E FAI O LENEI AE O LENA

O LE FALE FOU A LE LAUMEI O PETELO

I luga o se mauga, i totonu o se vaomatua tele, sa iai se fanua ma se vaitaele, e nofo ai le laumei o Petelo ma ana uo pato e toalua, o Lupe ma Sina.

O aso uma lava e ta’a’alo fa’atasi ai lenei laumei ma ana uo pato.  E o foi su’e mea’ai faatasi.  E alu le aso atoa o ta’a’alo ma talatalanoa lenei vaega e toatolu.  A po le aso ona o lea o Lupe ma Sina i le vaega o le vaomatua ua mae’a ona fausi ai a la moega, ae ‘au’au le laumei o Petelo i se vaega i tafatafa o le vaita’ele, e lafi ma moe ai.

Ua o’o i se tasi o tausaga, ua tau leai se timu.  Ma ua amata ona maui le suavai o le vaitaele lea e tafafao ai le laumei o Peteli ma ana uo pato, o Lupe ma Sina.

Ua amata ona popole le to’atolu lea ma ua amata ona talatalanoa po o le a le mea ua tatau ona fai.

“E tatau ona tatou nonofo ai pea i’i, aua e masani lava ona toe timu,” o le tala lea a Petelo.

Ae faapea mai Lupe, “Ua tatau ona tatou o e toe su’e seisi vaitaele tatou te nonofo ai.”  Ona alu loa lea o Lupe e saili seisi vaitaele e ‘au’au ai.

E pe a ma le lua aso talu na alu Lupe, ae toe fo’i mai.

Ua matua’i fiafia lava ia le pato o Sina ma le laumei o Petelo e vaai ia Lupe.

“Oka so’u fiafia ua e toe sau,” o le tala lea a Petelo.  “O lea ua e va’ai mai, ua toeititi lava leai se vai i totonu o le vaita’ele lea.  Ua fia ‘ai lava ia Sina.  Ae ua amata ona mata’eta’e lo’u papatua.”

Ua oso atu le pato o Sina ma fesili atu ia Lupa, “Sa e maua se vaitaele fou?”

“Ioe,” o le tali mai lea a Lupe.  “O le matagofie ia o le nofoaga o le vaitaele fou.  Ae e fai lava sina mamao”.  E fai lava le tala a Lupe ma tilotilo atu ia Iosua.

Na fai sina umi o talatalanoa le to’atolu lea, e saili se auala e mafai ai ona o’o Iosua i le vaitaele fou lea ua maua e Lupe.

Ua oso mai nei Iosua ma faapea mai, “E iai la’u aikia.  Vaai atu i le la’au lale.  O lea o le a ou tago e u le ogatotonu o le la’au, ae tagofi oulua e u pito e lua o le la’au.  Ona oulua felelei lea i le vaitaele fou.”

Ua tau fai fetilofai ia Lupe ma Sina ma i’u ina faapea mai, “E mafai ona fai le mea lena.”

Ae ua faapea atu ia Iosua, “Pau lava le mea, e fa’asa ona tautala seisi o tatou.  Aua o le taimi lava e matala ai le gutu o se manu, ua tupu le fa’alavelave.”

Ua tau fai ioe uma ia Lupe ma Sina ma faia loa le tonu a Iosua.

Na fa’ate’ia tagata ma manu i lalo o le lau’ele’ele, i le tepa a’e i luga o le lagi, ae pasi ifo ia ni pato se lua o lo o tau’ave atu se laumei i lo la va.

Ua felelei maualuga ia Lupe ma Sina, ma ua felelei faatopetope.  Ae o le taimi lena ia Iosua, ua tata vale lona fatu i le fefe.

E pasi ifo i luga o se vaega o le taulaga ia le faigamalaga lenei, ae fa’alogo mai i lalo ua talie tagata ma faasinosino lima atu i le mata’utia o lea va’aiga o lo o latou vaai iai i luga o le lagi.

Na lagona e Iosua le pisa ma talie o tagata, ae sa le mafai ona ia iloa mai po o le a le mea o tupu, ona o la e fa’asaga i luga ona mata.

O lea, na tatala ai loa lona gutu e fesili po o le a le mea o tupu, ae ua galo ia te ia, le la’au lea o lo o mau ai.

Talofa e ia Iosua, ua laki lava le tupu o lenei mea, ae ua taunu’u le latou faigamalaga.  Ona sa pa’u sa’o lava i totonu o le vaitaele lea ua fai ma o latou fale fou.

[IA MANUIA TOE FUAFUAGA O LENEI VAIASO]