O OE O LO’U TAMA?

VAEGA 61

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*****************************************

Na gata le tatou Fagogo i le vaiaso ua mavae i le taimi na o’o ai le faamatalaga a le ulugalii o Tanielu ma Eseta e faapea, o le ‘idea’ a le tama a le alii fomai o Taki, lea na suia ai o latou olaga i lea aso i totonu o le falemai i Egelani.  Ma o le aso foi lea, na suia ai le igoa a le tamaloa o Tanielu, mai ia Alesana Penaia, ia Tanielu Sanerivi.

Sa faamatala e le tamaloa o Tanielu, o le igoa o Tanielu Sanerivi, o le igoa lena a le tama a le alii fomai o Taki.  Ae o lona igoa moni, o Alesana Penaia. 

Ua leai seisi o le fanau a le ulugalii e toe minoi pe toe emo se mata, ae ua na ona pupula to’a atu i lo latou tama ma lana faamatalaga lea o lo’o fai mai ai.

Sa fa’aauau le faamatalaga a Tanielu, o le ‘idea’ a le tama a le alii fomai o Taki, ina ia mafai ona toe fo’i mai ai Tanielu i lona aiga ma vave maua ai sana galuega, o le sui o lona igoa mai ia Alesana Penaia, ae tago e fa’aaoga lona igoa o Tanielu Sanerivi.

E fai lava le tala a le tamaloa o Tanielu ma le maligi o ona loimata.

Ae na fa’ate’ia le aiga ina ua fesili atu se tagata, “O le a le uiga o lau tala?  O ai lou igoa?”, ma le liliu mai o le aiga i le faitoto’a, o lo’o tu atu ai ia le alii fomai o Taki.

“O le a le uiga o lau tala? O ai lou igoa?” o le toe fesili atu lea a Taki i le tamaloa o Tanielu.

Ua le tali ia Tanielu ae ua tilotilo atu i lona to’alua.  Ae o le taimi lea, ua oso mai le fafine o Eseta ma u’u atu le lima a Taki ma faapea mai, “Taki, sau e nofo i lalo.”

E tau ta’ita’i mai e Eseta ia le alii fomai i le nofoa, ae tago atu Taki i le se’i lona lima ma savali atu tu i luma o Tanielu.

‘O lona uiga, e sa’o lava la’u tala lea na fai atu.  O le igoa lea o lo’u tama, o Tanielu Sanerivi.  Ma o mea uma ia sa ou ta’uina atu, o lona aso fanau, ma le mea na fanau mai ai, e moni uma, a?” o le fesili atu lea a Taki ia Tanielu.  Ma na vaaia e le aiga, le liu o foliga o le alii fomai, i le ita.

Ua oso atu nei le alii o Iakopo ma tu i le va o lona tama ma Taki ma faapea atu, “Faamolemole Taki, e lelei ae tatou nonofo faalelei i lalo ma tatou talatalanoa filemu.”

Ae peitai, ua amata ona si’isi’i le leo a le alii fomai ma ua lilium ai ia Eseta, ae oso atu Naomi ma toso mai lona tina.

“O le taimi atoa na tatou nonofo fa’atasi ai, sa ou faapea o outou o ni tagata lelei, o ni tagata faamaoni, ae se’i vaai iai.  O lea ua e fa’aaogaina le igoa o se tagata ua maliu, e te ola ai i se olaga filemu!” o le ‘ava’avau atu lea a Taki i le aiga atoa.

“Faamolemole Taki, malie lou loto,” o le taumafai mai lea a si teine o Naomi.  Ae ua matua’i liliu le loto o le alii fomai.

Ua savali atu nei Taki ma tu mai i le faitoto’a ma faapea mai lana tala i le tamaloa o Tanielu, ae e le i savali atu i fafo, “Sauni e te toe fo’i i le falepuipui.”

[E FAIA PEA]