TALA I VAIFANUA

Pago Pago - AMERIKA SAMOA

FAATALI LE TOE FAALELEIA O LE ‘A’AI O TO’ESE SE’IA TOE TATALA TAUAOFIAGA A LE FONO IA IULAI

I le mae’a ai o le iloiloga a le Komiti a le Senate i le tulaga fa’aletonu o iai le ‘a’ai o to’ese i Tafuna ma le mana’omia ona fa’aleleia i se taimi vave, ua fa’aalia mai e le Taitaifono o le Komiti o Puipuiga Lautele/Lotoifale, le afioga Senatoa Olo Uluao Letuli, le toe tu’uina atu o lenei mataupu, e fa’atali i le toe tatalaina o tauaofiaga a le Maota Fono ia Iulai.

Sa fa’ailoa mai e Olo i le Samoa News, ua mae’a ona fa’ao’o atu lenei mataupu i le Loia a le Senate  mo le tu’ufa’atasia o se Iugafono.   Ae peitai, e le i lava se taimi e fa’amae’aina ai le tu’ufaatasia o se I’ugafono ma pasia ae e le i tapunia le Tauaofiaga Faapitoa lea na se’i mae’a atu nei.

Na ia saunoa foi, se’ia vagana ua toe talo e le kovana seisi tauaofiaga po o se fonotaga faapitoa i luma mai o Iulai, o le a ta’atia lenei mataupu seia toe tauaofia le Fono Faitulafono ia Iulai.

Ae peitai, i le taimi nei, o lo o opea lava le fesili, pe fia tonu pagota o lo’o lokaina i le ‘a’ai o to’ese i Tafuna, ma pe o le a faia ni galuega e faaleleia ai fale o iai nei, e taumafai e faamama ai le faafitauli o tulai mai.

SAUNIA ‘THE ROCK’ DUANE JOHNSON E FA’AULU LONA TINA MATUA IA LIA MAIAVA I LE ‘WWE HALL OF FAME’

O le tina Samoa mai le afio’aga o Falealili Samoa, ua avea nei o se ulua’i tina Samoa ma se tina fo’i e fa’aulu lona suafa i le WWE Hall of Fame. O lenei tina o lona ali’i le Susuga le Ali’i pi’i Samoa Peter Fanene Maivia, ma sa avea le tina o se tasi na feutaga’ia pi’iga uma mo le tama o le aiga i lona taimi a’o ta’alo i lea fo’i fa’agatama.

Ua molimauina fo’i e se tasi o tamaitai tusitala Samoa, Tina Elise Mata’afa, lea vaitau a’o talavou o ia ma avea o se tasi sa auai i taimi uma e fa’atino ai e Lia Maivia ona tiute i Pi’iga i Hawaii a’o i ai le maea mo pi’iga i le Blaisdell Arena i Honolulu, Hawaii i le vaitau o le 1980.

Ona sa pi’i fo’i the Rock Duane Johnson, le alo e fa’asino ia Mataniufeagaimaleata Johnson, o le alo e fa’asino ia Lia Maivia ma Pita Fanene Maivia. O lea ua toe fo’i mai le atali’i Samoa e fa’aoo le fa’aeaea mo lona tina matua.

Ua ia lisia fo’i le to’atele sa mafai ona fa’aauala atu ia Lia Maivia o latou avanoa e pii ai i Honolulu Hawaii, ma sa maimoaina e le to’atele a latou pi’iga matagofie e pu’ea ai latou ata fa’asolo mo le maimoaga a le atunuu.

O nai vaitau e matua tuu mea uma a le atunuu faitama o Samoa, ae maimoa pi’iga i le itula e 6:00 i le afiafi o aso Sa ta’itasi, ae maise pe afai o le a pi’i ai se tasi o alo o le atunuu, Pita Fanene Maivia, poo le tama o Siva Afi, ae maise fo’i o le Sika ma Afa Anoa’i. O i latou na e patipatia e le atunuu o latou faiva i le maea

Fa’afetai i le tausi mea lelei o Tina Mata’afa ona o le ata ua fa’apolopolo mai na vaitau, ua maua ai se ata o si ona tina, o se uo mamae a Lia Maivia i Hawaii faatasi ai ma nisi sa fa’aulua maia le tele o nisi tama pi’i mai le WWE mo pi’iga i Honolulu.

Fa’ailoa mai o le la’ei veloveta lanumoana a le tina o Lia i lea ata, o le la’ei na saunia lelei e le tina o Tina Mata’afa mo lea fa’amoemoe maualuga i Bleisdell Arena Honolulu.

Fa’amalo ia Duane Johnson mo le agaga i si ona tina matua, e manuia lava le fanau e tausi matua, aua o le upu o le tusi ua fa’atulafonoina, o lo’o i ai lava ma lona fa’amanuiaga!

FA’AGASOLO POLOKALAMA O LE SISIGA FU’A LONA 124 A AMERIKA SAMOA

O le afiafi anapo sa amatalia ai fa’afiafiaga masani a le ‘Arts Council’, aua le alo atu o Amerika Samoa mo le fa’amanatuina o le 124 tausaga, o lana osiga feagaiga ma le malo o Amerika.

O le lona 48 ai lea o tausaga, talu ona amatalia fa’afiafiaga a le ‘Arts Council’ i vaitaimi o le Sisiga Fu’a.

Ma o ausiva na fa’afiafia anapo, sa aofia ai le Autalavou a le Maria Fatima, a le Ekalesia Katoliko mai Aua, o Le Taupou Manaia, le Autalavou a Peteli mai Leone faapea le Autalavou a le EFKAS Malotumau mai Fagaitua.

O le a fa’aauauina lenei polokalama i le po ananei, lea ua sauni mai ai Autalavou a le EFKAS mai i Sailele ma Amouli, faapea le Autalavou a le Ekalesia a Iesu Keriso Pago 3, o le Metotisi mai Leloaloa faapea le Autalavou a le Sagato Iosefo mai Fatuoaiga i Tafuna.

Ona faai’uina lea i le po o le aso Toonai, e le Autalavou a le EFKAS mai Masausi, o le ausiva a le Tama’ita’i Sa Aulava mai Laulii, o le aufaipese tu’ufa’atasia a Amerika Samoa faapea ma le Ausiva tu’ufa’atasia a Amerika Samoa lea ua faamoemoe atu mo le Fa’aaliga Tu ma Aganu’u a le Pasefika, lona 13.

E tusa ai ma se fa’aaliga fa’alauaitele mai i le Ofisa a le Kovana, o le aso To’onai a taeao, Aperila 13, i le 8 i le taeao, o le a faia ai le Solo ma Savaliga e amata mai i le OMV i Tafuna.

O le Aso Sa, Aperila 14 i le 3:00 i le afiafi, ua fuafua e faataunuuina ai le Sauniga Lotu mo le Sisiga Fu’a, i le malumalu a le Ekalesia Katoliko i Fatuoaiga.

O le taeao o le aso Lulu, Aperila 17, 2024 o le a faataunuuina ai le Sisiga Fu’a i le malae ta’alo a le malo (Veterans Stadium) i Iliili.

Ma ua mae’a fa’alauiloa mai e le afioga i le Kovana, Lemanu P. S. Mauga, le avea o le aso Lulu ma aso malolo mo le malo.  Ae ona o lenei aso malolo, e le o se aso malolo feterale, o lo’o iai se talitonuga, o le a tatalaina pea ia ofisa a le malo feterale, e aofia ai le falemeli.