O OE O LO’U TAMA?

VAEGA 58

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 58.

*****************************************************

Na tau fai u’u le manava a le fanau a Tanielu ina ua o’o le faamatalaga a Tanielu i le taimi lea ua sauni ai le la tafaoga ma si ana uo, i Egelani.

Manatua foi, o Egelani lea na maliu mai ai le tama o le alii fomai o Taki.

Ua toe oso atu le alii o Iakopo ma fesili atu i lona tama, “O le tama a Taki lau uo, a Da?”

Ua le pupula mai Tanielu i lana fanau, ae ua tilotilo i luga o le laulau ma tali mai, “Ioe.  O le tama a Taki”.

Ua amata ona maligi loimata o le teine o Naomi.

Ae ua fa’aauau le tala a Tanielu, “Ae i le taimi na ma tapena ai le ma malaga, e le’i iloa e si a’u uo, ua ma’i lana uo teine.  Ana ona ia iloaina, e le taitai fai mai ma te o.”

“Ae o le taimi foi lea na sauni ai le ma malaga, ua fanau le tou tina ia Ruta ae o lo’o tele lona manava ia Iakopo.  Ae sa ia le taofia a’u, ona o le tulaga na iai lo’u olaga i lena vaitaimi, i le faaiuga o lo’u faamasinoga ma le faigata ona maua o sa’u galuega,” o le tala lea a Tanielu.

“Aisea na e le faamatala ai le tala lea ina ua tatou feiloai ma le tina a Taki?” o le fesili lea a le teine o Ruta i si ona tama.

Na umi se taimi o nofo le tamaloa o Tanielu ua le tautala.  Ae na fa’ate’ia le to’afa lea ina ua tali mai se tagata i le faitoto’a ma faapea mai, “Ona o le mea sa tupu i Egelani.”

Ma le tepa atu o Tanielu ma lana fanau, o le fafine o Eseta lea o lo’o savali mai i totonu o le fale’aiga, ma ona loimata ua le matu.

Ua oso atu le tamaloa o Tanielu ma fa’auouo mai si ona to’alua ma fa’anofo i luga o le nofoa.

Ua fa’asaga atu le fafine i lana fanau ma faapea atu iai, “Ou te le mana’o e iai seisi o outou e faamasino i lo outou tama e tusa ai ma le mea na tupu i na tausaga ua leva.  Sa ia faia lenei faaiuga ma lona alofa ia te a’u aemaise, ina ia aua ne’i upuvaleina outou e seisi.”

“O le a le uiga o lau tala Mom?” o le fesili atu lea a le teine o Ruta i si ona tina.

Ua nofo nei le tamaloa o Tanielu ae ua fa’aauau e le fafine o Eseta le faamatalaga o le tala.

“O le po na tupu ai le faalavelave lea na maliu ai le tama a Taki, o la e tafafao ma lou tama i se fale kalapu ma ua lata i le taimi e tapuni ai le kalapu.  Ua savavali mai le tou tama ma le tama a Taki o le a o ese ma le falekalapu, ae toe mana’o le tama a Taki e fia alu i le fale taele.  Ona sau lea o le tou tama i le faatali atu i fafo,” o le faamatalaga lea a Eseta.

“O le taimi lena na tupu ai le faalavelave lea na mu ai le fale,” o le toe oso mai lea a Tanielu.  “Ou te leiloa ua mu le fale.  Na pau le mea na ou iloa, e iai le mea o lo’o tupu i totonu ina ua taufetuli agai mai i fafo tagata sa i totonu o le falekalapu.  Ma na ou fiu e taumafai atu i totonu o le falekalapu ae ua le mafai i le lolofi mai i fafo o tagata.”

“Ana le o’o atu vaega tineimu, e le maua se avanoa e lavea’i mai ai le tama a Taki, ma ave loa i le falemai.”

“E le’i maliu?” o le fesili lea a Naomi.

Ua va’aia le maligi lemu ifo o loimata a le tamaloa o Tanielu ma faapea mai ma le leo lemu, “Na maliu i le aso na soso’o ai.”

E FAIA PEA