POU TIUTE A LEOLEO

Pago Pago - AMERIKA SAMOA

LOKA SE ALII I LE FA’AO’OLIMA I LANA UO TEINE ONA O SE TELEFONI

O le taeao o le aso 21 o Mati, 2024, na lokaina ai e leoleo ia se alii e 25 tausaga, ina ua ia fa’ao’olima i lana uo teine, ona o se telefoni.

E tusa ai ma fa’amaumauga a le malo, o lo’o ta’ua ai le valaau atu o le tamaitai o Hilda Luki i le Ofisa a Leoleo i Tafuna, ma lipotia ai le fa’ao’olima o lana uo tama, le susuga ia Jarius Fiso, ia te ia, i lona fale faigaluega, i le Ofisa o le Soifua Maloloina (DOH), i Tafuna.

Sa aga’i atu leoleo i le DOH i Tafuna ma fa’atalanoa ai Luki ma mulimuli ane, sa faapea ona agai atu leoleo i le fale o le ua molia, i Nu’uuli, ma lokaina mai ai o ia.

Sa faamatalaina e Luki i leoleo, o le taeao o le aso 21 o Mati, 2024, na alu atu ai i le ofisa a le ASTCA i Tafuna e aumai lana telefoni mai ia Fiso ma ia toe fo’i ane ai i lona fale faigaluega i Tafuna.

Ae e le’i umi, e pei ona ta’ua e Luki, ae taunu’u atu Fiso i lona ofisa ma taumafai e ave’ese mai le telefoni mai ia te ia.  Sa faamatala e Luki, le taumafai o Fiso e se’i le telefoni mai i lona lima.   Ma sa o’o ina o’omi e fiso ona lima ina ia mafai ai ona ia (Fiso) se’i eseina le telefoni.

Sa faamatala e Luki le la taufao ma Fiso i le telefoni, seia o’o lava ina o la o’o mai i fafo ma le ofisa.  Ma sa ta’ua foi e Luki le tu’iina o lona tau’au e Fiso, ae sa oso atu se tasi e faigaluega faatasi ma Luki, i le fesoasoani ia Luki.

Sa ta’ua foi e Luki i lana faamatalaga i leoleo, o le telefoni lea sa o la fufusu ai ma Fiso, sa ia (Luki) faatauina mai i le Bluesky, ae sa ia tu’uina ia Fiso ona e leai se telefoni a Fiso.

Sa iai ni nai ma’osia i le tuli lima tauagavale a Luki ae peitai, sa ia te’ena ia le tautua a le EMS.

Na fa’atalanoa foi e leoleo ia ni molimau e tusa ai ma lenei faalavelave.  Ma na fa’amaonia e le molimau muamua ia le o’o atu o Fiso i lo latou ofisa ma fesiligia ia Luki e uiga i le telefoni, ma amata ona leotele.  Sa fautuaina e se tasi o le aufaigaluega ia Fiso e alu i fafo ona ua ova le ‘le mafaufau’ i totonu o le ofisa, ae peitai, sa le’i fa’alogo Fiso, ma fa’ateteleina ai le faafitauli – lea na i’u ai lava ina o’o i fafo le la taufaoga ma Luki.

Sa ta’ua foi e le molimau, le tu’iina e Fiso o Luki, ae sa mafai ona oso atu se tasi o le aufaigaluega ma taofi o ia.

I le faamatalaga a seisi molimau sa ia faamaonia ai foi le alu atu o Fiso ia Luki ma fai ia Luki e avatu le telefoni, ae na tali mai iai Luki, o lana telefoni lea sa faatau mai i le Bluesky i le masina ua mavae.

Sa ta’ua foi e le molimau lona lua le taumafai o Fiso e a’apa atu e se’i mai le telefoni mai luga o le laulau a Luki, ae peitai, na se’i e Luki le telefoni ma u’una’i ese Fiso.  Ma amata ai lona o la taufao ma tauupu, se’ia o’o ai lava ina o’o atu i fafo o le ofisa, lea na tu’i ai e le ua molia ia Luki ma taumafai e u’una’i ese o ia, ina ua oso atu se tasi o le aufaigaluega e fesoasoani ia Luki.

