POU TIUTE A LEOLEO

Pago Pago - AMERIKA SAMOA

MOLIA SE ALII NA OSOFAIA LE FALE A LE DYWA I PAGO PAGO

Ua molia nei le susuga ia Joseph Aetonu, e 33 tausaga, i moliaga o le Solivale o fanua ma maota – i le vasega ‘B’ o solitulafono mama, lea e mafai ona fa’asala ai se tasi i le falepuipui i le o’o atu i le ono (6) masina, po o se sala tupe e $500 po o fa’asalaga uma e lua.

E tusa ai ma faamaumauga a leoleo, o le afiafi o le aso 25 o Fepuari, 2024, na maua ai e lo latou ofisa i Fagatogo se vala’au mai i le susuga ia Kovati Tuiasosopo, ona o se tagata ua osofaia le fale a le DYWA i Pago Pago.

Ina ua taunu’u leoleo i Pago Pago, sa faamatalaina iai e Tuiasosopo, a’o feagai ma le siakiina o totonu o le fale i le 1:30 i lea aoauli, sa ia vaaia ai se alii o fealuai mai i totonu o le fale ta’alo.  Ma ina ua iloa mai o ia e le alii lea, sa tamo’e loa agai i le potu o lo’o teu ai oloa a le DYWA.

Sa ta’ua foi e Tuiasosopo le faaleagaina o le faitoto’a pito i tua o le fale, ma o sona talitonuga, o iina na oso mai ai le alii lea.

O lo’o ta’ua foi i totonu o fa’amaumauga a leoleo, le leai o se mea na gaoia mai totonu o le fale.

Na aga’i atu loa leoleo i le potu teu oloa ma maua atu ai Aetonu o lo’o lafi mai i tua o ni pa’u ta’avale.  Ma lokaina mai ai loa o ia ma aveina atu i lo latou ofisa i Fagatogo.

Ua fa’alua ai nei ona molia ia Aetonu i lona solivaleina o le fale a le DYWA i Pago Pago.

E $500 le tinoitupe faatulagaina e mafai ona tatalaina ai i tua le ua molia, mai i le falepuipui, e faatali ai lona faamasinoga.

TETE’E SE ALII I SUESUEGA A LEOLEO MA LE LOKAINA O IA

O le aso 3 o Mati, 2024 sa taofia ai e leoleo ia le ta’avale a le susuga ia Kid Bartley, e 29 tausaga, a’o faataunuuina o latou tiute masani, i le mataituina o taavale feoa’i i luga o le alatele.

Ma sa le gata ina tete’e ai e Bartley i le faataunuuina o se su’ega e faamaonia ai lona fa’asuaava pe leai, ae a ia tete’e foi i le taumafai a leoleo e lokaina mai o ia.

Ua molia nei Bartley i le tete’e i leoleo a’o taumafai e loka o ia, i le vasega’A’ o solitulafono mama, lea e mafai ona lokaina ai se tasi i le o’o atu i le tausaga e tasi (1), po o se sala tupe e $1,000; po o solitulafono uma e lua.

E tusa ai ma faamaumauga a leoleo, o le vaveao o le aso 3 o Mati, 2024, a’o feagai ai leoleo ma o latou tiute masani i luga o le alatele, sa o latou taofia ai le ta’avale a Bartley.  Ae ina ua faatonuina o ia e faia se su’ega e faamaonia ai po o ‘ona pe leai, sa tete’e le alii.  O lea na faailoa atu iai e leoleo, o le a lokaina o ia i le fa’afoeina o lana ta’avale ae o lo o fa’asuaava.

Sa faatonuina loa o ia e leoleo ina ia sau i fafo ma le ta’avale, ae musu le alii.  O lea na tatalaina ai e leoleo lana faitoto’a ma taumafai e lokaina ona lima, ae peitai, sa se’i atu e Bartley ona lima, ma i’u ai ina fesoasoani isi leoleo e ave’ese mai Bartley mai totonu o lana taavale.

A’o taumafai pea leoleo e lokaina lima a Bartley, sa fa’aauau pea ona ia tete’e i gaioiga a leoleo.

E $500 le tinoitupe faatulagaina e mafai ona tatalaina ai Bartley mai i le falepuipui, e faatali ai lona faamasinoga.