POU TIUTE A LEOLEO

Pago Pago - AMERIKA SAMOA

TYRONE MCFALL

O le vaveao o le aso 23 o Fepuari, 2024 na valaau ai se tamaitai i le Ofisa a Leoleo, mo se fesoasoani ona o lona ‘uncle’, o lo o faatupu vevesi i totonu o le latou aiga i Faleniu.

E tusa ai ma faamaumauga a leoleo, ina o aga’i atu leoleo i le fale na tupu ai le fa’alavelave, sa fetaui ai ma se alii o savali mai i luga o le auala ma ina ua taofia o ia e leoleo, sa iloa ai o le susuga ia Tyrone McFall, lea ua molia nei i lenei fa’alavelave.

Sa fa’ailoa e McFall i leoleo, o lo o alu i le fale o lona tuafafine, e faalelei lo la va.

I le talanoaga a leoleo ma le tamaitai lea sa valaau i le ofisa a leoleo (le ‘niece’ a McFall) sa faamatalaina e le tamaitai e faapea, sa fafagu o ia e lona tina, ona ua tata’e e lona ‘uncle’ ia le faamalama pito i tua o lana taavale, i se ma’a.  Sa fa’aali foi e le ‘niece’ i leoleo ia ata o lana taavale lea ua fa’aleagaina.

Sa fa’atalanoaina foi e leoleo ia le tina ia Marina McFall ma sa ia faamatalaina e faapea, o le 1 i le vaveao na ia fa’alogoina ai le pisapisao o le ua molia i fafo o le latou fale.  Ae ina ua ia fesiligia ia le ua molia i le mafuaaga, sa na o le valaau mai i lana fanau teine, e tatala le faitoto’a ma o la e na te lagona atu le latou talie mai i totonu o le potu moe.

O lo o ta’ua foi i faamaumauga a leoleo, le fesiligia e Marina o McFall po o ua tagofia foi ia fualaau faasaina, sa tali le alii o McFall, ioe.

Sa faatonuina loa le ua molia, e le tina ia Marina, e alu e moe ma tu’u le tago i fualaau faasaina.  Ae na i’u ina tatalaina e Marina le faitoto’a o lona fle ia McFall ma ta’ita’i atu o ia i totonu o le potu malolo ma fa’atonu McFall e moe i le moega sa i totonu o le potu moe.  Ae peitai, sa ita le alii o McFall ma amata ona palauvale leotele.  Ona savali lea i fafo o le fale ma piki i luga se nofoa sa i fafo ma ta ai le ta’avale a le tama a Marina.

Sa aveina loa e leoleo ia le ua molia, i lo latou ofisa ae peitai, sa musu le alii e fai sana faamatalaga.

Ua molia nei McFall i moliaga e lua;

Faituaga 1:  Faatupu Vevesi i totonu o aiga – o le vasega’C’ o solitulafono mama, lea e mafai ona faafalepuipui ai se tasi, i le o’o atu i le sefululima (15) tausaga, po o se sala tupe e i le va o le $150 ma le $300; po o fa’asalaga uma e lua.

Faitauga 2:  Fa’aleaga o mea totino i lona tulaga e lua – o le vasega ‘A’ o solitulafono mama.  E mafai ona fa’asala ai se tasi i le falepuipui, i le o’o atu i le tausaga e tasi (1), se sala tupe e i le va o le $150 ma le $1,000; po o fa’asalaga uma e lua.

E $500 le tinoitupe faatulagaina e mafai ona tatalaina ai le ua molia mai i le falepuipui, e fa’atali ai lona faamasinoga.

AUELUA TE’O

O le aso 24 o Fepuari, 2024, na maua ai e le Ofisa a Leoleo i Tafuna ia se valaau e uiga i se alii o lo o tatu’uina i lalo ni la’au i se agaese, ma palauvale i se ulugalii i luma o le la fanau.

E tusa ai ma faamaumauga a leoleo, ina ua taunu’u leoleo i le nofoaga na tupu ai le fa’alavelave, sa faamatalaina e le ulugalii le tupu so’o o lenei tulaga, o le alu atu o le susuga ia Auelua Te’o (po’o Mataese) ma faatupu vevesi i luga o le latou fanua.

Sa faamatala foi e le ulugali, lo la fai so’o ia Te’o e soia le solia so’o o le latou fanua, ona o lo’o faatali le latou faamasinoga i tulaga o fanua, ae peitai, e alu atu lava lenei alii 62 tausaga le matua, ma fealua’i i luga o le latou fanua ma se agaese, ma palauvale atu ia latou.

Sa faamatalaina e le ulugalii, ua lua aso soso’o o alu atu o Te’o ma fai atu o lona fanua lea.  Aemaise ai le faia e le ua molia, ia uiga taufa’amata’u i luma o le la fanau.

Sa ta’ua e le ulugalii, na amata ona tatu’u e Te’o ia la’au i tua o le latou fale.  Ae ina ua o la talosagaina o ia e alu ese ona o lo’o fa’atali le latou faamasinoga e tusa ai ma fanua, sa faapea ona savali atu Te’o ia la’ua ma le la fanau, ma se agaese, ma fa’aauau ona palauvale atu.

Ae peitai, ina ua fa’atalanoaina e leoleo ia Te’o, sa ia ta’ua e faapea, na alu e faamama le latou fanua ma e na te le i faatupuina se vevesi ma le ulugalii ma le la fanau.

Ua molia nei Te’o i le Faatupu Vevesi i nofoaga faitele – o le vasega ‘B’ i solitulafono mama, lea e mafai ona faafalepuipui ai se tasi i masina e ono (6), po o se sala tupe e $500; po o faasalaga uma e lua.

E $500 le tinoitupe faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.