O OE O LO’U TAMA?

VAEGA 57

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

******************************************

Na gata mai le tatou Fagogo i le vaiaso ua mavae, a’o faafesagai le tamaloa o Tanielu ma lana fanau to’atolu, ma o lo’o fa’atamalataina e Tanielu i lana fanau ia se tala’aga o lona olaga a’o talavou.

Ma ua o’o le fa’amatalaga a Tanielu i le taimi na tu’ua’ia ai o ia i le fasioti tagata ma lokaina ai o ia, e ui ina sa mafua ona tupu le fa’alavelave ona o lona taumafai e puipui lona ola.  Ae na fesoasoani atu ia te ia sana uo mamae lava na o la feola fa’atasi ifo, ma o ia lea na mafua ai ona maliu le tagata lea na tu’uaia ai Tanielu.

O le alofa tele o Tanielu i si ana uo, na ia faatonu ai lana uo e sola ese vave ae tu’u atu ia te ia, e faitalia ia ma tali i leoleo, ona sa maualuga i le mafaufau o Tanielu, e leai se mea e ono tupu, ona o la sa ia taumafai e puipui lona ola, ona e to’atele alii ia sa o latou fufusu.

Ae paga lea, ua i’u i se tulaga faigata le olaga a Tanielu, ona e fai o le lokaina, ae ina ua magalo mai i tua, ua tuli mai i lana a’oga.  Ae ua le taliaina foi e nisi a’oga ona e mumusu matua e fa’aa’o’oga faatasi a latou fanau ma se tagata na loka i le fasioti tagata.

Na alu foi lea o Tanielu e su’e sana galuega, ae peitai, na ona iloa lava e pule o fale faigaluega, o Tanielu sa loka i le fasioti tagata, u mai loa o latou papatua.

Sa fa’aauau le faamatalaga a Tanielu i lana fanau e faapea, o se tasi o po a’o nofonofo ma mafaufau po o le a sana mea o le a fai, ae tu’itu’i atu le faitoto’a o le fale lea o lo’o nofo ai.  Sa faate’ia o ia ina ua tatala mai, o lo’o tu atu ai si ana uo lea sa ia tuli’esea i le po na tupu ai le fa’alavelave.

O se feiloaiga na tumu i loimata maligi, ina ua opo mai e le uo a Tanielu ia si tamaloa o Tanielu ma saputu atu leisi fa’afetai i luga o leisi fa’afetai.

Na faapea atu le uo a Tanielu ia te ia, ana le seanoa Tanielu, semanu e faapenei ua maliu ona o ia e le loto tele pei o Tanielu.  O lona uiga, ana loka o ia i le falepuipui, a le pule i lona ola, e fasioti o ia e se pagota.

A’o talatalanoa Tanielu ma lana uo i lena po, sa faamatala atu iai e lana uo, o ia o le a faaipoipo ma se tamaitai aulelei toe mau’oa.  Sa faapea atu loa lana uo ia Tanielu, e alu atu la te o, e la te nonofo i lona fale.  Ma sa faapea loa ona fai.

E ui la ina e le’i va’ai lava Tanielu i le uo teine mau’oa a si ana uo, ae sa le’i toe iai se mea e toe popole ai Tanielu ma lana uo, ona e sapalai mai lava e le uo teine mau’oa a si ana uo.

Ua o’o i se tasi o aso, ua alu atu lana uo i le fale ona faapea atu lea o lana uo ia Tanielu, e sauni, o la’ua lea la’a alu se la malaga.

E ui lava i lea tala fiafia, ae na va’aia lava e Tanielu, foliga faanoanoa a si ana uo.  Ma sa ia fesili atu iai pe o iai se mea ua tupu.

Sa tali si ana uo, e mumusu le aiga o lana uo teine e la te faaipoipo ona e mativa.  

Ae sa toe faapea atu le uo a Tanielu, ua faatonu o ia e lana uo teine, e la te o (Tanielu ma lana uo) ae tu’u atu sina taimi se’i ona talatalnoa ai i ona matua.  A fo’i mai le malaga e le suia mafaufau o matua a lana uo teine, o le a la o loa la’ua e fai le la aiga.

Ua ‘ata Tanielu ma faapea atu i si ana uo, “Aua e te popole.  E ta te fo’i mai ua malilie le loomatua ma le toeaina.”

Na fesili Tanielu po o fea lea la’a alu ai le la tafaoga. 

Ae tali lana uo, “O ta’ua e ta te o i Egelani”.

E FAIA PEA