POU TIUTE A LEOLEO

Pago Pago - AMERIKA SAMOA

MEROTA FALEMIGA

O le vaveao o le aso 10 o Fepuari, 2024, sa taofia ai e se leoleo, a’o feagai ma ona tiute i luga o le alatele i Tafuna, ia se ta’avale o agai mai ia te ia, i luma o le TSM, ae o lo’o ki ana ‘high beam’.  Ma e tusa ai ma lipoti a le ofisa a leoleo, le malosi o le susulu o moli a lenei ta’avale, sa faafaigata ai i le leoleo ona iloa atu le auala.

Ae ina ua tapa e le leoleo ia le laisene aveta’avale a le susuga ia Merota Falemiga, lea sa faafoeina le taavale, sa ia fa’ailoa mai le leai o sana laisene ia te ia.  I se taimi mulimuli ane, na faamaonia ai e Falemiga, ua se’i lana laisene aveta’avale.

Na molimauina e le leoleo le mumu o mata ma le manogi pia, o le alii aveta’avale.

Sa faataunu’uina loa su’esu’ega masani a leoleo e faamautuina ai le fa’asuaava o se aveta’avale ma na fa’amonia ai le fa’asuaava o Falemiga.

Ua molia nei Falemiga i moliaga e 4;

Faitauga 1:  Aveta’avale Solitulafono – i le vasega ‘D’ o solitulafono mamafa, lea e mafai ona fa’afalepuipui ai se tasi i le va o le lima (5) tausaga ma aso e ivasefulu (90), po o se sala tupe e $5,000; po o fa’asalaga uma e lua.

Faitauga 2:  Aveta’avale Fa’asuaava – i le vasega ‘A’ o solitulafono mama, e mafai ona faafalepuipui ai se tasi i le le silia ma le tausaga e tasi (1), po o se sala tupe e le silia i le $1,000; po o fa’asalaga uma e lua.

Faitauga 3:  Aveta’avale le fa’autauta – i le vasega ‘C’ o solitulafono mama, e mafai ona faafalepuipui ai se tasi i le le silia ma le sefululima (15) aso, po o se sala tupe e le sili atu ma le $300; po o fa’asalaga uma e lua.

Faitauga 4:  Leai se Laisene Aveta’avale – i le vasega ‘B’ o solitulafono mama, e mafai ona faafalepuipui ai se tasi i le le sili atu ma le ono (6) masina, po o se sala tupe e le sili atu ma le $500; po o fa’asalaga uma e lua.

E $5,000 le tupe faatulagaina e mafai ona tatalaina ai le ua molia mai i le falepuipui, e faatali ai lona fa’asalaga. 

GAOSIA SAO

O le aso 25 o Ianuari, 2024, na taofia ai le ta’avale a Gaosia Sao i luma o le Stadium i Iliili.  Sa leai se laisene aveta’avale a Sao ma i le fa’aauauina o su’esu’ega a leoleo, na faamaonia ai le se’iina o lana laisene mo le lua tausaga, e le Faamasinoga Faaitumalo, ina ua maua faalua i le aveta’avale fa’asuaava.

Sa amataina le fa’asalaga o le laisene aveta’avale a Sao ia Aperila 5, 2023.

Ua molia nei Sao i moliaga e tolu, e aofia ai;

Faitauga 1:  Aveta’avale a’o se’i le laisene aveta’avale – o se vaega ‘D’ o solitulafono mamafa, lea e mafai ona loka ai se tasi i le va o le lima (5) tausaga ma aso e ivasefulu (90); po o se sala tupe e $5,000; po o fa’asalaga uma e lua.

Faitauga 2:  Leai se laisene aveta’avale – o se vaega ‘B’ o solitulafono mama, lea e mafai ona faafalepuipui ai se tasi i le le silia ma le ono (6) masina, po o se sala tupe e le silia ma le $500; po o faasalaga uma e lua.

Faitauga 3:  Faafoeina o se taavale ‘commercial’ e aunoa ma se pemita ‘commercial’ – o se vaega ‘B’ o solitulafono mama, e mafai ona faafalepuipui ai se tasi i le le silia ma le ono (6) masina, po o se sala tupe e le silia ma le $500; po o faasalaga uma e lua.