Maua e leoleo se fana i totonu o se ta’avale

Pago Pago - AMERIKA SAMOA

O le po o le aso 17 o Mati, 2024, a’o feagai sui malu o le malo ma leoleoga masani i luga o le alatele, sa molimauina ai le agai mai o le ta’avale a le susuga ia Etise Wulf, i tafatafa o le faleoloa a MJ i Pavaiai.  Na fa’amauina e leoleo le saoasaoa o le ta’avale a Wulf, e 40 maila, i se vaega o le alatele e na o le 25 maila le saoasaoa faatagaina.

Na taumafai leoleo e taofi le ta’avale a Wulf ae peitai, sa le’i usita’ia e le alii le fa’atu atu e leoleo o lana ta’avale, ae fa’aauau pea ona alu saoasaoa lana taavale.

Sa tuliloaina loa e leoleo le ta’avale a Wulf, seia o’o atu lava i luga o le auala e agai atu i le falesa a le Ekalesia a Iesu Keriso, i Mapusaga Fou, ae peitai, sa le’i toe va’aia e leoleo le ta’avale a Wulf.

Sa fa’aauau pea ona sailiili e leoleo agai atu i le itu i Saute o le alatele, sa afea ai se auala pefu e agai atu i le maota o le aiga o Filoiali, ma o iina na va’aia ai le ta’avale a Wulf, o lo o paka mai i luma o se tasi o fale a le aiga o Tuana’itau, i Pavaiai lava.

E ui ina sa kavaina le ta’avale i se tapoleni lanu pa’epa’e, ae peitai, na iloa atu e leoleo le fuainumera o le laisene o le ta’avale, lea na fa’amaonia ai i leoleo, o le ta’avale lea o lo’o latou taumafai e saili.

Sa faapea ona agai atu leoleo ma paka le latou taavale i tua o le ta’avale a Wulf.  I se taimi mulimuli ane, na agai mai ai se fafine mai totonu o le fale (o le to’alua lea a Wulf).  Na fesiligia o ia e leoleo po o ai sa fa’afoeina le taavale, sa tali le fafine, o lona to’alua ma ia ta’uina i leoleo, le igoa o lona toalua.

Sa toe fesiligia le to’alua o Wulf po o fea o iai, sa faapea loa ona valaau le fafine aga’i i tua o le fale ma ina savali mai Wulf, na fesiligia o ia e leoleo po o ia sa faafoeina le ta’avale, lea na tali atu iai Wulf, ‘ioe’.

Ina ua fesiligia o ia e leoleo pe aisea na le tu ai lana taavale, ae tali Wulf, ona o lona fefe, ona sa iai foi lana ‘ticket’ muamua.

Sa lokaina mai loa Wulf e leoleo ma tu’uina i totonu o lana ta’avale, ona oso lea o se tasi o leoleo i le nofoa aveta’avale, ma o la agai mai loa i le Ofisa a Leoleo, lea na taofia ai ma le ta’avale a Wulf.

Ina ua taunu’u le leoleo ma Wulf i le ofisa a leoleo i Tafuna, sa faapea loa ona su’esu’eina e leoleo ia totonu o le ta’avale a Wulf, ma mauaina ai se fana (20-gauge shotgun), i le pito i tua o le nofoa aveta’avale.  Ma sa faapea foi ona maua ai i totonu o le fana, ia se pulufana.  Ma ni isi pulufana e lua (2) i lalo o le nofoa aveta’avale.

O lo’o ta’ua foi i totonu o fa’amaumauga a leoleo, le leai o se laisene a Wulf, mo le fana pe fa’atagaina ai o ia e feavea’i se fana.

Ina ua faatalanoaina Wulf i le ofisa a leoleo po o ai e ana le la’au malosi, sa ia ta’ua, o se fana sa ia maua i le lapisi i Futiga ma sa ia fa’amamaina ma tu’u iai pulufana, ma teu i totonu o lana ta’avale.

Ua molia nei Wulf i le moliaga o le umia faasolitulafono o se a’upega, o se vaega ‘A’ o solitulafono mama, lea e mafai ona fa’asala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E $1,000 le tinoitupe fa’atulagaina e mafai ona tatalaina ai le ua molia mai i le falepuipui, e faatali ai lona faamasinoga.