O OE O LO’U TAMA?

VAEGA 55

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

**************************************************

Na alu le aso atoa a’o faigaluega le teine o Naomi, sa le lelei sana galue i lona mafaufau mai i ona matua.

E fai o lona tina lea sa nofonofo i totonu o lona potu ma tagi, ae faapea foi lona tama ma lana talosaga ia latou uma ina ia vave atu pe a manava galuega ona o lo o iai se mea o mana’o e talanoa mai ai.

Sa toe manatua e Naomi le talanoaga a lona tama ma lona tina i luga o le vaalele, ina ua o latou toe fo’i mai mai i le latou tafaoga i le aiga o le alii fomai o Taki ma ua iai le masalosaloga i le teine o Naomi, e pei uma lava o Taki lea e fia talanoa atu ai lona tama ia i latou ma lona uso ma lona tuagane.

O le tuai lava ona ta le taimi manava a Naomi, ae ua leva na i fafo e faatali lana pasi e alu ai i fale.  E le’i umi na taunu’u Naomi i le fale, ae taunu’u faatasi atu ia le tama o Iakopo ma le teine matua o Ruta.

E taunu’u atu le fanau a Tanielu, ae o le taimi lea o lo o pisi lava le tamaloa i totonu o lona fale’aiga.

Na fa’asasa’o le teine o Naomi i le potu a ona matua, e siaki lona tina ma e alu atu, o la lava e taoto mai lona tina i luga o le moega, e pei e le’i tu lava i luga i le aso atoa.  Ae o lo o i luga o le laulau i ona tafatafa ia se ipu meaai, e foliga mai e le’i tago iai le tina.

Ua savali atu nei Naomi ma si’i atu se nofoa ma tu’u i tafatafa o le moega a lona tina.

Ae o le taimi lena, na o atu ai foi ma Ruta ma Iakopo i totonu o le potu ma ua o latou li’o le moega a le latou tina.

“Mom? Mom?” o le fagufagu atu lea a Iakopo i si ona tina.

“Mom, ua a mai oe?” o le fesili lea a Ruta.

“O lea lava e tiga lo’u ulu.  Ua tou o mai?” o le tali mai lea a le fafine o Eseta.

“O lea ua aumai lau mea’ai,” o le tala lea a Iakopo ma tago atu si’i mai le ipu meaai a lona tina.

“Tu’u ai iina, e uma lava o’u tago atu iai,” o le toe tali mai lea a Eseta ma ia faapea mai i lana fanau.  “Aua le popole mai ia a’u, ae o e fesoasoani i le tou tama i totonu o le fale’aiga.”

Ua sogi atu nei Iakopo i le ulu o lona tina ma liliu ma savali mai i fafo o le potu.

Ae o lo’o nofo pea Naomi i lona nofoa i tafatafa o lona tina, ae o lo’o tu i ona autafa ia Ruta.

“Mom, o le a le mea ua tupu?  O lea fa’ato’a uma nei le tatou tafaoga manaia i le aiga o Taki,” O le tala lea a Ruta.

“E leai se me aua tupu.  O lea na ou fai atu, o lo’u ulu.  Ae aua le popole, o lea ua uma na inu la’u fualaau,” o le tala lea a Eseta i lana fanau teine.

“Ta te o e ave oe i le falemai?” o le fesili atu lea a Ruta.

“E leai, ou te iloa, e o’o atu taeao ua te’a.  Ae o loa e fesoasoani i le lua tama, ae se’i sau e fai sana malologa,” o le faatonuga lea a Eseta i lana fanau.

Ua savali atu nei Ruta ma Naomi i le fale’aiga, ae tu’u ai lo la tina e fai sana malologa.

E o’o atu teine i le fale’aiga, ua mae’a ona laulau mai e lo la tama ma Iakopo ia le mea’ai.

“O mai loa tatou ‘a’ai ma tatou talatalanoa,” o le tala mai lea a le tamaloa o Tanielu.

Ua saofafa’i ifo uma lana fanau ma e ui i le matagofie o tapenapenaga a le tamaloa o Tanielu, ae peitai, ua le lagona se manogi o meaai, i le popole o loto o le fanau.

“Ia, si a’u fanau pele.  Faalogo faalelei mai outou,” o le amataga lea o le talanoa mai a Tanielu i si ana fanau.  “Ou te fia faamatala atu ia te outou le tala moni e uiga ia Taki ma lona tama moni.”

[E FAIA PEA]