Tete’e pulega a le falemai i lipoti i le mafua’aga o le fa’ate’aina o tagata faigaluega

Pago Pago - AMERIKA SAMOA

I le talifuaitau a le pulega a le falemai autu a Amerika Samoa, i se tusi na fa’ao’oina atu e le susuga ia Vaanatiu Iafeta Tofala, lea sa va’aia le potu fa’ata a le falemai, i le afioga i le kovana Lemanu P. S. Mauga, mo se fesoasoani mo le silia ma le 30 tagata faigaluega a le falemai lea ua fa’ate’a faapea ma le ave’esea o le komiti faafoe a le falemai o iai nei, ua ta’ua ai e le pulega a le falemai le le malamalama o Vaanatiu i tulafono a le falemai ma le mafuaaga tonu na fa’ate’aina ai i latou ia.

Sa aofia i se lipoti a le vaega fa’asalalau a le KHJ i le aso Faraile, Mati 15, 2024 ia le tusi a Va’anatiu.  E ui ina e le i maua e le Samoa News se kopi o le tusi a Vaanatiu, ae peitai, sa maua e le Samoa News le imeli na tali atu ai le pulega a le falemai i le lipoti a le KHJ, i le faaiuga o le vaiaso na se’i mavae atu.

E tusa ai ma le lipoti a le KHJ, o lo o ta’ua e Vaanatiu i lana tusi, le leai o se vaega o tala faasolopito a le teritori, ua fa’ate’aina ai nit agata faigaluega se toatele faapenei, i le taimi e tasi.  Ma sa ia ta’ua le avea o ia ma sui o nei tagata faigaluega galulue malosi ma le fa’amaoni, ae ua fa’amalosi latou e fa’amavae mai a latou galuega, a leai, o le a fa’ate’aina.

Sa ta’ua foi e Vaanatiu le faate’aina o nei tagata faigaluega, po o le faamalosia o latou e faamavae mai a latou galuega, e aunoa ma ni faamaumauga e lagolagoina ai lenei gaioiga, ma ua solia ai tulafono feterale, faapea tulafono a le malo a Amerika Samoa ma tulafono a le falemai.

Sa ta’ua foi i le lipoti a le KHJ, le ta’ua e Vaanatiu o nisi o sikulaki ma tagata faigaluega teufale na fa’ate’a ona o le le lelei o le latou faa Igilisi.  Ma na fesiligia ai e Vaanatiu le afioga i le kovana, pe le i fa’atulafonoina e lana faigamalo le avea o le gagana Samoa ma le gagana Igilisi ma gagala aloaia.

Ua fa’aalia mai e le LBJ, e na’o le to’afa lava tagata faigaluega ua apili le faate’aina o i latou ma o le a iloiloina e le falemai nei apili, e tusa ai ma ala o le tulafono.

Na fa’amanino mai foi e le pulega a le falemai e faapea, o le faatonuga mo le faia o lenei fa’aiuga, e le’i sau mai i le Komiti Faafoe po o le pulega a le falemai, ae mai i supavaisa na galulue ai i latou ua fa’ate’a.

Ta’ua foi i le imeli mai i le pulega a le falema’i, e fa’ato’a a’afia lava le Komiti Faafoe a le falemai, pe a faaulufaleina se apili i le komiti.

E tusa ai ma sikulaki ia na fa’ate’a ona o le le mafai ona tautala i le gagana Igilisi, sa ta’ua e le pulega a le falemai, o lo o silafia e Vaanatiu o Amerika Samoa o se atunu’u ua lasi ona ituaiga tagata, ma afai ae tulai mai se faalavelave fa’afuasei, e manaomia ni sikulaki e gafatia ona talanoa ma gasegase faapea le mamalu lautele, i le gagana Igilisi ma le gagana Samoa.

Sa ta’ua foi e le pulega a le falemai le faafia ona fautuaina o tagata faigaluega ia ua fa’ate’a, ae peitai, e leai lava se suiga mo le alualu i luma.  Ma e pei ona o latou molimau ai i luma o le Fono faapea vaega fa’asalalau, e le o toe taliaina e le falemai ni gaioiga faaletonu, e le o mana’o le falemai ia atoatoa ona tagata faigluega, ae ia lava le tomai e faatino ai le galuega.

E tusa ai ma le lipoti a le KHJ, ua talosagaina e Vaanatiu ia le afioga i le kovana, e tauala atu i lana tusi, ina ia toe fa’afaigaluega i latou ia ua fa’ate’a, ina ia mafai ona tausi o latou aiga.  Faapea ai a le ave’esea o le komiti faafoe ona o a latou sese o lo’o faia.  O le ‘ai’oiga a Vaanatiu, e mo i latou e le o mafai ona totogi ni a latou loia.

Sa ta’ua foi e le pulega a le falemai i la latou imeli, sa latou taumafaiga ina ia iai le agaga mitamita o tagata faigaluega a le falemai, i le faatinoga o a latou tiute, i le tausiga o tagata o le atunu’u.   Ae afai ua le mafai ona ausia e tagata faigaluega tulaga e pei ona manaomia, o le a le ‘alo le pulega a le falemai, mai o latou tiute i le faia o faaiuga faigata.