Molia se tamaloa 33 tausaga i le fa’ao’olima i seisi tamaloa ma se agaese

Pago Pago - AMERIKA SAMOA

O le aso 13 o Fepuari, 2024 na fa’afeso’ota’i ai e se tagata mai i le afioaga o Nu’uuli, ia le Ofisa a Leoleo i Tafuna, ona o se fusuaga a ni tamaloloa se to’alua, lea na fa’aaoga ai e se tasi o i la’ua ia se agaese ma fa’ao’o ai ni manu’a tuga i leisi.

Ua molia nei ia le susuga ia Ioane Vaisagote i le Faitauga e 1, o le Fa’ao’olima i lona tulaga muamua – i le vasega ‘A’ o solitulafono mamafa, lea e mafai ona soloatoa ai se tagata, i le falepuipui, po o le va o le 10 ma le tausaga tausaga.

E $5,000 le tinoitupe faatulaga e mafai ona tatalaina ai o ia i tua, e faatali ai lona fa’amasinoga.

E tusa ai ma fa’amaumauga a leoleo, o lo’o ta’ua ai e faapea, ina ua taunu’u atu leoleo i Nu’uuli i le nofoaga na tupu ai le misa, o lo o taumafai ni alii se to’alua e togafiti manu’a a le susuga ia Bob Stanley.

Ae na fa’asino i leoleo le fale o iai ia Vaisagote ma sa fa’ailoa ifo e Vaisagote i leoleo, o ia na manu’a ai Stanley.

Sa faapea loa ona lokaina mai Vaisagote e leoleo ma aveina atu i le latou ofisa i Tafuna mo le fa’aauauina o su’esu’ega, ae mulimuli atu ai le susuga Stanley i lana ta’avale.  Ma sa faapea foi ona logoina e leoleo ia le vaega a le EMS mo le togafitia o Stanley.  Na fa’amaonia e le vaega a le EMS le tuga o manu’a i a’ao o Stanley faapea ma lona ao ma ona foliga.  Ma na fautuaina e EMS le aveina o Stanley i le falemai mo nisi togafitiga.

Ae e le’i ave’esea atu Stanley i le falemai, na fesiligia o ia e leoleo po ona manatua se mea na tupu, ae tasi lava le tali a Stanley, e leai se mea na tupu ma o iina na lagona ai e leoleo le manogi fa’asuaava o Stanley.

I le faatalanoaina e leoleo o Vaisagote, sa ia faamatala ai e faapea, a’o nofonofo ma matamata i luga o lana telefoni, sa ia lagona mai le paka o se taavale i fafo.  Ma e le’i ano mai ai lava, ae te’i ua faalogo mai o ‘e’e atu se tamaloa i lona (Vaisagote) afafine ma fesili iai po o fea le tamaloa e ana le taavale.  O iina na tu mai ai loa Vaisagote ma ia iloa mai ia Stanley.

Sa ta’ua e Vaisagote, na ia savali mai ia Stanley ma fesili po o a ana mea o fai i lona fale ma sa faatonu foi e Vaisagote ia Stanley, e alu ese ma lona fale.

Ae peitai, sa fa’aauau ona ‘e’e Stanley ma fesiligia Vaisagote, po o le a lana mea o fai ma lana teine, e foliga mai o lo o fia fusu ia Stanley.

Sa ta’ua e Vaisagote, ona sa iai ona afafine i le fale ma ua leotele tele ia Stanley, o lea na ia ‘a’apa atu ai ma u’u mai le agaese e fa’afefe ese ai Stanely, ae peitai, sa fa’aauau ona ‘e’e mai Stanley ia te ia.  Ma ona o lona ita tele, sa ia sasau ai lana agaese ma tau i le lima tauagavale a Stanley.  Sa ta’ua foi e Vaisagote lona le manatua pe sa misi le ulu po o le taliga a Stanley, i leisi ana sasau.

Ae o lana sasau mulimuli lea na tau i le lima taumatau a Stanley, ma pa’u ai loa i lalo.

Sa ta’ua foi e Vaisagote, lona kikiina o foliga o Stanley, ma o iina na tamomo’e atu ai loa ana tuaoi ma vaovao la’ua.

O lo’o ua ta’ua foi i faamaumauga a leoleo le fesiligia o Vaisagote pe sa ia fuafua e fa’amanu’aina ia Stanley faapea, ae tali le ua molia, e leai.  Na fesiligia foi o ia pe iai se feso’otaiga i le va o ia ma Stanley, sa tali Vaisagote, sa fai se la faigauo ma le teine a Stanley, ae o mea ia na tutupu i tausaga ua tuanai ma ua mae’a ona faaleleia.

Sa ta’ua foi e Vaisagote le mauaina i le amataga o le tausaga le faigauo a Stanley ma lona (Vaisagote) to’alua, ae ua mae’a foi ona fofoina lea mataupu.  Ae sa fa’ate’ia o ia i le o’o atu o Stanley i lona fale.