POU TIUTE A LEOLEO

Pago Pago - AMERIKA SAMOA

LOKA SE ALII INA UA MAUA ATU O MOE I LE FOLA O LE FALE NA IA OSOFAIA

O le afiafi o le aso 24 o Fepuari, 2024 sa o’o atu ai se tina i le Ofisa a Leoleo i Tafuna e faila sana tagi e faasaga i se alii e 18 tausaga, ina ua na maua atu o moe i luga o le foloa o lona fale, e aunoa ma se faatagana.

E tusa ai ma faamaumauga a leoleo, sa ta’ua e lenei tina, o le susuga ia Fa’atau Kome, e tuaoi i la’ua ma o nisi taimi e masani ona nofo ai i lona fale, ae ona o le gaoia so’o o ana mea totino faapea ma le alu ma ave mea’ai o lona fale, sa ia fa’asaina ai le toe o’o mai o Kome i lona fale.

Ina ua taunu’u leoleo i le fale o le tina, sa o latou mauaina atu ai Kome, o lo’o moe e aunoa ma se ofutino, i luga o le foloa o le fale a le tina.  Sa fafaguina o ia e leoleo ma lokaina mai loa o ia.

Ua molia nei Kome i le Solivale o le fale o lenei tina – o le vasega ‘B’ o solitulafono mama, e mafai ona fa’afalepuipui ai se tasi i le o’o atu i le ono (6) masina, po o se sala tupe e $500; po o fa’asalaga uma e lua.

E $500 le tupe faatulagaina e mafai ona tatalaina mai ai le ua molia mai i le falepuipui, e fa’atali ai lona faamasinoga.

LOKAINA NI TAGATA SE TO’ALIMA MAI I LE MAKETI O I’A A SAMOA

O le aso Faraile ua mavae, na osofa’ia ai e leoleo o le malo o Samoa ia le maketi i’a i Savalalo, ma lokaina mai ai ni tagata se to’alima (5).  O se vaega lenei o taumafaiga a le malo o Samoa ina ia taofia le tuputupu atili o fa’alavelave o lo’o a’afia ai fualaau faasaina.

O i latou ua lokaina, e aofia ai nisi e to’alua, e ta’i 40 tausaga le matutua mai i Vailele ma Lefagaoalii.  O leisi e 23 tausaga le matua, mai i le afioaga o Lepea.  O se tasi e 47 tausaga le matua mai i Salelavalu.  O se tasi e 44 tausaga mai i le afioaga o Vaiusu ma se tasi e 24 tausaga mai i Manono.

Sa molimauina e le sui Komesina o Leoleo, ia Papalii Monalisa Tiai-Keti, le tu’uto o le ofisa a leoleo e fa’asagatau i fualaau faasaina, aemaise ai le tele o tulaga faapea o lo’o tutupu mai i le maketi i Fugalei.

MAUA SE TINO MALIU I OGASAMI A AMERIKA SAMOA

O le aso Toonai, Mati 13, 2024 na maua ai e le auva’a a le Matasaua mai Manu’a, se tino maliu o opeopea i gatai o Amerika Samoa, a’o latou feagai ai ma a latou toleniga.

E tusa ai ma se ripoti mai i le matagaluega e mataituina le gataifale (Marine Patrol) e foliga mai na a’afia le ua maliu i se fa’alavelave ona o ni manu’a sa o latou molimauina.

Ua taoto atu nei lenei mataupu i le Ofisa o Leoleo mo a latou suesuega.