Iloiloga a le Senate ma le pulega a le Hawaiian Ea

Pago Pago - AMERIKA SAMOA

O le aso Lulu o le vaiaso ua mavae, sa faataunuuina ai se iloiloga a le Komiti o Femalagaiga a le Senate, e sailia se tali i fa’asea a le atunu’u, i le tele o uta leiloloa mai i taimi o femalagaiga a le Hawaiian Ea.  O molimau mai i le ofisa a le Hawaiian Ea, na auai i lea iloiloga, na aofia ai Lama Haretuku ma Sia Burgos, le sui pule a le Ofisa Vaalele.

Sa faapea foi ona auai mai ai ma Tumua Matu’u, le sui Faatonusili o le Matagaluega o Uafu ma Malae Vaalele.

I le amataga o le iloiloga, na fesiligia ai e le Taitaifono o le Komiti, le afioga i le Senatoa ia Malaepule Saite Moliga, ia Burgo, po o le a le mafuaaga o lenei fa’afitauli.  Ae sa faamanino mai e Burgos, e le o leiloloa ia atopa’u po o uta, ae o le ave sese e pasese. 

Sa ta’ua e Burgos, o le tele o atopa’u po o mea o lo’o fa’aaoga e pasese e la’u mai ai a latou uta, o le mafuaaga lena o lenei faafitauli.  Ma sa ia faaleoina se fautuaga mo le mamalu o le atunu’u, ina ia faia ni fa’ailo i luga o a latou atopa’u po o uta, e mafai ai ona iloa gofie ai.

Sa saunoa foi Burgos, o le tiute a le tagata faimalaga, ae le o le ofisa vaalele, le faamaonia o lo o sa’o a latou atopa’u o lo’o malaga ma latou i o latou aiga.

O le faletua ia Haretuku o lo o fa’aulu iai le auaunaga a le ofisa vaalele, lea e gafa ma le mataituina o le feavea’iina o uta a le vaalele.  Ma i sana molimau, o so’o se taimi lava e taunu’u atu ai se tagi i lo latou ofisa ona o se atopa’u po o se uta ua leiloa, e na te tu’uina ia faamatalaga o le uta ua leiloa, i totonu o le latou ‘system’ lea e mataituina vaalele uma i totonu o Amerika.

Ae sa ia ta’ua e faapea, e iai mea e tutupu i taimi o femalagaiga, e pei o le toe ave’esea o uta i Hawaii, ina ia mafai ona toe faaopoopo nisi pasese i luga o le faigamalaga.

Ma o so’o se taimi lava e maua ai se atopa’u po o se uta na leiloa, e masani lava ona tu’uina i le faigamalaga e soso’o ai mo Pago Pago.  Ae sa ia toe faamaonia mai foi, e le tu’uina e le latou ofisa vaalele ia ni atopa’u po o se uta i luga o le vaalele, pe afai e le pipi’i ai pepa faamaonia (tags).

Na toe faamamafaina e le afioga i le Senatoa ia Satele Aliitai Lili’o le taua o le tulaga o le soifua maloloina o le tagata femalagai, aemaise i latou o feagai ma gasegase ma e faalagolago i a latou fualaau ia o lo o i totonu o atopa’u ia ua leiloloa.  Ma sa ia toe faamanatu atu i le pulega a le ofisa vaalele, mafatiaga e le gafa i le tino ae o le mafaufau, i so’o se tasi ua le mafai ona le maua a latou vailaau.

Na saunoa foi Satele, i sona talitonuga, e tutusa lava le ato leiloa ma le ato ave sese, ma na ia fesiligia pe faapefea ona faila ia ato ua leiloloa.

Sa tali mai Burgos, e leai ni tagi ua faauluina mo ato leiloloa, na’o talosaga mo ato ua ave sese.  Ma e masani lava ona toe fa’afo’i atu ia ato ia i le aso e soso’o ai.  O nisi o taimi, e iai ato e totoe i le malae vaalele, ma o ato ia e ave e le latou aufaigaluega ma teu i le latou ofisa ma o le aso e soso’o ai, e masani ona o’o atu ai le tagata e ana ato ia, e piki mai.

Na faamatala foi e Burgos, e iai nisi o tagata faimalaga e faatopetope i fale ae iai nisi e tau saili ni a latou ta’avale e malaga ai i le fale, pe a taunuu mai i fanua, ona o lea ae tu’u a latou ato i le malae vaalele, aua o lo o latou iloa, o lo o tausi lelei a latou ato.

Ae peitai, na saunoa mai Satele, e tatau i le Hawaiian Ea ona fesoasoani e fofoina lenei faafitauli, e ala lea i le iai o se tasi o le latou aufaigaluega e tu i le faitotoa, ia faamaonia o lo’o sa’o ato ma uta a le pasese lea la’a malaga ma ia i lona aiga.

Sa ta’ua e le afioga i le Senatoa, o le masani lea sa fai i tausaga ua tuanai, lea na fa’amaonia mai e Haretuku.  Ae peitai, sa saunoa Haretuku, na taofia lea tulaga ona sa avea ma fa’afitauli i taimi e tutumu ai malaga a va’alele ma umi ai se taimi e fa’agasolo ai le pasese i fafo.

Na fa’aalia e Haretuku, e na’o pasese e ta’I tolu agai i lalo, a latou uta, e latou te su’esu’eina ina ia vave ai le faagasologa o le pasese.  Ae o le a latou toe fa’ao’oina atu lenei mataupu i lo latou ofisa autu, e Iloilo pe tatau ona toe faamalosia lea tulaga.

Sa saunoa le afioga i le Senatoa ia Olo Uluao Letuli, e tatau i le aufaigaluega a le Hawaiian Ea ona toe faamanatu atu i a latou pasese, ae e le’i taunu’u mai le vaa, ina ia siaki lelei a latou ato ma uta, ina ia aua ai ne’i o ma ave ato a isi pasese.