Faaleoina e nisi o Senatoa lo latou le fiafia i ‘pepelo’ i le iloiloga a le SSIC i le va’a o le Kite Runner

Pago Pago - AMERIKA SAMOA

O le eseese o molimau a i latou o lo’o a’afia i le mataupu i le va’a o le Kite Runner, atoa ai ma le iloa, o lo’o iai se molimau o lo o le fa’amaoni, e ui ina o lo o faatautoina i latou i luga o le Tusi Paia, ae e le i amataina iloiloga, o se tulaga ua fa’aalia ai le tau le lava o le onosai a nisi o senatoa.

Ua mafua lea tulaga ona o le molimau muamua a le alii kapeteni o le Kite Runner, le susuga ia Faiai Loleni Faiai, i lana malaga i Samoa ma le toe fo’i mai, lea sa ia ta’ua ai lona tu’uina o le api o fa’amaumauga o le malaga, i luga o le va’a, ina ua toe taliu mai le faigamalaga.

Ae peitai, sa molimau ia le pule a le Kite Runner, le susuga ia Papalii Laulii Alofa ma le tamaitai o Tisha Peau (o se tagata faigaluega a le Malo, ae galue ‘part-time’ mo le Paramount), o le va’a lenei e fa’aaoga mo tafaoga, ma e leai se tusi o faamaumauga sa iai pe tausia.

I le mae’a ai o le iloiloga a le SSIC i le amataga o le vaiaso, na fa’aalia ai le le fiafia o le afioga Senatoa Satele Aliitai Lili’o ma ia ta’ua le le tatau ona fa’aulufaleina nei ituaiga tagata i totonu o le Maote o le Senate.

Sa ia ta’ua lona gaualofa i sui o le komiti, ona o lo latou taimi ma le malosi fa’aaluina i nei suesuega ma le sausauniga o nei iloiloga, ae o lea e o atu nei molimau ma pepelo i o latou luma, e aunoa ma se salamo.

Na fa’atula’i e Satele se mau mo le tu’ufa’atasi o se i’ugafono e taofi ai tagata faigaluega a le malo mai i le galulue i nisi galuega, lea e a’afia ai o latou tiute fa’alemalo.

Sa ta’ua e Satele, o le mea foi lea o lo’o tula’i mai i le mataupu lenei i le Kite Runner, lea ua a’afia ai nisi o tagata faigaluega a le malo, o lo o faia galuega mo nisi kamupani.

E le gata i lea, ua alia’e i le fa’agasologa o iloiloga a komiti, le iai o nisi o tagata faigaluega a le malo, e aofia ai faatonusili, fua fanua ma kapeteni o va’a, o lo o ua o latou fa’aaogaina mea totino ma masini a le malo, e faatino ai a latou galuega tua.

Sa fa’atatau le saunoaga a le afioga i le Senatoa, i le mataupu i fuaina o fanua o Nu’ufou, lea sa ia fa’afofoga, o se fua fanua a le malo na faatinoina lea galuega, ae e le’i totogia lana pili e $16,000.

Na lagolagoina atoatoa e le afioga Senatoa Tuiasina Salamo Laumoli ia le manatu a Satele, e uiga i lenei mataupu.  Ma sa saunoa Tuiasina, e le o mamafa i molimau ia o lo’o ‘subpoena’ mai i a latou iloiloga, ma e foliga mai o lo’o latou taupulepule faatasi, ae e le’i o’o mai i luma o le komiti.

Saunoa foi Tuiasina, o lo’o silafia e molimau ia le mea moni, ae e le o ta’uina atu i le komiti, ma afai o le tulaga lea, e matua’i leai ma se aoga o nei iloiloga e faia.

Sa ia ta’ua le maimau o le taimi ma le malosi, ae o lo’o pepelo ia molimau ma o lo’o latou nofouta foi ma sauni e fa’asalavei pe tata’i ese ia sui o le komiti, pe a latou vaai mai ua amata ona tau maua le mea moni, i a latou fesili.

Saunoa Tuiasina, sa iai se iloiloga o lo’o ia silafia, na toeititi lava maua mai le a’ano moni o le mataupu, e se tasi o molimau, ae na toe faasalavei atu lava e leisi molimau ma tosina ese ai fesili a le komiti, mai i le mataupu sa iloiloina.

Ma o le mataupu lenei i le Kite Runner, o se fa’ataitaiga lelei lea, e a’afia ai se vaa e tasi, o se malaga e tasi, ma se aiga e tasi, ae e eseese molimau a i latou.

Sa taumafai le Taitaifono a le SSIC, le afioga Togiola Tulafono, e fa’ato’ato’a finagalo a afioga i Senatoa ma ia fautuaina i latou, ina ia aua ne’i o latou se’etia i latou mai i lo latou faamoemoega e pei ona faatautoina ai i latou – o le suesueina lea o le mea tonu ma le sa’o.

Na saunoa Togiola, e tusa lava pe le fa’amaoni ia molimau nei, e tatau pea ona fa’aauau la latou galuega, mo le sailiga o le mea moni.

Sa fesiligia e le afioga i le Peresetene o le Senate, Tuaolo Manaia Fruean ia Togiola e tusa ai ma tulaga o le tulafono, pe mafai e le SSIC ona molia ia so’o se molimau, e mafai ona o latou faamaonia o lo’o pepelo i taimi o iloiloga.  Na saunoa Tuaolo, na iai nisi sa ia iloa, na molia i le molimau pepelo i le taimi o avea ai o ia ma Faamasino Samoa.

Na tali Togiola, o lo o ia i latou le paoa e faia ai lea tulaga.

Ae sa toe fautuaina atu foi Togiola i afioga i Senatoa, ina ia aua le fa’avaivai ae ia saga’i pea i luma i le sailiga o le mea tonu, ina ia mafai ona taunuu faamasino tonu.