I’u i le to’ese ia se alii faamisa i lona aiga

Pago Pago - AMERIKA SAMOA

E tusa ai ma faamaumauga a le malo, o le po o le aso 14 o Mati, 2024, na fa’afeso’ota’i atu ai e le ofisa tutotonu a leoleo, i Fagatogo, ia lo latou lala i Tafuna, e tusa ai ma se fa’alavelave o lo’o tupu i le afioaga o Iliili – i le eria o iai le malae ta polo.

Ae sa faapea ona maua e le Ofisa a Leoleo i Tafuna ia se valaau mai i se tina, e uiga i sona ‘nephew’ o lo’o faatupu misa i totonu o le latou aiga i Iliili ona o le fa’asuaava, ma sa ia tata’eina foi se fa’amalama o le fale.

Ina ua taunu’u leoleo i le nofoaga na tupu ai le fa’alavelave, sa va’aia le taofiofi mai e ni alii talavou se to’alua ia le ua molia ma na lokaina mai loa o ia e leoleo ma tu’uina i totonu o le ta’avale leoleo.

Ina ua fa’atalanoaina e leoleo le tina na valaau atu i le ofisa a leoleo, sa ia faamatalaina le taumafai o lona ‘nephew’, le susuga ia Eddie Taulai, e ave le telefoni a le to’alua a lana tama teine, a’o faia se la inuga pia i totonu o le potu ‘ai o le latou fale.

Ae na musu le to’alua a le tama teine a le tina e tu’u lana telefoni ia Taulai, ona o la sa talanoa ma lona to’alua.

Sa faamatala foi e le tina na valaau i leoleo, lona alu atu ma faatonu lona ‘nephew’ (Taulai) e tu’u lona palauvale ma lona leotele i totonu o le fale, ae musu le ua molia, ma savali loa i fafo ma le fale, ma togi le faamalama o le potu a le to’alua a lana tama teine, i se fagu pia ma ta’e ai le faamalama.

Sa ta’ua e le tina le feosofi atu o lana fanau tama talavou e toalua, e 15 tausaga o le tasi ae 16 leisi, ma taumafai e fa’ato’ato’a ia le ua molia, ae peitai, na liliu mai Taulai ma taumafai e fasi nei alii talavou.  O le mea lea na taofiofi ai e nei alii talavou ia le ua molia, ma fai atu i lo la tina e valaau leoleo mo se fesoasoani.

Sa faamatala foi e le tina, na talu lava ona sau lona ‘nephew’ mai Manu’a ma o latou nonofo faatasi, sa fai ma ia le masani o le faatupu misa i totonu o le latou aiga.

Ina ua faatalanoaina foi e leoleo ia le ‘son-in-law’ a le tina lea na valaau i leoleo, sa ia ta’ua foi le tulaga e tasi e pei ona sa faamatalaina e le tina.  Sa ta’ua e le na a’afia, le ita o le ua molia ona o lona musu e tu’u atu ia te ia (Taulai) ia le telefoni, ona o la e la te talanoa ma lona toalua.

Sa ta’ua foi e le na a’afia le tu’iina o lona papatua e Taulai ma lu’i o ia e la te fufusu.  Ae na tula’i le na a’afia ma savali i totonu o lona potu moe, ae na fa’ate’ia o ia ina ua ta’e le faamalama o lona potu i se fagu pia.

Ina o feagai leoleo ma o latou tiute i lo latou ofisa e tusa ai ma Taulai, sa o latou fa’alogoina le manogi pia o le alii ma le mu o ona mata ma le fa’atosotosololoa o lana tautala.

Ua molia nei lenei alii 25 tausaga i moliaga e tolu;

Faitauga 1:  Faatupu Vevesi i totonu o aiga, o se vaega ‘C’ i solitulafono mama, e mafai ona nofosala ai se tasi i le to’ese, i le o’o atu i aso e sefulu lima (15), po o se sala tupe e i le va o le $150 ma le $300; po o fa’asalaga uma e lua.

Faitauga 2:  Fa’ao’olima i lona tulaga e tolu, o se vaega A’ i solitulafono mama, lea e mafai ona fa’asala ai se tasi i le falepuipui, i le o’o atu i le tasi (1) tausaga, po o se sala tupe e i le va o le $150 ma le $1,000; po o fasalaga uma e lua.

Faitauga 3:  Faaleagaina o mea totino i lona tulaga lua, o se vaega ‘A’ o solitulafono mama, e mafai ona faafalepuipui ai se tasi i le o’o atu i le tasi (1) tausaga, po o se sala tupe i le va o le $150 ma le $1,000; po o faasalaga uma e lua.

E $1,000 le tinoitupe faatulagaina e mafai ona tatalaina ai i tua le ua molia mai i le falepuipui, e faatali ai lona faamasinoga.