TALA I VAIFANUA

Pago Pago - AMERIKA SAMOA

TOLOPOINA LE TU’UGA FAUTASI

I se fa’aaliga mai i le Ofisa a le Kovana i le aoauli ananafi, na fa’alauiloa mai ai le toe tolopoina o Tu’uga Fautasi o le Sisiga Fu’a, i le aso Lua o le vaiaso fou, Aperila 23, 2024.

O lo’o ta’ua i le fa’aaliga mai i le Ofisa a le Kovana, ona o tulaga faaletonu i tala o le tau faapea le puipuiga o auva’a ta’itasi, o lea sa tasi ai i le afioga i le Lutena Kovana, le tofa ia La’apui Talauega E. V. Ale, faapea le Failautusi o Mataupu tau Samoa, le afioga i le Maopu ia Mauga T. Asuega, o kapeteni o Sa ma sui mai i afioaga eseese, na auai atu i se fonotaga sa faia i le aso ananafi, le toe tolopoina o fa’agatama i le tai.

E le gata ina malilie uma ina ia faatali se’i toe malu le tai, ae ia faapea foi ona tu’u tu’u atu i tua le pine e amata mai ai le tu’uga va’a o lenei tausaga.

TAPUNIA TAUTUA A LE MALO O AMERIKA SAMOA MO LE FA’AMAMALUINA O LE SISIGA FU’A 2024

O le vaiaso ua mavae na fa’alauiloa mai ai, e ala i se fa’aaliga fa’alauaitele, mai i le Ofisa o le Kovana, ia le avea o le Aso Lulu, Aperila 13, 2024 ma aso malolo, e aloaia ai le Sisiga Fu’a lona 124 a le teritori o Amerika Samoa.

Ae o le aso ananafi, sa toe fa’asalalauina ai seisi fa’aaliga fa’alauaitele mai i le Ofisa o le Kovana, e fa’ailoa mai ai le malolo o le malo, i le aso nei, Aso Lua, Aperila 12, 2024), ma le aso a taeao, Aso Lulu, Aperila 13, 2024, aua le fa’amamaluina o le Sisiga Fu’a a Amerika Samoa.

E pei ona masani ai i aso malolo uma a le malo, se’ia vagana ai ofisa faigaluega e mana’omia tele ona tatalaina, o le a faapea ona tapunia uma ofisa a le malo.

Ma i se fa’aaliga mai i Ofisa o Aoga a le malo, ua faapea foi ona tapunia uma a’oga a le malo, mo nei ma le aso a taeao.

E faapena foi i se fa’aaliga mai i le Ofisa a Tagata Matutua (TAOA), ua fa’alauiloa mai ai le le faataunu’uina o le tautua mo taumafataga a tama ma tina matutua, i le aso ma le aso a taeao.

E tusa ai ma le fa’aaliga fa’alauaitele sa sainia e le afioga i le Kovana, Lemanu P. S. Mauga, o nei aso malolo, e le gata e mo le fa’amamaluina o le Sisiga Fu’a a le malo, ae faapea foi ona avea ma se taimi taua e mafai ona fa’aaluina e tagata faigaluega a le malo ma o latou aiga.

I se fa’aaliga mai i le Ofisa o le Soifua Maloloina, o le a faapea ona tapunia ai a latou ofisa i le aso Lulu, Aperila 17, e aofia ai ma le latou Pharmacy i Tafuna.  O le fale talavai i le falema’i tele i Faga’alu, o le a tatalaina i le 8 i le taeao, ae tapunia i le 12 i le aoauli i le aso Lulu.  Ae o le a tatalaina le falemai i Tafuna, mo na’o gasegase fa’afuase’i.

MANUMALO IA LE ‘AU LAKAPI A LE ‘ISLANDERS’ I LE TA’AMILOSAGA LAKAPI A LE ASRU

O le aso Toonai o le vaiaso ua mavae, sa faataunuuina ai le ta’aloga o le sailiga siamupani a le Liki Lakapi a le Iuni Lakapi a Amerika Samoa (ASRU) lea sa lagolagoina malosi e le kamupani a le McConnell Dowell, i le va o le Barbarian Brothers ma le Islanders.

Na iai se manatu maualuga a le to’atele o le ‘au maimoa, o le a tula’i mai le ‘au a le Barbarian e osi le manumalo o lenei tausaga, talu ai le latou fa’ato’ilaloina o le ‘au a Avele (26-5) i le latou ta’aloga muamua, ona soso’o mai ai lea ma le latou manumalo i le ‘au a Bula Fiji (12-0), i le latou ta’aloga i le lua vaiaso ua mavae.

Ae peitai, sa le’i tu’umamaina e le Islanders lo latou tali atu i osofaiga a le Barbarians, ma ina ua ili le fa’ili e fa’amae’a ai le afa muamua o le ta’aloga, o lo’o sili ‘ai a le Islanders, 5-0.

O le faaiuga o le ta’aloga sa manumalo ai le Islanders, i ‘ai e 7-5.

O le tulaga tolu ma le fa, sa finau ai ‘au lakapi a Avele ma Bula Fiji, ma manumalo ai le ‘au a Fiti, 14-12.

Ae maua e le Pago Pago Eagles ia le tulaga lima, ina ua manumalo i le latou ta’aloga ma le Moli o le Ava mai Laulii, i ‘ai e 12-0.

O ta’aloga uma o lenei liki, sa faafoeina uma e laufali a le Iuni Lakapi a Amerika Samoa, ina ua le saofia mai laufali mai Samoa ina ua le maua ni avanoa e faimalaga mai ai, i le tutumu o faigamalaga a vaalele mai Samoa ona o le tele o ‘au na malaga mai mo lenei ta’amilosaga.