Ina ua fa’atalanoaina e leoleo ia le ua molia, sa ia tete’e i le faia o sana fa’amatalaga.

Ua molia nei o ia i moliaga e lua, e aofia ai;

Faitauga 1:  Fa’ao’olima i lona tulaga e tolu – o se vaega ‘A’ o solitulafono mama, e mafai ona fa’asala ai se tasi i le falepuipui, i le tausaga e tasi (1), po o se sala tupe e le i lalo ifo o le $150; po o fa’asalaga uma e lua.

Faitauga 2:  Faatupu Vevesi i nofoaga faitele – o se vaega ‘A’ o solitulafono mam, e mafai ona fa’asala ai se tasi i le falepuipui, i le tausaga e tasi (1), po o se sala tupe e le i lalo ifo o le $150; po o fa’asalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e fa’atali ai lona fa’amasinoga.

LOKA SE ALII I LE FA’AO’OLIMA I ONA TUAOI

Ua molia nei le susuga ia John Potoa’e mai i le afioaga o Nu’uuli i le Faatupu Vevesi i nofoaga faitele ma le Fa’ao’olima , ona o se fa’alavelave na tula’i mai i le po o le aso 22 o Mati, 2024, lea na lipotia ai o ia e se tina i le Ofisa a Leoleo i Tafuna.

E tusa ai ma faamaumauga a le malo, ina ua taunuu leoleo i le nofoaga na tupu ai le fa’alavelave, sa faamatalaina iai e le mafine na valaau i le ofisa a leoleo, le faia o se latou tafaoga i luma o le latou fale, ae alu atu se tasi o a latou tuaoi (le alii ua molia) ma ‘ava’avau atu ia latou, ma faapea atu, o ia e pule.

Sa fa’amatala e le mafine lona alu atu ma taumafai e taofi le ua molia, ae peitai, na tu’i o ia e le ua molia ma fai atu, e leai sana feau i le fanua.

Sa ta’ua foi e le mafine, e le o se taimi muamua lenei ua fai ai e le ua molia ia tulaga faapea pe a fa’asuaava.  Ma sa ia fa’ailoa foi i leoleo, le sola o le ua molia, agai i le alatele.

Na fiu leoleo e tau saili le ua molia, ae peitai, e le’i maua o ia. 

O lo’o ta’ua foi i totonu o fa’amaumauga le fa’amatalaina e seisi tuaoi i leoleo, le tau’aiina e le ua molia, o le fale a le mafine na valaau i leoleo (ae e le o iloa po o ni ma’a po o ana fagu pia sa ia tau’aia ai le fale).  Ma e na o le pau le mafuaaga e faapea ai le ua molia, ona o le fa’asuaava.

Sa faamatala e lea molimau e faapea, e na o le pau lava le taimi e faatupu fa’alavelave ai le ua molia, faaleaga a latou mea totino ma palauvale solo, ona o lo’o fa’asuaava.  Ma o taimi faapena, e le momoe lelei ai lo latou tuaoi ona o le fefefe i le ua molia, ona e iai lana a’upega i lona fale.

O le vaveao o le aso na soso’o ai, sa faato’a maua ai le alii o John Potoa’e ma ave faapagotaina ai loa o ia.

O moliaga ua molia ai Potoa’e, e aofia ai;

FAITAUGA 1:  Faatupu Vevesi i Nofoaga Faitele – o se vaega ‘B’ o solitulafono mama, lea e mafai ona fa’asala ai i le falepuipui mo le ono (6) masina, po o se sala tupe e $500; po o fa’asalaga uma e lua.

FAITAUGA 2:  Fa’ao’olima i lona tulaga e tolu – o se vaega ‘A’ o solitulafono mama, lea e mafai ona fa’asala ai i le falepuipui mo le tasi (1) tausaga, po o se sala tupe e $1,000; po o fa’asalaga uma e lua.

E $1,000 le tinoitupe faatulaga e mafai ona tatalaina ai le ua molia mai i le falepuipui, e faatali ai lona fa’asalaga.