupu Vevesi i totonu o lona aiga – O se vaega ‘C’ o solitulafono mama, lea e mafai ona nofosala ai se tasi i le falepuipui, i aso e sefululima (15), po o se sala tupe i le va o le $150 ma le $300; po o fa’asalaga uma e lua.

Faitauga 2:  Fa’ao’olima i lona tulaga e tolu – O se vaega ‘A’ o solitulafono mama, lea e mafai ona nofosala ai se tasi i le falepuipui, i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.